spot_img
Home​ຂ່າວທ່ອງທ່ຽວຟ້າຫຼັງຝົນທີ່ພະທາດອີງຮັງ

ຟ້າຫຼັງຝົນທີ່ພະທາດອີງຮັງ

Published on

10425159_258430201024674_6856382592114952411_n

ບາງຄົນຄິດບໍ່ອອກ ຄຳວ່າ “ຟ້າຫຼັງຝົນ” ຄືຫຍັງກັນແທ້?. ລະດູແລ້ງເຖິງແມ່ນອາກາດຈະແຫ້ງແລ້ງ ແຕ່ສິ່ງໜຶ່ງທີ່ເຫັນແມ່ນທ້ອງຟ້າຂ້ອນຂ້າງຈະມົວໆ ເບິ່ງໄປໄກໆ ບໍ່ຊັດເຈນ ເບິ່ງພູທີ່ມີຕົ້ນໄມ້ແທນທີ່ຈະເປັນສີຂຽວເຂັ້ມໆ ແຕ່ຊ້ຳເປັນສີຂີ້ເທົ່າ ອອກຂາວໆ ມົວໆ ບໍ່ແຈ້ງ. ຕົກມາລະດູຝົນ ຖ້າມື້ໃດຝົນຕົກ ກໍຈະມີເມກໝອກບົດບັງທ້ອງຟ້າແມ່ນແຕ່ດວງຕາເວັນກໍຍັງບໍ່ສາມາດສອງແສງລົງມາສູ່ພື້ນດິນໄດ້, ແຕ່ບາດຝົນເອື້ອນແລ້ວ ທ້ອງຟ້າພັດປອດໂປ່ງ ສົດໃສ ແນມໄປໃສກໍຈະແຈ້ງ ຊັດເຈນ ທ້ອງຟ້າສີຄາມຖືກເປີດເຜີຍຢ່າງໂດດເດັ່ນ.

10469463_258430211024673_6681793157986111717_n

ມື້ນີ້ຝົນຕົກແຕ່ຕອນກາງຄືນຮອດຕອນເຊົ້າ ຕົກມາຕອນສວາຍໆ ແລ້ວ ທ້ອງຟ້າພັດປອດໂປ່ງ. ພໍດີ ວາງຈາກຄັນຄາດຄັນໄຖແລະມັດກ້າ ສາວມຸກດາວັນ ສັນຕິພອນ ນັກຮ້ອງດັງຂອງລາວ ໄດ້ພາຜູ້ຂຽນໄປຍັງແຫຼ່ງທ່ອງທ່ຽວແຫ່ງໜຶ່ງຂອງແຂວງສະຫວັນນະເຂດ ນັ້ນກໍຄືພະທາດອີງຮັງ.

10509636_258430231024671_1131294083003276688_n

ພະທາດອີງຮັງເປັນສິລະປະແລະສະຖາປັດຕະຍະກຳແບບລ້ານຊ້າງ ເປັນປູຊະນິຍະສະຖານທີ່ສຳຄັນແຫ່ງໜຶ່ງຂອງລາວ ທີ່ຕັ້ງຢູ່ໃນແຂວງສະຫວັນນະເຂດ ແລະປະມານ 15 ກິໂລແມັດ ລະຫວ່າງເສັ້ນທາງສະຫວັນນະເຂດ-ເຊໂນ ອົງພະທາດກວ້າງດ້ານລະ 9 ແມັດ ມີລັກສະນະເປັນສີ່ລ່ຽມຫຍໍ້ມຸມຄືກັບຫໍຜາສາດ ເປັນທາດແບບປະສົມວິຫານ ຄືໃຊ້ເປັນສະຖານທີ່ປະສິດສະຖານສິ່ງສັກສິດໄດ້ ເພາະມີປະຕູເຂົ້າອອກໄດ້ ອົງພະທາດຈັດເປັນ 3 ຖານ ຫຼຸດລັ່ນກັນເປັນລຳດັບ ຖານລຸ່ມສຸດ ຖານກາງເປັນສິລະປະດັ້ງເດີມ ສ່ວນຖານເທິງແລະຍອດເປັນສິລະປະສະໄໝລ້ານຊ້າງ.

