ມື້ນີ້, ວັນທີ 14 ສິງຫາ 2016 ທີ່ປະເທດໄທ ເກີດເຫດຍົນເຮລິຄອບເຕີຂອງກອງທັບພາກທີ 3 ຂອງໄທ ຮຸ່ນ UH-72 ຫຼືລາໂກຕ້າ ທີ່ກຳລັງບິນກັບຈາກພາລະກິດຊ່ວຍເຫຼືອຜູ້ປະສົບໄພນ້ຳຖ້ວມທີ່ຈັງຫວັດແມ່ຮ່ອງສອນ ມຸ້ງໜ້າກັບໄປຍັງຈັງຫວັດພິດສະນຸໂລກ ໄດ້ຂາດການຕິດຕໍ່ໄປ ໃນລະຫວ່າງການບິນຢູ່ບໍລິເວນເທິງດອຍອິນທະນົນ ຕັ້ງແຕ່ເວລາ 10:30
ເຈົ້າໜ້າທີ່ທະຫານຈັງຫວັດຊຽງໃໝ່ ໄດ້ແຕ່ງຕັ້ງກັນອອກໄປຄົ້ນຫາ ແຕ່ວ່າມາຮອດຕອນຄ່ຳມືດຂອງມື້ນີ້ ກໍຍັງບໍ່ມີວີ່ແວວວ່າພົບເຫັນຍົນລຳດັ່ງກ່າວແຕ່ຢ່າງໃດ.
ຍົນລຳດັ່ງກ່າວມີຜູ້ໂດຍສານທັງໝົດ 5 ຄົນ ເປັນນັກບິນ 2 ຄົນ ຊ່າງເຕັກນິກ 2 ຄົນ ຜູ້ໂດຍສານ 1 ຄົນ ໃນນັ້ນມີ ພົນຕີ ນົບພອນ ເຮືອນຈັນ ຜູ້ບັນຊາການກອງພົນທະຫານຮາບທີ 4 ຂອງໄທລວມຢູ່ນຳພ້ອມ.
ໃນຂະນະທີ່ບາງກະແສຂ່າວໄດ້ບອກວ່າ ໄດ້ພົບເຮືອບິນລຳດັ່ງກ່າວແລ້ວ ໂດຍໄດ້ລົງຈອດທີ່ບ້ານປ່າຄາ ອຳເພີສະເມິງ ຈັງຫວັດຊຽງໃໝ່. ແຕ່ກະແສຂ່າວດັ່ງກ່າວນັ້ນພົບວ່າ ເປັນເຮລິຄອບເຕີ ຈາກກອງບິນ 41 ທີ່ໄດ້ຮ່ວມອອກຄົ້ນຫາເຮືອບິນລຳທີ່ຂາດການຕິດຕໍ່.
ແນວໃດກໍຕາມກອງທັບອາກາດໄທ ໄດ້ຈັດສົ່ງເຮືອບິນບໍ່ມີຄົນຂັບ ຫຼື UAV ຈາກກອງບິນ 4 ຕາຄລີ ສະໜັບສະໜຸນການຄົ້ນຫາ ໂດຍເຮືອບິນ UAV ຈະອອກເດິນທາງຈາກຈັງຫວັດ ນະຄອນສະຫວັນໃນຕອນເຊົ້າມື້ອື່ນນີ້.
