ສັນຕິສຸກ ອິນທະວົງ (Santisouk INTHAVONG) ນັກກິລາລອຍນໍ້າຂອງລາວ ທີ່ເຂົ້າຮ່ວມໃນໂອລິມປິກ 2016 ນີ້, ໃນວັນທີ 11 ສິງຫາ ຜ່ານມາ, ສັນຕິສຸກ ໄດ້ລົງແຂ່ງໃນລາຍການ ລອຍນໍ້າຊາຍ 50 ແມັດ ຟຣິສະໄຕລ (Men’s 50m freestyle) ໃນຮອບຄັດເລືອກ ເຊິ່ງຈັດຢູ່ໃນ Heat ທີ 3 ລົງລອຍໃນ ລູ່ທີ 8 (Lane 8). ຜົນການແຂ່ງຂັນ ໃນ Heat ທີ 3 ນີ້ ອັນດັບທີ 1 ເປັນຂອງ ໄດອ່ອນນິຊິໂອ ອົກກັດສະຕິນລີ (Dionisio Augustine Ii) ຈາກ ໄມຄຣອນເນເຊຍ (Micronesia) ເຮັດເວລາໄດ້ 26.17 ວິນາທີ, ອັນດັບທີ 2 ເປັນຂອງ ສັນຕິສຸກ ອິນທະວົງ ເຮັດເວລາໄດ້ 26.54 ວິນາທີ, ແລະ ອັນດັບທີ 3 ເປັນຂອງ ໄອບຣາຮິມ ນິສແວນ (Ibrahim Nishwan) ຈາກ ມາວດິບ (Maldives) ເຮັດເວລາໄດ້ 26.72 ວິນາທີ.
ສຳລັບ ສັນຕິສຸກ ສະຖິຕິເຮັດໄດ້ ກ່ອນໜ້ານັ້ນແມ່ນ 27.42 ວິນາທີ, ແຕ່ໂອລິບປິກຄັ້ງນີ້ ລາວໄດ້ເວລາໄດ້ດີກວ່າຄັ້ງຜ່ານມາ ແລະ ການເຮັດເວລາໃນໂອລິມປິກ ຮອບຄັດເລືອກນີ້ ຕາມຫຼັງຄູ່ຮ່ວມແຂ່ງຂັນ ທີ່ຜ່ານເຂົ້າຮອບຮອງຊະນະເລີດຢູ່ 5.05 ວິນາທີ ເຮັດໃຫ້ລາວບໍ່ສາມາດ ຜ່ານເຂົ້າສູ່ຮອບຮອງຊະນະເລີດຕໍ່ໄປໄດ້, ຖ້າຈັດອັນດັບໃນຮອບຄັດເລືອກ ສັນຕິສຸກ ເປັນອັນດັບທີ 69 ຂອງຄູ່ຮ່ວມແຂ່ງຂັນທັງໝົດ 85 ຄົນ ກໍ່ຖືວ່າລາວໄດ້ສ້າງຜົນງານໄດ້ດີ ພໍສົມຄວນ ສາມາດທຽບໄດ້ໃນລະດັບສາກົນໄດ້. ເຖິງຈະບໍ່ໄດ້ເຂົ້າຮອບກໍ່ຕາມ ແຕ່ ສັນຕິສຸກ ກໍ່ໄດ້ແລກປ່ຽນປະສົບການ ກັບບັນດານັກລອຍນໍ້າໃນລະດັບໂລກ.
ຂ່າວຈາກ: http://news.com.la/detail/17397