ຂປລ. ເມືອງຕຸ້ມລານ ແຂວງສາລະວັນ ໄດ້ປະກາດບ້ານສາມະຄີໄຊ ແລະ ບ້ານກົກມ່ວງ ເປັນບ້ານວັດທະນະທຳ ຢ່າງເປັນທາງການ ໃນວັນທີ 25 ກໍລະກົດ 2016 ນີ້, ພາຍຫລັງທີ່ໄດ້ຜ່ານການຕິດຕາມກວດກາ ແລະ ປະເມີນຜົນ ຄົບຕາມ 5 ມາດຖານ ການສ້າງບ້ານ–ຄອບຄົວວັດທະນະທຳ ເຊັ່ນ: ມີເຮືອນຢູ່ຖາວອນ, ມີອາຊີບໝັ້ນຄົງ; ຄອບຄົວມີຄວາມສາມັກຄີຖືກຕ້ອງປອງດອງ; ເອົາໃຈໃສ່ລ້ຽງລູກ ຖືກຫລັກອະນາໄມ, ສຶກສາອົບຮົມລູກເຕົ້າ ໃຫ້ເປັນຄົນຮູ້ຜູ້ດີ ແລະ ໄດ້ສຶກສາຮ່ຳຮຽນ; ການດຳລົງຊິວິດປອດໃສຂາວສະອາດ, ບໍ່ເຊື່ອຖືງົມງວາຍ, ຮັກສາວັດທະນະທຳ–ຮີດຄອງປະເພນີ ອັນດີງາມຂອງຊາດ ແລະ ນັບຖືລະບຽບກົດໝາຍ; ມີຄວາມສາມັກຄີພາຍໃນ ແລະ ພາຍນອກຢ່າງກ້ວາງຂວາງ.

ໃນພິທີຄັ້ງນີ້, ມີທ່ານ ຈັນສະໝອນ ພົມມະແສງ ເຈົ້າເມືອງໆຕຸ້ມລານ, ມີຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທຽ່ວແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ໃນໂອກາດດຽວກັນນີ້, 2 ບ້ານ ດັ່ງກ່າວ ຍັງໄດ້ຖືກປະກາດຮັບຮອງເປັນ ບ້ານສາທາລະນະສຸກແບບຢ່າງ, ບ້ານປ້ອງກັນຊາດເຂັ້ມແຂງ, ປ້ອງກັນຄວາມ ສະຫງົບດີ ແລະ ບ້ານປະຕິບັດສະເໝີພາບ–ຍິງຊາຍຕື່ມອີກ.

ແຫລ່ງຂ່າວ:

ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!