10464243_258430314357996_4323721644680393415_n

ພະທາດອີງຮັງສ້າງຂຶ້ນໃນສະໄໝອານາຈັກສີໂຄດຕະບອງ ປະມານ 143ປີ ກ່ອນຄສ ຫຼືປະມານ 2157 ປີກ່ອນ ຢູ່ໃນສະໄໝເຈົ້າສິມິດຕະທຳມະວົງສາ ພະອົງສ້າງຂຶ້ນຕາມຄຳແນະນຳຂອງສະມະນະທູດສະໄໝພະເຈົ້າອະໂສກມະຫາຣາດ ທີ່ເດິນທາງເຂົ້າມາເຜີຍແຜ່ພະພຸດທະສາດສະໜາໃນສຸວັນນະພູມ ເທື່ອທຳອິດໄດ້ສ້າງເປັນທາດທີ່ມີລັກສະນະເປັນວິຫານ ເມື່ອສ້າງສຳເລັດແລ້ວໄດ້ອັງເຊີນພະບໍລົມມະສາລີລິກະທາດ ກະດູກສັນຫຼັງຂອງພະພຸດທະເຈົ້າທີ່ອັງເຊີນມາຈາກເມືອງລາຊະຄຶ ປະເທດອິນເດຍມາປະດິດສະຖານໄວ້ພາຍໃນ ເພື່ອເປັນເຄື່ອງໝາຍແທນສະຖານທີ່ປະລິນິບພານທີ່ພະພຸດທະເຈົ້າສະເດັດປະລິນິບພານໃນປ່າໄມ້ຮັງ.

10468348_258430411024653_5475663929917955385_n

ຕຳນານອຸລັງຄະທາດກ່າວວ່າ ໃນສະໄໝພຸດທະການ ພະພຸດທະເຈົ້າ ໄດ້ສະເດັດເປີດໂລກແລະຮັບອາລາທະນາມາສັນພັດຕາຫານທີ່ບໍລິເວັນແຫ່ງນີ້ ຕໍ່ມາພະເຈົ້າສຸມິດຕະທຳມະວົງສາ ກະສັດຜູ້ປົກຄອງອານາຈັກສີໂຄດຕະບອກ ໄດ້ສ້າງພະທາດນີ້ຂຶ້ນພ້ອມຕັ້ງຊື່ວ່າພະທາດອີງຮັງ ເມື່ອເຖິງສະຕະວັດທີ 9 ອານາຈັກສີໂຄດຕະບອງ ເລິ່ມເສື່ອມອ່ອນແອລົງຊົນຊາດຂອມໄດ້ຮຸກຄືບເຂົ້າມາມີອຳນາດແທນ ພະທາດອີງຮັງ ຈຶ່ງຖືກດັດແປງເປັນເທວະສະຖານຂອງສາດສະໜາພາມ ພາຍໃຕ້ການນຳຂອງພະເຈົ້າສຸມົນທາທິລາດ ໄດ້ມີການສ້າງຕໍ່ເຕີມອົງພະທາດ ຕົກແກຕ່ງລວດລາຍ ປະຕິມາກຳເປັນເລື່ອງເມຖຸນສັງວາດ ແລະຣາມາຍະນະ ນັບແຕ່ນັ້ນມາລັກສະນະສິລະປະກຳຂອງພະທາດອີງຮັງ ຈຶ່ງເປັນສິລະປະແບບຂອມບູຮານ ພ້ອມກັບເອີ້ນຊື່ວ່າ ອິນທຣະຜາສາດ ຈົນຮອດສະຕະວັດທີ 14 ຊົນຊາດລາວໄດ້ເຂົ້າມາມີອຳນາດແທນຂອມ.

ສະໄໝພະເຈົ້າໂພທິສາລະລາດ ກະສັດແຫ່ງອານາຈັກລ້ານຊ້າງ ເຊິ່ງເລື່ອມໃສໃນພຸດທະສາດສະໜາໄດ້ນຳພາປະຊາຊົນບູລະນະປະຕິສັງຂອນພະທາດພະນົມ ພະທາດອີງຮັງ ພະທາດໂພ່ນ ຈົນເຖິງສະໄໝພະເຈົ້າໄຊເສດຖາທິລາດ ໄດ້ຕໍ່ເຕີມສິລະປະລ້ານຊ້າງໄປໃນອົງພະທາດອີງຮັງ ແລະເສີມຍອດດວງປີ ດັດແປງໃຫ້ເປັນພະທາດທາງພຸດທະສາດສະໜາ ໂດຍຖານພະທາດແຕ່ລະດ້ານກວ້າງ 9 ແມັດ ສູງ 25 ແມັດ ປາກົດຢູ່ຈົນຮອດຊູ່ມື້ນີ້.

