ຂປລ. ຊາວ​ໜຸ່ມຜູ້​ດ້ອຍ​ໂອກາດ ຈຳນວນ 71 ຄົນ, ຍິງ 37 ຄົນ ຢູ່​ແຂວງ​ຄຳ​ມ່ວນ ​ໄດ້​ສຳ​ເລັດ​ການ​ເຂົ້າ​ຮ່ວມ​ຝຶກ​ອົບຮົມ​ວິຊາ​ຊີບ​ ​ໄລຍະ 3 ​ເດືອນ ໃນ 2 ສາຂາ ​ຄື: ສາຂາຕັດຫຍິບ ​ແລະ ສາຂາສ້ອມ​ແປງ​ກົນ​ຈັກ​ຂະໜາດ​ນ້ອຍ ​ໃນ​ທ້າຍ​ເດືອນ​ກໍລະກົດ​ຜ່ານ​ມາ. ​ເຊິ່ງສາຂາ​ຕັດ​ຫຍິບປະກອບ​ມີ 10 ຫົວ​ຂໍ້, ຮຽນພາກທິດສະດີ 40 ຊົ່ວໂມງ ແລະ ພາກປະຕິບັດ 380 ຊົ່ວໂມງ ລວມທັງໝົດ 420 ຊົ່ວໂມງ ​ແລະ​ ສາຂາສ້ອ​ມ​ແປງ​ກົນ​ຈັກ​ຂະໜາດ​ນ້ອຍ ປະກອບ​ມີ 12 ຫົວ​ຂໍ້ ຮຽນພາກທິດສະດີ 50 ຊົ່ວໂມງ ແລະ ພາກປະຕິບັດ 370 ຊົ່ວໂມງ ລວມທັງໝົດ 420 ຊົ່ວໂມງ.

ໂອກາດ​ນີ້, ທ່ານ ແກ້ວອຸດອນ ບຸດສິງຂອນ ​ເລຂາ​ຄະນະ​ບໍລິຫານ​ງານ​ຊາວ​ໜຸ່ມ ​ແຂວງຄຳ​ມ່ວນ ​ໄດ້​ເນັ້ນໜັກ​ບາງ​ບັນ​ຫາ​ໃຫ້​ສຳ​ມະ​ນາກ​ອນ ທີ່​ໄດ້​ຮັບ​ການ​ຝຶກ​ອົບຮົມ ​ຕ້ອງ​ໄດ້​ບຸກບືນ​ຕົນ​ເອງ​ ໃນ​ການ​ຊອກ​ຫາ​ວຽກ​ເຮັດ​ງານ​ທຳ ຊອກຫາ​ລາຍ​ຮັບ​ໃຫ້​ແກ່​ຕົນ​ເອງ ​ແລະ ຄອບຄົວ, ນຳ​ເອົາ​ບົດຮຽນ​ທີ່​ໄດ້​ຮຽນ​ມາ​ ໄປ​ນຳ​ໃຊ້​​​ໃຫ້​ເກີດ​ປະ​ໂຫຍ​ດ ​ເພື່ອ​ໃຫ້​ບັນລຸ​ 4 ບຸກ ຂອງ​ຊາວ​ໜຸ່ມປະຊາຊົນປະຕິວັດ​ລາວ ກໍຄື​ ບຸກທາງ​ດ້ານ​ວິຊາ​ຊີບ ​ສ້າງ​ວຽກ​ເຮັດ​ງານ​ທຳ ແລະ ພ້ອມ​ກັນ​ບຸກບືນ​ຊຸກຍູ້​ສົ່ງ​ເສີມ​ຕົນ​ເອງ​ ໃຫ້​ມີ​ຄວາມ​ຮູ້​ມີ​ຄວາມ​ສາມາດ ໃນ​ລະດັບ​ສູງ​ຂຶ້ນ ​ໄປພ້ອມ​ໆ​ກັບ​ການ​ພັດທະນາ​ຕົນ, ຄອບຄົວ, ສັງຄົມ ​ແລະ ປະ​ເທດ​ຊາດຢ່າງ​ມີ​ຈຸດ​ສຸ່ມ​ເປັນ​ກ້າວໆ.

ແຫລ່ງຂ່າວ:

ຕິດຕາມນານາສາລະ ກົດໄລຄ໌ເລີຍ!