ຂປລ. ​ໂດຍ​ຕອບ​ສະໜອງຕາມ​ຄຳ​ເຊີນ​ຂອງ ທ່ານ ດອນ ປຣະມັດ​ວິ​ໄນ ລັດຖະມົນຕີ​ກະຊວງ​ການ​ຕ່າງປະ​ເທດ ​ແຫ່ງ ຣາຊະອາ​ນາ​ຈັກ​ໄທ, ທ່ານ ສະ​ເຫລີມ​ໄຊ ກົມມະ​ສິດ ລັດຖະມົນຕີ​ກະຊວງ​ການ​ຕ່າງປະ​ເທດ ​ແຫ່ງ ສາທາລະນະ​ລັດ ປະຊາທິປະ​​ໄຕ ປະຊາຊົນ​ລາວ ​ແລະ ຄະນະ ​ໄດ້​ເດີນທາງ​ຢ້ຽມຢາມ ຣາຊະ​ອານາຈັກ​ໄທ ຢ່າງ​ເປັນ​ທາງ​ການ ​ແຕ່​ວັນ​ທີ 9-10 ສິງຫາ 2016 ​ເພື່ອ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ຖານ​ບ້ານ​ໃກ້​ເຮືອນຄຽງທີ່​ດີ ມີ​ມາ​ແຕ່​ດົນ​ນານ ​ແລະ ການ​ຮ່ວມ​ມື​ອັນ​ດີ ລະຫວ່າງ​ສ​ອງປະ​ເທດ ລາວ ​ແລ​ະ ​ໄທ ​ໃຫ້​ແໜ້ນ​ແຟ້ນ ​ແລະ ກວ້າງຂວາງ​ຍິ່ງໆຂຶ້ນ.

