ສຳນັກຂ່າວຜູ້ຈັດການອອນລາຍຂອງໄທ ລາຍງານໃນວັນທີ 12 ສິງຫານີ້ວ່າ ເຈົ້າໜ້າທີ່ຕຳຫລວດໄທ ໄດ້ອອກມາລະບຸ ກ່ຽວກັບເຫດການລະເບີດ ແລະ ໄຟໄໝ້ຢ່າງຕໍ່ເນື່ອງ ແບບມີການປະສານງານກັນ ສ້າງຄວາມປັ່ນປ່ວນໃນຫລາຍເມືອງ ທາງພາກໃຕ້ຂອງໄທ ຊຶ່ງສົ່ງຜົນເຮັດໃຫ້ມີຜູ້ເສຍຊີວິດ ຢ່າງໜ້ອຍ 4 ຄົນ ແລະ ບາດເຈັບອີກ 10 ກວ່າຄົນ ໂດຍທ່ານ ພັນເອກ ກຣິດສະນະ ພັດທະນະຈະເຣີນ ຮອງໂຄສົກ ສຳນັກງານຕຳຫລວດແຫ່ງຊາດໄທ ໄດ້ກ່າວວ່າ ຍັງບໍ່ທັນຮູ້ຊັດເຈນ ວ່າໃຜຢູ່ເບື້ອງຫລັງຂອງການໂຈມຕີເຫລົ່ານີ້ ແຕ່ພວກເຮົາແນ່ໃຈວ່າ ເຫດການດັ່ງກ່າວ ບໍ່ໄດ້ກ່ຽວຂ້ອງ ຫລື ເຊື່ອມໂຍງໃດໆກັບການກໍ່ການຮ້າຍ ແລະ ບໍ່ກ່ຽວຂ້ອງກັບ ການກໍ່ຄວາມບໍ່ສະຫງົບ ຢູ່ຊາຍແດນພາກໃຕ້ຂອງໄທແຕ່ຢ່າງໃດ.

ດ້ານແຫລ່ງຂ່າວໄດ້ລະບຸວ່າ ເຫດການດັ່ງກ່າວນີ້ ຖືກຕັ້ງຂໍ້ສົງໄສ ອາດກ່ຽວຂ້ອງກັບຂໍ້ຂັດແຍ່ງທາງການເມືອງ ເນື່ອງຈາກເກີດຂຶ້ນ ໃນໄລຍະເວລາທີ່ ການລົງປະຊາມະຕິ ຮັບຮອງເອົາລັດຖະທຳມະນູນ ສະບັບໃໝ່ຂອງໄທ ຫາກໍສຳເລັດລົງ ເມື່ອວັນອາທິດທີ 7 ສິງຫາ 2016 ຜ່ານມາ ໂດຍລັດຖະທະມະນູນສະບັບດັ່ງກ່າວ ໄດ້ຖືກຕໍ່ຕ້ານຢ່າງແຂງແຮງ ຈາກບັນດາພັກການເມືອງ ແລະ ກຸ່ມຄົນທີ່ກົງກັນຂ້າມ ກັບຄະນະລັດຖະປະຫານຂອງໄທ ທີ່ຍຶດອຳນາດຢູ່ໃນປັດຈຸບັນ.

ຕິດຕາມເຮາທາງFacebook ກົດຖືກໃຈເລີຍ!