ໃນຕອນບ່າຍ ວັນທີ 03 ສິງຫາ 2016 ຜ່ານມາ ກອງກວດກາປ່າໄມ້ ພະແນກກະສິກຳ ແລະ ປ່າໄມ້ແຂວງໄຊຍະບູລີ ໄດ້ຈັດພິທີທໍາລາຍຊິ້ນສ່ວນສັດປ່າທີ່ຫວງຫ້າມ ເຊິ່ງເປັນກຽດເຂົ້າຮ່ວມໃນພິທີມີທ່ານ ວອນ ວົງສີ  ຕາງໜ້າພະແນກກະສິກໍາ ແລະ ປ່າໄມ້ແຂວງ  ທ່ານ ແສງເພັດ ສີລິສົມບັດ ຫົວໜ້າກອງກວດກາປ່າໄມ້ແຂວງ ມີເຈົ້າໜ້າທີ່ກ່ຽວຂ້ອງເຂົ້າຮ່ວມ.

ທ່ານ ແສງຈັນ ພານຸເດດ ຮອງຫົວໜ້າກອງກວດກາປ່າໄມ້ແຂວງໄຊຍະບູລີ ໄດ້ໃຫ້ຮູ້ວ່າ ໃນວັນທີ 02 ສິງຫາ 2016 ຜ່ານມາ ທາງເຈົ້າໜ້າທີ່ປ່າໄມ້ແຂວງໄຊຍະບູລີ ໄດ້ສົມທົບກັບເຈົ້າໜ້າທີ່ປ່າໄມ້ເມືອງໄຊຍະບູລີ  ແລະ ພະນັກງານປະຈໍາຢູ່ຕະຫຼາດສີມຸງຄຸນ ລົງກວດກາ ສະກັດກັ້ນການຊື້-ຂາຍ ສັດປ່າຢູ່ຕະຫຼາດບ້ານສີມຸງຄຸນ ເມືອງໄຊຍະບູລີ ແຂວງໄຊຍະບູລີ ພົບເຫັນປະຊາຊົນຍັງສຶບຕໍ່ວາງຈຳໜ່າຍສັດປ່າທີ່ຫວງຫ້າມ ເຈົ້າໜ້າທີ່ຈິ່ງໄດ້ກວດກາຍຶດສັດປ່າໄດ້ທັງໝົດຫຼາຍກວ່າ 34 ກິໂລກຣາມ ໃນນີ້ ມີຊີ້ນຟານແຫ້ງ 14,5 ກິໂລກຣາມ ຊີ້ນໝູປ່າແຫ້ງ 15 ກິໂລກຣາມ ຊີ້ນໄກ້ແຫ້ງ ແລະ ກະຮອກແຫ້ງ 5 ກິໂລກຣາມ ຮວມມູນຄ່າ 2.500.000 ກວ່າກີບ ເຊິ່ງການກະທຳດັ່ງກ່າວ ເປັນການກະທຳຜິດຕໍ່ກົດໝາຍວ່າດ້ວຍສັດນໍ້າ ແລະ ສັດປ່າ ສະບັບເລກທີ 07/ສພຊ ລົງວັນທີ່ 24 ທັນວາ 2007.

ຂ່າວ/ພາບ: ບຸນຫຼີ  ບັນນະວົງ