ໂອກາດເດີນທາງໄປຢ້ຽມຢາມ ແລະ ເຮັດວຽກຢູ່ແຂວງຫຼວງພະບາງ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ເນັ້ນໜັກໃຫ້ ອຳນາດການປົກຄອງແຂວງຫຼວງພະບາງ ສືບຕໍ່ເອົາໃຈໃສ່ເພີ່ມທະວີ ຄວາມຮັບຜິດຊອບພາຍໃນ ຄະນະພັກ, ອຳນາດການປົກຄອງທຸກຂັ້ນ ແລະ ບັນດາຂະແໜງການຕ່າງໆ ໃນການຈັດຕັ້ງປະຕິບັດ ບັນດາຄາດໝາຍສູ້ຊົນ ທີ່ມະຕິກອງປະຊຸມໃຫຍ່ ຄັ້ງທີ X ຂອງພັກ ກໍຄືມະຕິຂອງແຂວງວາງອອກ ໃຫ້ປະກົດຜົນ ເປັນຈິງ, ພ້ອມທັງເອົາໃຈໃສ່ໃນການຕິດຕາມ, ກວດກາການຈັດຕັ້ງປະຕິບັດ ບັນດາຄາດໝາຍຕ່າງໆ ຢູ່ໃນແຕ່ລະທ້ອງຖິ່ນຂອງຕົນ ເພື່ອໃຫ້ບັນລຸຕາມເປົ້າໝາຍ ແລະ ຈຸດປະສົງທີ່ວາງໄວ້ ພ້ອມນັ້ນກໍຕ້ອງໄດ້ປຶກສາຫາລື ເພື່ອແກ້ໄຂບັນຫາຮ່ວມກັນ; ເອົາໃຈໃສ່ຮັກສາຄວາມສະຫງົບປອດໄພ, ຄວາມເປັນລະບຽບຮຽບຮ້ອຍຂອງສັງຄົມ ແລະ ຮັບປະກັນສະຖຽນລະພາບທາງການເມືອງ; ເອົາໃຈໃສ່ປົກປັກຮັກສາຮີດຄອງປະເພນີ, ວັດທະນະທຳອັນດີງາມ, ຂະນົບທຳນຽມທີ່ເປັນເອກະລັກ ແລະ ຄວາມເປັນມໍລະດົກຂອງແຂວງຫຼວງພະບາງ; ເອົາໃຈໃສ່ສຶກສາອົບຮົມໃຫ້ປະຊາຊົນມີສ່ວນຮ່ວມ ແລະ ເປັນເຈົ້າການໃນການຮັກສາຄວາມສະອາດ, ຄວາມເປັນລະບຽບຮຽບຮ້ອຍ ແລະ ຄວາມສວຍງາມຂອງຕົວເມືອງ; ເອົາໃຈໃສ່ໃນການປັບປຸງ ກໍ່ສ້າງພະນັກງານສືບທອດ ພ້ອມນັ້ນກໍຕ້ອງມີການສ້າງແຜນການກໍ່ສ້າງພະນັກງານຢ່າງຈະແຈ້ງ, ອັນສຳຄັນແມ່ນຕ້ອງເປັນແບບຢ່າງ ແລະ ຄວາມເປັນເຈົ້າການ; ເອົາໃຈໃສ່ໃນການປັບປຸງກົນໄກການບໍລິຫານ, ເພີ່ມທະວີຄວາມຮັບຜິດຊອບ ແລະ ມີນ້ຳໃຈເສຍສະຫຼະ ເພື່ອຮັບໃຊ້ປະຊາຊົນຢ່າງແທ້ຈິງ ສຳລັບການ ແກ້ບັນຫາການແຜ່ລະບາດຂອງຕັກກະແຕນນັ້ນ, ລັດຖະບານພວມສຸມໃສ່ປຸກລະດົມ ທຶນຮອນຈາກພາກສ່ວນຕ່າງໆໃນສັງຄົມ ນັບທັງການລະດົມທຶນຊ່ວຍເຫຼືອຈາກຕ່າງປະເທດ ເພື່ອຮ່ວມກັນແກ້ໄຂບັນຫາດັ່ງກ່າວ. ພ້ອມດຽວກັນນີ້, ອຳນາດການປົກຄອງແຂວງ, ເມືອງ ຕ້ອງເປັນເຈົ້າການລົງໃກ້ຊິດຕິດແທດ ໃຫ້ຄວາມຊ່ວຍເຫຼືອປະຊາຊົນ ຜູ້ທີ່ໄດ້ຮັບຜົນກະທົບ. ອັນສຳຄັນແມ່ນພວກເຮົາຕ້ອງສາມັກຄີກັນ ເພື່ອຕໍ່ສູ້ກັບໄພພິ ບັດທີ່ເກີດຂຶ້ນດັ່ງກ່າວ ໃຫ້ຜ່ານພົ້ນໄປດ້ວຍດີ.
ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະໄດ້ໄປຢ້ຽມຢາມ ແລະ ເຮັດວຽກຢູ່ທີ່ແຂວງຫຼວງພະ ບາງ ໃນວັນທີ 6 ສິງຫາຜ່ານມານີ້, ໂດຍມີ ທ່ານ ຄຳຂັນ ຈັນທະວີສຸກ ເລຂາພັກແຂວງ ເຈົ້າແຂວງຫຼວງພະບາງ ພ້ອມດ້ວຍຄະນະນຳຂອງແຂວງ ແລະ ພະນັກງານຫຼັກແຫຼ່ງອ້ອມຂ້າງ ພາຍໃນແຂວງໃຫ້ການຕ້ອນຮັບຢ່າງອົບອຸ່ນ.
ແຫລ່ງຂ່າວ:
