ຫຍັບມໍ່ເຂົ້າມາແລ້ວ! ສະຫມໍລະພູມການສອບເສັງທີ່ຍິ່ງໃຫຍ່ທີ່ສຸດໃນປະເທດນັ້ນກໍຄືການສອບເສັງຄັດເລືອກເຂົ້າຮຽນລະດັບມະຫາວິທະຍາໄລແຫ່ງຊາດປະຈຳສົກສຶກສາ 2016-17. ເຊິ່ງຈະຈັດຂຶ້ນໃນວັນທີ 11ສິງຫານີ້. ໃນການສອບເສັງຄັ້ງນີ້ ມີຫລາຍຢ່າງທີ່ປັບປ່ຽນໄປໂດຍສະເພາະລະບົບການຄັດເລືອກນັກສຶກສາເຂົ້າຮຽນ ຈະແບ່ງເປັນ 3 ສາຍ A, B, C (ສາຍທຳມະຊາດ, ສາຍສັງຄົມແລະ ສາຍເຄິງທຳມະຊາດ-ສັງຄົມ) . ທ່າມກາງນ້ອງນັກສຶກສາຫລາຍຄົນກຳລັງຂຸ້ນຂ້ຽວກະກຽມສອບເສັງ ຍັງມີອີກຄົນກຸ່ມຫນຶ່ງທີ່ເຮັດວຽກຫນັກໄປບໍ່ຫນ້ອຍກວ່າກັນນັ້ນກໍຄື ຜູ້ອອກຫົວບົດສອບເສັງທັງ 7ວິຊາ ທີ່ເປັນອາຈານ ແລະນັກວິຊາການຜູ້ຊົງຄຸນວຸດທິ ຕ້ອງມາຮວມໂຕກັນເພື່ອປຶກສາຫາລື, ເລືອກເຟັ້ນຫາຄຳຖາມວັດຄວາມຮູ້ຂອງບັນດານັກສອບເສັງ ເຊິ່ງບັນດາຜູ້ອອກຫົວບົດສອບເສັງທັງຫລາຍແມ່ນຈະຖືກເຈົ້າຫນ້າທີ່ກັກບໍລິເວນ ແລະຕັດຊ່ອງທາງການຕິດຕໍ່ສື່ສານກັບຄອບຄົວ ແລະບຸກຄົນອື່ນໆທີ່ບໍ່ກ່ຽວຂ້ອງທັງຫມົດ ຕະຫລອດເວລາປະຕິບັດຫນ້າທີ່ຈົນກວ່າການສອບເສັງຈະຮຽບຮ້ອຍທຸກປະການ. ທັງນີ້ກໍແມ່ນເພື່ອຮັບປະກັນຄວາມຖືກຕ້ອງໂປ່ງໃສ ບໍ່ໃຫ້ມີບັນຫາຂໍ້ສອບຮົ່ວໄຫລ ອັນເປັນປາກົດການຫຍໍ້ທໍ້ທີ່ສັງຄົມຈັບຕາເບິ່ງ. ທ່ານ ດຣ. ຄຳຜົງ ນາມມະວົງມີໄຊ ຫົວຫນ້າຫ້ອງການວິຊາການ ມຊ ໄດ້ກ່າວວ່າ: ທາງ ມຊ ໄດ້ວາງມາດຕະການໃນການສອບເສັງຢ່າງເຂັ້ມງວດໃນທຸກຂັ້ນຕອນເພື່ອຮັບປະກັນໃຫ້ໄດ້ຄົນທີ່ມີຄວາມຮູ້ຄວາມສາມາດມາສຶກສາຮ່ຳຮຽນແທ້ໆ . ສະເພາະສົກສຶກສາ2016-17 ມີຜູ້ສະຫມັກສອບເສັງ 15.000ຄົນ ແຕ່ຕາມທິດຊີ້ນຳຂອງກະຊວງສຶກສາທິການ ແລະກິລາ ສາມາດຮອງຮັບນັກສຶກສາໄດ້ 5.335ຄົນ ໃນນັ້ນ ຜູ້ທີ່ເສັງໄດ້ແມ່ນມີພຽງ 3.476 ຄົນເທົ່ານັ້ນ, ອີກ 1.859ຄົນ ແມ່ນສຳລັບທຶນຂອງນັກສຶກສາໃນແຜນ. ສ່ວນຜົນການສອບເສັງຄາດວ່າຈະປະກາດໃຫ້ຮູ້ກ່ອນວັນທີ 15ກັນຍາ 2016.
ທີ່ມາ: http://www.kidork.com/post/