ພິທີລົງນາມສັນຍາໂຄງການນໍາໃຊ້ເຄື່ອງກົນຈັກທຳລາຍລະເບີດບໍ່ທັນແຕກ (ລະເບີດລູຫວ່ານ) ທີ່ຊຽງຂວາງ, ມູນຄ່າ 570.662 ໂດລາສະຫະລັດ, ໄດ້ຈັດຂຶ້ນໃນວັນທີ 15 ສິງຫາ ຢູ່ສະຖານທູດຍີ່ປຸ່ນປະຈໍາລາວ, ລະຫວ່າງທ່ານ ທາເຄຊິ ຮິຄິຮາຣະ ເອກອັກຄະລາຊະທູດຍີ່ປຸ່ນປະຈຳລາວ ແລະທ່ານ ຣຽວອິຈິໂຣະ ອາຣະກາວະ ປະທານອົງການເກັບກູ້ລະເບີດຍີປຸ່ນ (JMAS) ແລະ ມີພາກສ່ວນກ່ຽວຂ້ອງເຂົ້າຮ່ວມເປັນຈໍານວນຫຼາຍ.
ໂຄງການດັ່ງກ່າວ ແນໃສ່ສົ່ງເສີມສະພາບແວດລ້ອມການເປັນຢູ່ທີ່ປອດໄພ ແລະການພັດທະນາຊົນນະບົດໃນແຂວງຊຽງຂວາງ, ໂດຍການເລັ່ງເກັບກູ້ລະເບີດບໍ່ທັນແຕກດ້ວຍເຄື່ອງຈັກທໍາລາຍລະເບີດລູກຫວ່ານ, ເຊິ່ງເຮັດໃຫ້ປະຢັດເວລາ ,ເພີ່ມຄວາມປອດໄພອີກດ້ວຍ ແລະ ເປັນຄັ້ງທໍາອິດຂອງໂລກທີ່ ມີການຫັນປ່ຽນເອົາເຄື່ອງຈັກມານໍາໃຊ້ເຂົ້າໃນວຽກງານທີ່ມີອັນຕະລາຍນີ້ ເພື່ອຊ່ວຍອົງການເກັບກູ້ລະເບີດແຫ່ງຊາດລາວ ເລັ່ງລັດການເກັບກູ້ລະເບີດໃນລາວໃຫ້ໄດ້ໄວຍິ່ງຂຶ້ນທັງໃນຕໍ່ໜ້າ ແລະ ຍາວນານ.
ອົງການ JMAS ໄດ້ປະຕິບັດຫລາຍໂຄງການເກັບກູ້ລະເບີດໃນ ສ ປປ ລາວ ຄື: ຢູ່ແຂວງຊຽງຂວາງລະຫວ່າງ 2005-2007, ສາລະວັນໃນປີ 2011 ,ຈໍາປາສັກແຕ່ 2011-2013 ແລະ ນະຄອນຫລວງວຽງຈັນແຕ່ປີ 2014-2015. ນອກຈາກນີ້, ລັດຖະບານຍີປຸ່ນຍາມໃດກໍໃຫ້ຄວາມສໍາຄັນວຽກງານແກ້ໄຂລະເບີດບໍ່ທັນແຕກ, ໂດຍຖືເອົາຂະແໜງດັ່ງກ່າວເປັນບູລິມະສິດ ໃນນະໂຍບາຍການຊ່ວຍເຫລືອດ້ານການພັດທະນາແກ່ລາວ, ໂດຍຜ່ານການຊ່ວຍເຫລືອດ້ານທຶນຮອນ ແລະ ອຸປະກອນອັນຈໍາເປັນ ເຊັ່ນ: ເຄື່ອງກວດຫາລະເບີດ, ເຄື່ອງຈັກຕັດຫຍ້າ, ການສ້າງຄວາມເຂັ້ມແຂງດ້ານວິຊາການ, ພະນັກງານ, ສະໜັບສະໜູນວຽກງານໂຄສະນາສຶກສາຊຸມຊົນເພື່ອຫຼີກລຽງຄວາມສ່ຽງໄພອັນຕະລາຍຈາກລະເບີດບໍ່ທັນແຕກ ແລະ ການປີ່ນປົວຜູ້ໄດ້ຮັບເຄາະຮ້າຍອີກດ້ວຍ.
ຂ່າວ: ພັດທະນາລາວ.