ສຳນັກຂ່າວຕ່າງປະເທດ ລາຍງານໃນວັນທີ 7 ສິງຫາຜ່ານມານີ້ວ່າ ທ່ານ ໂຣດຣິໂກ ດູເຕີເຕ ປະທານາທິບໍດີຟິລິບປິນ ຊຶ່ງກຳລັງເຮັດສົງຄາມ ກວາດລ້າງຜູ້ຄ້າຢາເສບຕິດ ໄດ້ປະກາດລາຍຊື່ຜູ້ພິພາກສາ, ຫົວໜ້າເທດສະບານ, ສະມາຊິກລັດຖະສະພາ, ຕຳຫລວດ ແລະ ທະຫານ ຈຳນວນລວມກັນກວ່າ 160 ຄົນ ຊຶ່ງຖືກກ່າວຫາວ່າ ມີສ່ວນພົວພັນກັບຢາເສບຕິດ ໂດຍທ່ານໄດ້ເຕືອນໃຫ້ບຸກຄົນເຫລົ່ານີ້ ຖ້າຫາກເປັນທະຫານ ຫລື ຕຳຫລວດ ຄວນໄປມອບຕົວ ຕໍ່ຜູ້ບັງຄັບບັນຊາຂອງຕົນໃນທັນທີ ສ່ວນຜູ້ພິພາກສາກໍຄວນໄປລາຍງານຕົວ ຕໍ່ສານສູງສຸດ. ” ຖ້າຫາກພວກທ່ານມີທ່າທີຕໍ່ຕ້ານ ໂດຍການໃຊ້ຄວາມຮຸນແຮງແມ່ນແຕ່ໜ້ອຍດຽວ ຂ້າພະເຈົ້າຈະສັ່ງໃຫ້ຕຳຫລວດ ຍິງພວກມັນທັນທີ ” ທ່ານ ດູເຕີເຕ ກ່າວຕໍ່ກັບສື່ມວນຊົນ.
ທັງນີ້ ທ່ານ ດູເຕີເຕ ຊະນະການເລືອກຕັ້ງ ໂດຍປະກາດນະໂຍບາຍ ເຮັດສົງຄາມກວາດລ້າງຢາເສບຕິດ ແລະ ອາຊະຍາກຳອື່ນໆ ຊຶ່ງທ່ານບອກວ່າ ຈະຕ້ອງມີຄົນຕາຍເປັນໝື່ນໆຊີວິດ ໂດຍແຫລ່ງຂ່າວໄດ້ລະບຸວ່າ ນັບຕັ້ງແຕ່ທ່ານໄດ້ຮັບການເລືອກຕັ້ງເປັນຕົ້ນມາ ມີຜູ້ຖືກສົງໄສຄ້າຢາເສບຕິດ ຖືກສັງຫານໄປແລ້ວ 852 ຄົນ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!