ບາງຄົນຄິດບໍ່ອອກ ຄຳວ່າ “ຟ້າຫຼັງຝົນ” ຄືຫຍັງກັນແທ້?. ລະດູແລ້ງເຖິງແມ່ນອາກາດຈະແຫ້ງແລ້ງ ແຕ່ສິ່ງໜຶ່ງທີ່ເຫັນແມ່ນທ້ອງຟ້າຂ້ອນຂ້າງຈະມົວໆ ເບິ່ງໄປໄກໆ ບໍ່ຊັດເຈນ ເບິ່ງພູທີ່ມີຕົ້ນໄມ້ແທນທີ່ຈະເປັນສີຂຽວເຂັ້ມໆ ແຕ່ຊ້ຳເປັນສີຂີ້ເທົ່າ ອອກຂາວໆ ມົວໆ ບໍ່ແຈ້ງ. ຕົກມາລະດູຝົນ ຖ້າມື້ໃດຝົນຕົກ ກໍຈະມີເມກໝອກບົດບັງທ້ອງຟ້າແມ່ນແຕ່ດວງຕາເວັນກໍຍັງບໍ່ສາມາດສອງແສງລົງມາສູ່ພື້ນດິນໄດ້, ແຕ່ບາດຝົນເອື້ອນແລ້ວ ທ້ອງຟ້າພັດປອດໂປ່ງ ສົດໃສ ແນມໄປໃສກໍຈະແຈ້ງ ຊັດເຈນ ທ້ອງຟ້າສີຄາມຖືກເປີດເຜີຍຢ່າງໂດດເດັ່ນ.
ມື້ນີ້ຝົນຕົກແຕ່ຕອນກາງຄືນຮອດຕອນເຊົ້າ ຕົກມາຕອນສວາຍໆ ແລ້ວ ທ້ອງຟ້າພັດປອດໂປ່ງ. ພໍດີ ວາງຈາກຄັນຄາດຄັນໄຖແລະມັດກ້າ ສາວມຸກດາວັນ ສັນຕິພອນ ນັກຮ້ອງດັງຂອງລາວ ໄດ້ພາຜູ້ຂຽນໄປຍັງແຫຼ່ງທ່ອງທ່ຽວແຫ່ງໜຶ່ງຂອງແຂວງສະຫວັນນະເຂດ ນັ້ນກໍຄືພະທາດອີງຮັງ.
ພະທາດອີງຮັງເປັນສິລະປະແລະສະຖາປັດຕະຍະກຳແບບລ້ານຊ້າງ ເປັນປູຊະນິຍະສະຖານທີ່ສຳຄັນແຫ່ງໜຶ່ງຂອງລາວ ທີ່ຕັ້ງຢູ່ໃນແຂວງສະຫວັນນະເຂດ ແລະປະມານ 15 ກິໂລແມັດ ລະຫວ່າງເສັ້ນທາງສະຫວັນນະເຂດ-ເຊໂນ ອົງພະທາດກວ້າງດ້ານລະ 9 ແມັດ ມີລັກສະນະເປັນສີ່ລ່ຽມຫຍໍ້ມຸມຄືກັບຫໍຜາສາດ ເປັນທາດແບບປະສົມວິຫານ ຄືໃຊ້ເປັນສະຖານທີ່ປະສິດສະຖານສິ່ງສັກສິດໄດ້ ເພາະມີປະຕູເຂົ້າອອກໄດ້ ອົງພະທາດຈັດເປັນ 3 ຖານ ຫຼຸດລັ່ນກັນເປັນລຳດັບ ຖານລຸ່ມສຸດ ຖານກາງເປັນສິລະປະດັ້ງເດີມ ສ່ວນຖານເທິງແລະຍອດເປັນສິລະປະສະໄໝລ້ານຊ້າງ.
ພະທາດອີງຮັງສ້າງຂຶ້ນໃນສະໄໝອານາຈັກສີໂຄດຕະບອງ ປະມານ 143ປີ ກ່ອນຄສ ຫຼືປະມານ 2157 ປີກ່ອນ ຢູ່ໃນສະໄໝເຈົ້າສິມິດຕະທຳມະວົງສາ ພະອົງສ້າງຂຶ້ນຕາມຄຳແນະນຳຂອງສະມະນະທູດສະໄໝພະເຈົ້າອະໂສກມະຫາຣາດ ທີ່ເດິນທາງເຂົ້າມາເຜີຍແຜ່ພະພຸດທະສາດສະໜາໃນສຸວັນນະພູມ ເທື່ອທຳອິດໄດ້ສ້າງເປັນທາດທີ່ມີລັກສະນະເປັນວິຫານ ເມື່ອສ້າງສຳເລັດແລ້ວໄດ້ອັງເຊີນພະບໍລົມມະສາລີລິກະທາດ ກະດູກສັນຫຼັງຂອງພະພຸດທະເຈົ້າທີ່ອັງເຊີນມາຈາກເມືອງລາຊະຄຶ ປະເທດອິນເດຍມາປະດິດສະຖານໄວ້ພາຍໃນ ເພື່ອເປັນເຄື່ອງໝາຍແທນສະຖານທີ່ປະລິນິບພານທີ່ພະພຸດທະເຈົ້າສະເດັດປະລິນິບພານໃນປ່າໄມ້ຮັງ.
ຕຳນານອຸລັງຄະທາດກ່າວວ່າ ໃນສະໄໝພຸດທະການ ພະພຸດທະເຈົ້າ ໄດ້ສະເດັດເປີດໂລກແລະຮັບອາລາທະນາມາສັນພັດຕາຫານທີ່ບໍລິເວັນແຫ່ງນີ້ ຕໍ່ມາພະເຈົ້າສຸມິດຕະທຳມະວົງສາ ກະສັດຜູ້ປົກຄອງອານາຈັກສີໂຄດຕະບອກ ໄດ້ສ້າງພະທາດນີ້ຂຶ້ນພ້ອມຕັ້ງຊື່ວ່າພະທາດອີງຮັງ ເມື່ອເຖິງສະຕະວັດທີ 9 ອານາຈັກສີໂຄດຕະບອງ ເລິ່ມເສື່ອມອ່ອນແອລົງຊົນຊາດຂອມໄດ້ຮຸກຄືບເຂົ້າມາມີອຳນາດແທນ ພະທາດອີງຮັງ ຈຶ່ງຖືກດັດແປງເປັນເທວະສະຖານຂອງສາດສະໜາພາມ ພາຍໃຕ້ການນຳຂອງພະເຈົ້າສຸມົນທາທິລາດ ໄດ້ມີການສ້າງຕໍ່ເຕີມອົງພະທາດ ຕົກແກຕ່ງລວດລາຍ ປະຕິມາກຳເປັນເລື່ອງເມຖຸນສັງວາດ ແລະຣາມາຍະນະ ນັບແຕ່ນັ້ນມາລັກສະນະສິລະປະກຳຂອງພະທາດອີງຮັງ ຈຶ່ງເປັນສິລະປະແບບຂອມບູຮານ ພ້ອມກັບເອີ້ນຊື່ວ່າ ອິນທຣະຜາສາດ ຈົນຮອດສະຕະວັດທີ 14 ຊົນຊາດລາວໄດ້ເຂົ້າມາມີອຳນາດແທນຂອມ.
ສະໄໝພະເຈົ້າໂພທິສາລະລາດ ກະສັດແຫ່ງອານາຈັກລ້ານຊ້າງ ເຊິ່ງເລື່ອມໃສໃນພຸດທະສາດສະໜາໄດ້ນຳພາປະຊາຊົນບູລະນະປະຕິສັງຂອນພະທາດພະນົມ ພະທາດອີງຮັງ ພະທາດໂພ່ນ ຈົນເຖິງສະໄໝພະເຈົ້າໄຊເສດຖາທິລາດ ໄດ້ຕໍ່ເຕີມສິລະປະລ້ານຊ້າງໄປໃນອົງພະທາດອີງຮັງ ແລະເສີມຍອດດວງປີ ດັດແປງໃຫ້ເປັນພະທາດທາງພຸດທະສາດສະໜາ ໂດຍຖານພະທາດແຕ່ລະດ້ານກວ້າງ 9 ແມັດ ສູງ 25 ແມັດ ປາກົດຢູ່ຈົນຮອດຊູ່ມື້ນີ້.
ທ່ຽວໄປ ຊົມໄປ ຢ່າງເພີດເພີນ ຈົນລືມນຶກເຖິງແສງແດດທີ່ຮ້ອນໄໝ້ຮ້ອນເຜົາ ບໍ່ດົນຜູ້ນຳທ່ຽວ ກໍກວັກມືແວບໆ ນັ້ນເປັນສັນຍານບອກວ່າຮອດເວລາກັບແລ້ວເດີ ເພາະຕ້ອງຟ້າວກັບເມືອແກງເຫັດ, ປິ້ງປາ, ຕຳໝາກຖົ່ວ, ລວກຜັກກັບປົ່ນປາດຸກກ່ອນ… ເວົ້າມານ້ຳລາຍອອກແລ້ວ ໄປກ່ອນເດີ !!
ຮູບຖ່າຍຈາກ: ມຸກດາວັນ ສັນຕິພອນ