ສຳນັກຂ່າວຕ່າງປະເທດ ລາຍງານໃນວັນທີ 5 ສິງຫາຜ່ານມານີ້ວ່າ ລັດຖະບານກຳປູເຈຍ ປະກາດຂຶ້ນຄ່າທຳນຽມ ເຂົ້າຢ້ຽມຊົມຜາສາດຫີນນະຄອນວັດ ສະຖານທີ່ທ່ອງທ່ຽວທີ່ມີຊື່ສຽງຂອງກຳປູເຈຍ ເພີ່ມຂຶ້ນ 2 ເທົ່າ ນັບຕັ້ງແຕ່ເດືອນກຸມພາ 2017 ເປັນຕົ້ນໄປ ໂດຍຄ່ານຳນຽມເຂົ້າຢ້ຽມຊົມແບບ 1 ມື້ ຈະປັບເພີ່ມຂຶ້ນຈາກ 20 ໂດລາ ເປັນ 37 ໂດລາ, ແບບ 3 ມື້ ເພີ່ມຈາກ 40 ໂດລາ ເປັນ 62 ໂດລາ ແລະ ສຳລັບການເຂົ້າຢ້ຽມຊົມແບບ 7 ມື້ (ໃຊ້ໄດ້ພາຍໃນໄລຍະ 1 ເດືອນ) ຈະເພີ່ມຂຶ້ນຈາກ 60 ໂດລາ ເປັນ 72 ໂດລາ.
ຄຳຖະແຫລງຂອງລັດຖະບານກຳປູເຈຍລະບຸວ່າ ເງິນຈຳນວນ 2 ໂດລາ ທີ່ໄດ້ຈາກບັດຄ່າທຳນຽມແຕ່ລະໃບທີ່ຂາຍໄດ້ ຈະຖືກບໍລິຈາກໃຫ້ແກ່ ໂຮງໝໍເດັກກັນທາບຸບຜາ ຊຶ່ງເປີດໃຫ້ບໍລິການປິ່ນປົວຄົນເຈັບ ໂດຍບໍ່ເສຍຄ່າໃຊ້ຈ່າຍ.
ທັງນີ້ ເມື່ອປີຜ່ານມາ ມີນັກທ່ອງທ່ຽວປະມານ 2.1 ລ້ານຄົນ ເດີນທາງຢ້ຽມຢາມ ຜາສາດຫີນນະຄອນວັດ ຊຶ່ງເປັນສູນກາງອານາຈັກຂອມ ທີ່ເຮືອງອຳນາດແຕ່ໄລຍະ ສະຕະວັດທີ 9 ຈົນເຖິງຫລົ້ມສະຫລາຍໃນສະຕະວັດທີ 15 ໂດຍນະຄອນວັດ ຖືເປັນສັນຍາລັກແຫ່ງຄວາມພາກພູມໃຈຂອງກຳປູເຈຍ ແລະ ຍັງຖືກປະດັບຢູ່ເທິງທຸງຊາດຂອງປະເທດ ອີກດ້ວຍ.
ຕິດຕາມນານາສາລະ ກົດໄລຄ໌ເລີຍ!