ລັດຖະບານລາວ ສຳເລັດການປັບປຸງ 658 ໂຄງການເຊື່ອມໂຍງເຄືອຂ່າຍຄົມມະນາຄົມ – ຂົນສົ່ງໃນທີ່ສາມາດເຊື່ອມຕໍ່ 148 ເມືອງໃນ ລາວ ກັບ ປະເທດເພື່ອນບ້ານໃນເຂດລຸ່ມ ແມ່ນ້ຳຂອງໄດ້ແລ້ວ.
ທ່ານ ບຸນຈັນ ສິນທະວົງ ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ ຖະແຫຼງຢືນຢັນວ່າໃນສົກປີ 2015-2016 ນີ້ລັດຖະບານ ລາວ ໄດ້ຈັດສັນງົບປະມານໃຫ້ກະຊວງໂຍທາທິການ ແລະ ຂົນສົ່ງໃນມູນຄ່າ 400 ຕື້ກີບສຳລັບນຳໃຊ້ໃນກອງທຶນທາງ ໂດຍໃນໄລຍະທີ່ຜານມາກໍໄດ້ນຳໃຊ້ກອງທຶນດັ່ງກ່າວໄປເພື່ອການປັບປຸງໂຄງການເຄືອຂ່າຍຄົມມະນາຄົມ-ຂົນສົ່ງພາຍໃນປະເທດໄດ້ເຖິງ 658 ໂຄງການ ໃນນີ້ກໍເປັນການບູລະນະຮັກສາ ແລະ ສ້ອມແປງຂົວທາງ 528 ໂຄງການ ແລະ ການຍົກລະດັບເສັ້ນທາງຫຼວງ 30 ໂຄງການທີ່ເຊື່ອມຕໍ່ 148 ເມືອງໃນ ລາວ ກັບປະເທດໃນລຸ່ມແມ່ນ້ຳຂອງດ້ວຍກັນໄດ້ແລ້ວ.
ໂດຍໃນປະຈຸບັນນີ້ ໃນທົ່ວປະເທດລາວ ມີເສັ້ນທາງຄົມມະນາຄົມ-ຂົນສົ່ງທາງບົກຄິດເປັນໄລຍະທາງລວມເຖິງ 51,900 ກວ່າກິໂລແມັດ ທັງມີໄລຍະທາງທີ່ເພີ່ມຂຶ້ນເຖິງ 10,836 ກິໂລແມັດ ທຽບໃສ່ປີ 2010 ແລະ ຍັງເຮັດເສັ້ນທາງຄົມມະນາຄົມ-ຂົນສົ່ງດັ່ງກ່າວສາມາດເຊື່ອມຕໍ່ 148 ເມືອງໃນ 17 ແຂວງ ແລະ ນະຄອນຫຼວງວຽງຈັນ ໄດ້ຕະຫຼອດປີ ສ່ວນການເຊື່ອມໂຍງກັບປະເທດເພື່ອນບ້ານໃນລຸ່ມແມ່ນ້ຳຂອງນັ້ນຍັງແນໃສ່ການພັດທະນາໃຫ້ ລາວ ເປັນສູນການການເຊື່ອມຈອດດ້ານການຄ້າ ແລະ ບໍລິການອີກດ້ວຍ
ແຫລ່ງຂ່າວຈາກ: http://lao.voanews.com/