10500552_258430301024664_6362713167462089261_n

ທ່ຽວໄປ ຊົມໄປ ຢ່າງເພີດເພີນ ຈົນລືມນຶກເຖິງແສງແດດທີ່ຮ້ອນໄໝ້ຮ້ອນເຜົາ ບໍ່ດົນຜູ້ນຳທ່ຽວ ກໍກວັກມືແວບໆ ນັ້ນເປັນສັນຍານບອກວ່າຮອດເວລາກັບແລ້ວເດີ ເພາະຕ້ອງຟ້າວກັບເມືອແກງເຫັດ, ປິ້ງປາ, ຕຳໝາກຖົ່ວ, ລວກຜັກກັບປົ່ນປາດຸກກ່ອນ… ເວົ້າມານ້ຳລາຍອອກແລ້ວ ໄປກ່ອນເດີ !!

 

ຮູບຖ່າຍຈາກ: ມຸກດາວັນ ສັນຕິພອນ

ບົດຄວາມຫຼ້າສຸດ

ລົດບັນທຸກແກ່ຫີນ-ຊາຍ ທີ່ເຮັດ ຫີນ,ດິນ,ຊາຍ ເຮ່ຍຕາມຫົນທາງ ເຮັດໃຫ້ຖະໜົນເປິເປື້ອນ ຈະຖືກເຈົ້າໜ້າທີ່ປັບໄໝ

ເຈົ້າໜ້າທີ່ຈະປັບໄໝ ລົດບັນທຸກແກ່ຫີນ-ຊາຍ ທີ່ເຮັດ ຫີນ,ດິນ,ຊາຍ ເຮ່ຍຕາມຫົນທາງ ເຮັດໃຫ້ຖະໜົນເປິເປື້ອນ. ພທ ຄຳພູ ສົມແພງພັນ ຮອງຫົວໜ້າພະແນກຕຳຫຼວດຈາລະຈອນ ຫ້ອງຕຳຫຼວດ ປກສ ນະຄອນຫຼວງວຽງຈັນ ໄດ້ໃຫ້ສຳພາດວ່າ: ອີງຕາມປະກົດການຫຍໍ້ທໍ້ທີ່ເກີດຂຶ້ນໃນສັງຄົມ...

ປຶກສາຫາລື 5 ຫົວຂໍ້ສຳຄັນ ໃນກອງປະຊຸມສະໄໝສາມັນ ຂອງລັດຖະບານ ປະຈຳເດືອນກຸມພາ 2025

ໄຂກອງປະຊຸມສະໄໝສາມັນ ຂອງລັດຖະບານ ປະຈຳເດືອນກຸມພາ 2025 ກອງປະຊຸມສະໄໝສາມັນຂອງລັດຖະບານ ປະຈຳເດືອນກຸມພາ 2025 ໄດ້ໄຂຂຶ້ນໃນຕອນເຊົ້າວັນທີ 27 ກຸມພາ 2025 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງທ່ານ ສອນໄຊ ສີພັນດອນ,...

ເຮືອບິນກອງທັບຊູດານ ເກີດອຸບັດຕິເຫດຕົກໃສ່ເຂດຊຸມຊົນ ເຮັດໃຫ້ມີຜູ້ເສຍຊີວິດ 46 ຄົນ

ເສຍຊີວິດເພີ່ມ 46 ຄົນ ຈາກເຫດເຮືອບິນກອງທັບຊູດານຕົກໃນເຂດຊຸມຊົນ. ສຳນັກຂ່າວຕ່າງປະເທດລາຍງານໃນວັນທີ 26 ກຸມພາ 2025 ເກີດເຫດເຮືອບິນຂອງກອງທັບຊູດານເກີດອຸບັດຕິເຫດຕົກໃນ ເມືອງອອມດູມານ ພາກກາງຂອງປະເທດ ໃນວັນອັງຄານຜ່ານມາ ເຮັດໃຫ້ມີຜູ້ເສຍຊີວິດຢ່າງນ້ອຍ 46 ຄົນ...

ທຫລ ປະກາດໃຊ້ ຂໍ້ຕົກລົງວ່າດ້ວຍການ ຄຸ້ມຄອງບັນຊີເງິນຝາກເງິນຕາຕ່າງປະເທດຢູ່ ລາວ

ທຫລ ປະກາດໃຊ້ ຂໍ້ຕົກລົງວ່າດ້ວຍການ ຄຸ້ມຄອງບັນຊີເງິນຝາກເງິນຕາຕ່າງປະເທດຢູ່ ລາວ ໃນວັນທີ 26 ກຸມພາ 2025 ນີ້, ທ່ານ ອາລຸນ ບຸນຍົງ ຮອງຜູ້ວ່າການ ທະນາຄານແຫ່ງ...