ໃນວັນທີ 12 ສິງຫາ ຜ່ານມາ, ສິຣິອາລຸນ ບຸດຈະເລີນ (Siri Arun BUDCHARERN) ນັກກິລາລອຍນໍ້າຂອງລາວ ໄດ້ລົງແຂ່ງຂັນ ໃນໂອລິມປິກ, ໃນລາຍການ ລອຍນໍ້າຍິງ 50 ແມັດ ຟຣີສະໄຕລ (Women’s 50m freestyle) ໃນຮອບຄັດເລືອກ ເຊິ່ງຈັດຢູ່ໃນ Heat ທີ 3 ລົງລອຍໃນ ລູ່ທີ 7 (Lane 7). ຜົນການແຂ່ງຂັນ ໃນ Heat ທີ 3 ນີ້ ສິຣິອາລຸນ ບຸດຈະເລີນ ໄດ້ອັນດັບທີ 5 ໂດຍທຳເວລາໄດ້ 32.55 ວິນາທີ, ເຊິ່ງອັນດັບທີ 1 ເປັນຂອງ ເດີກູໄບ ມີດແຊກ (Dirngulbai Misech) ຈາກ ເປລູ (Palau) ທຳເວລາໄດ້ 29.19 ວິນາທີ, ອັນດັບທີ 2 ເປັນຂອງ ແອງເຈລິກາສິຕາ ອູດາວໂກ (Angelika Sita Ouedraogo) ຈາກ ເບີກີນາ ຟາໂຊ (Burkina Faso) ທໍາເວລາໄດ້ 29.44 ວິນາທີ.
ສຳລັບ ສິຣິອາລຸນ ສະຖິຕິເຮັດໄດ້ ກ່ອນໜ້ານັ້ນແມ່ນ 33.71 ວິນາທີ, ແຕ່ໂອລິບປິກຄັ້ງນີ້ ລາວທຳເວລາໄດ້ດີກວ່າຄັ້ງຜ່ານມາ ຄື 32.55 ວິນາທີ, ເຖິງວ່າໃນຮອບຄັດເລືອກນີ້ ຈະຕາມຫຼັງຄູ່ຮ່ວມແຂ່ງຂັນຢູ່ 8.32 ວິນາທີ ກໍ່ຕາມ, ແຕ່ຖ້າຈັດອັນດັບໃນຮອບຄັດເລືອກ ສິຣິອາລຸນ ເປັນອັນດັບທີ 76 ຂອງຄູ່ຮ່ວມ ແຂ່ງຂັນທັງໝົດ 80 ຄົນ, ກໍ່ຖືວ່າລາວ ໄດ້ສ້າງຜົນງານໄດ້ດີ ແລະ ເປັນທີ່ໜ້າພໍໃຈ ພໍສົມຄວນ ສາມາດທຽບກັບ ຄູ່ຮ່ວມແຂ່ງຂັນ ໃນລະດັບໂອລິມປິກໄດ້. ເຖິງວ່າ ສິຣິອາລຸນ ຈະບໍ່ສາມາດ ຜ່ານເຂົ້າຮອບ ຕໍ່ໄປໄດ້ກໍ່ຕາມ, ແຕ່ລາວກໍ່ຍັງໄດ້ແລກປ່ຽນ ປະສົບ ການ ກັບບັນດານັກລອຍນໍ້າ ໃນລະດັບໂລກ ແລະ ເຊື່ອແນ່ວ່າ ບົດຮຽນ ແລະ ປະສົບການທີ່ລາວ ເກັບກ່ຽວໄດ້ ໃນໂອລິມປິກຄັ້ງນີ້ຈະ ສ້າງໂອກາດ ໃຫ້ລາວກ້າວໄປ ຄວ້າຫຼຽນຄຳໃນລາຍການ ອື່ນໆໃນອານາຄົດໄດ້.
(ຂໍ້ມູນຈາກ rio2016.com,yp.scmp.com)
ທີ່ມາຈາກ: http://laosportnews.com/index.php/news/article/524