ໃນວັນ​ທີ 9 ສິງຫາ 2016, ທີ່ກະຊວງ​ການ​ຕ່າງປະ​ເທດ ຣາຊະ​ອານາຈັກ​ໄທ ທ່ານ ສະ​ເຫລີມ​ໄຊ​ ກົມມະ​ສິດ ລັດຖະມົນຕີ​ກະຊວງ​ການ​ຕ່າງປະ​ເທດ ​ແຫ່ງ ສປປ ລາວ ​ໄດ້​ຖືກ​ຕ້ອນຮັບ​ຢ່າງ​ເປັນ​ທາງ​ການ​ຈາກ ທ່ານ ດອນ​ ປຣະມັດ​ວິ​ໄນ ລັດຖະມົນຕີ​ກະຊວງ​ການ​ຕ່າງປະ​ເທດ ​ແຫ່ງ ຣາຊະອາ​ນາ​ຈັກ​ໄທ ​ແລະ ຫລັງຈາກ​ນັ້ນ​, ກໍໄດ້​ມີ​ການ​ພົບ​ປະ​ສອງ​ຝ່າຍ​ຢ່າງ​ເປັນ​ທາງ​ການຂຶ້ນ. ​ໃນ​ການ​ພົບ​ປະສອງ​ຝ່າຍ ​ໄດ້​ຕີ​ລາຄາ​ສູງຕໍ່ມູນ​ເຊື້ອສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື​ ທີ່​ມີ​ມາ​ແຕ່​ຍາວ​ນານ ຖານ​ບ້ານ​ໃກ້​ເຮືອນຄຽງທີ່​ດີ ລະຫວ່າງ​ສອງ​ປະ​ເທດ ສອງ​ລັດຖະບານ ກໍ​ຄື ສອງ​ກະຊວງ​ການ​ຕ່າງປະ​ເທດ ທີ່ມີ​ການ​ຂະຫຍາຍຕົວຢ່າງ​ເລິກ​ເຊິ່ງໜັກ​ແໜ້ນ ​ແລະ ຮອບດ້ານ​ ​ເຫັນ​ໄດ້​ຈາ​ກການ​ໄປມາຫາສູ່​ ມີ​ການ​ແລກປ່ຽນການ​ຢ້ຽມຢາມ​ ຂອງ​ຄະນະ​ຜູ້​ແທນ​ຂັ້ນ​ຕ່າງໆ, ສອງ​ຝ່າຍ​ຕົກລົງ​ເຫັນ​ດີ​ຮ່ວມ​ມື​ກັນ ​ສະກັດ​ກັ້ນ​ການ​ເຄື່ອນ​ໄຫວ​ ຂອງ​ພວກ​ຄົນ​ບໍ່ດີ ທີ່​ລັກລອບ​ຂົນ​ສົ່ງ​ສິນຄ້າ-ຄ້າຂາຍ​ຢາ​ເສບ​ຕິດ, ການ​ຄ້າ​ໄມ້​ເຖື່ອນ, ການ​ຄ້າ​ມະນຸດ ​ແລະ ການກໍ່ຄວາມ​ບໍ່ສະຫງົບ ຢູ່​ຕາມ​ບໍລິ​ເວນ​ຊາຍ​ແດນ;​ ສືບຕໍ່ພະຍາຍາມ​ຮ່ວມ​ກັນ​ປັກຫລັກໝາຍຊາຍ​ແດນ​ທາງບົກ ​ທີ່​ຍັງ​ຄົງ​ຄ້າງ ຈຳນວນ 14 ຈຸດ ​ໃຫ້​ສຳ​ເລັດ​ໃນ​ປີ 2016 ​ແລະ ການ​ປັກຫລັກໝາຍຊາຍ​ແດນ​ທາງນ້ຳ ​ໃຫ້​ສຳ​ເລັດ​ໃນ​ປີ 2018; ສອງ​ຝ່າຍ​ເຫັນ​ດີ ​ເພີ່ມ​ທະວີ​ການ​ຮ່ວມ​ມື​ດ້ານ​ເສດຖະກິດ, ການ​ຄ້າ ​ແລະ ການ​ລົງທຶນ, ອໍານວຍ​ຄວາມ​ສະດວກ​ໃຫ້​ແກ່​ການ​ຂົນສົ່ງ​ສິນຄ້າ​ຜ່ານ​ຊາຍ​ແດນ ​ໃຫ້​ວ່ອງ​ໄວ​ຂຶ້ນກວ່າ​ເກົ່າ, ອໍານວຍ​ຄວາມ​ສະດວກ​ໃນ​ການນຳ​ເຂົ້າ-ສົ່ງ​ອອກ​ສິນຄ້າ​ ຂອງ​ ສປປ ລາວ ​ເພື່ອ​ສົ່ງຕໍ່​ໄປ​ປະ​ເທດ​ທີ່​ສາມ ​ແລະ ໃນ​ປີ 2015 ມູນ​ຄ່າ​ການ​ຄ້າລະຫວ່າງ​ສອງປະ​ເທດ ​ເພີ່ມ​ຂຶ້ນຈາກ 2,105 ລ້ານ​ໂດ​ລາສະຫະລັດ ​ໃນ​ປີ 2014 ​ເປັນ 5,633 ລ້ານ​ໂດ​ລາສະຫະລັດ; ສອງ​ຝ່າຍ​ເຫັນ​ດີ​ສືບຕໍ່ ​ເພີ່ມ​ທະວີ​ການ​ຮ່ວມ​ມືດ້ານ​ພະລັງງານ​ໄຟຟ້າ, ດ້ານ​ແຮງ​ງານ, ດ້ານ​ການ​ສຶກສາ, ພື້ນຖານ​ໂຄງ​ລ່າງ, ການ​ຮ່ວມ​ມື​ລະຫວ່າງແຂວງ ​ແລະ ຈັງຫວັດຊາຍ​ແດນ​ ລາວ-​ໄທ ​ແລະ ການ​ດູດ​ແຮ່ ​ແລະ ຊາຍຕາມ​ລຳ​ແມ່ນ້ຳຂອງ ​ແລະ ​ແມ່ນ້ຳ​ເຫລືອງ. ນອກ​ນັ້ນ​, ສອງ​ຝ່າຍຍັງ​ເຫັນ​ດີ​ ຈະ​ສືບຕໍ່​ໃຫ້ການ​ຮ່ວມ​ມື​ກັນ ​ໃນ​ຂອບ​ການ​ຮ່ວມມື CLMVT, ຂອບ​ກາ​ນຮ່ວມ​ມື ACMECS, ກອບ​ການ​ຮ່ວມ​ມື ອາຊຽນ, ​ໃນ​ພາກພື້ນ ​ແລະ ສາກົນ.

​ໃນ​ຕອນ​ທ້າຍ​ການ​ພົບ​ປະ ທ່ານ ສະ​ເຫລີມ​ໄຊ ກົມມະ​ສິດ ​ໄດ້​ສະ​ແດງ​ຄວາມ​ຂອບ​ໃຈຕໍ່ລັດຖະບານ​ໄທ ທີ່​ໃຫ້ການ​ຮ່ວມ​ມື ​ແລະ ຊ່ວຍ​ເຫລືອ​ເປັນ​ຢ່າງ​ດີ ​ແກ່​ການ​ເປັນ​ເຈົ້າພາບ​ຈັດ​ກອງ​ປະຊຸມ AMM  ຄັ້ງ ​ທີ 49 ​ແລະ ກອງ​ປະຊຸມ​ປິ່ນອ້ອມ​ອື່ນໆ​ ທີ່ນະຄອນຫລວງວຽງຈັນ ​ແລະ ຫວັງ​ວ່າ​ຈະ​ໄດ້​ຮັບ​ການ​ຊ່ວຍ​ເຫລືອ ​ແລະ ຮ່ວມ​ມືຕື່ມ​ອີກ ​ໃນ​ໂອກາດ​ທີ່ ສປປ ລາວ ຈະ​ເປັນ​ເຈົ້າພາບ​ຈັດ​ກອງ​ປະຊຸມ​ສຸດ​ຍອດ​ອາຊຽນ ​ໃນ​ເດືອນ​ກັນຍາ 2016 ນີ້.

ແຫລ່ງຂ່າວ:

ຕິດຕາມເຮາທາງFacebook ກົດຖືກໃຈເລີຍ!