ສຳນັກຂ່າວຕ່າງປະເທດ ລາຍງານໃນວັນທີ 16 ສິງຫາຜ່ານມານີ້ວ່າ ໃນວັນທີ 15 ສິງຫາ 2016 ທ່ານ ເຊີເກ ໂອບູຄອບ ຫົວໜ້າກຸ່ມສະມາຊິກລັດຖະສະພາຣັດເຊຍ ຈາກພັກກອມມູນິດ ແຫ່ງ ສະຫະພັນຣັດເຊຍ ໄດ້ສົ່ງຈົດໝາຍເຖິງ ປະທານາທິບໍດີ ວະລາດີເມຍ ປູຕິນ ເພື່ອຮຽກຮ້ອງໃຫ້ຍົກເລີກ ສົນທິສັນຍາມິດຕະພາບ ແລະ ການຮ່ວມມືກັບອູແກຣນ ພາຍຫລັງທີ່ກຳລັງຄວາມໝັ້ນຄົງຂອງຣັດເຊຍ ສາມາດມ້າງເພກົນອຸບາຍກໍ່ການຮ້າຍ ຢູ່ແຫລມໄຄຣເມຍຂອງຣັດເຊຍ ຊຶ່ງດຳເນີນການໂດຍລັດຖະບານອູແກຣນ.
ຈົດໝາຍຂອງກຸ່ມສະມາຊິກລັດຖະສະພານີ້ ຊີ້ແຈ້ງວ່າ ບັນດາການກະທຳຂອງກຳລັງປະກອບອາວຸດອູແກຣນ ໄດ້ຮຽກຮ້ອງໃຫ້ສະຫະພັນຣັດເຊຍ ຕ້ອງມີບັນດາມາດຕະການໂຕ້ຕອບໃນທັນທີ ໂດຍໜຶ່ງໃນບັນດາມາດຕະການທີ່ສຳຄັນ ແລະ ເໝາະສົມທີ່ສຸດ ແມ່ນຕ້ອງເດັດດ່ຽວ ຍົກເລີກສົນທິສັນຍາມິດຕະພາບ ແລະ ຄູ່ຮ່ວມມື ລະຫວ່າງ ສະຫະພັນຣັດເຊຍ ກັບ ອູແກຣນ.
ຕິດຕາມເຮົາທາງFacebook ກົດຖືກໃຈເລີຍ!