Homeວັນນະກຳເລື່ອງສັ້ນບໍ່ໄດ້ໃຈແຄບ...ແຕ່...ໃຈບໍ່ກ້ວາງພໍ

ບໍ່ໄດ້ໃຈແຄບ…ແຕ່…ໃຈບໍ່ກ້ວາງພໍ

Published on

ນີ້ກໍ່ເປັນອີກວັນໜຶ່ງທີ່ ນິດາ ມີຄວາມຮູ້ສຶກນ້ອຍໃຈໃຫ້ ສາຄອນ ແຟນໜຸ່ມຂອງລາວທີ່ຄົບກັນມາເກືອບປີ ຫຼັງ ຈາກພວກເຂົາກັບມາຈາກງານວັນເກີດຂອງ ມີນາ ເຊິ່ງເປັນເພື່ອນນິດາ ເລື່ອງລາວມີຢູ່ວ່າ

ນິດາ ແລະ ສາຄອນ ໄດ້ໄປງານວັນເກີດຂອງ ມີນາ ເຊິ່ງຈັດຢູ່ທີ່ຮ້ານຄາຣາໂອເກະແຫ່ງໜຶ່ງ ໃນຂະນະທີ່ພວກເຂົາກຳລັງສະຫຼອງວັນເກີດກັນຢ່າງມ່ວນຊື່ນນັ້ນ ກໍ່ມີໝູ່ຂອງມີນາຊື່ນາງ ພຸດ ເຊິ່ງເປັນໝູ່ຂອງ ມີນາ ແລະ ນິດາກໍ່ຮູ້ຈັກດີໃນນາມໝູ່ຂອງມີນາທີ່ເຄີຍໄປກິນດື່ມນຳກັນປະມານ 2-3 ເທື່ອ ກ່ອນທີ່ນິດາຈະມີສາຄອນເປັນແຟນ ນາງ ພຸດ ເປັນຄົນງາມໜ້າຕາດີ, ຫຸ່ນດີ ເຊິ່ງແນ່ນອນເລີຍວ່າເມື່ອ ພຸດເຂົ້າມາໃນງານກໍ່ເຮັດໃຫ້ງານລ້ຽງມີສີສັນຂຶ້ນມາທັນທີ ໂດຍສະເພາະບັນດາໜຸ່ມໆຮູ້ສຶກວ່າຈະຄຶກຄັກເປັນພິເສດ ເຊິ່ງຊາຍໜຸ່ມໃນນັ້ນກໍ່ລວມມີສາຄອນຢູ່ນຳ ສາຄອນເປັນຄົນທີ່ມີນິໄສກະລ້ອນ ໃນຍາມທີ່ຢູ່ກັບນິດາສອງຕໍ່ສອງ ສາຄອນຈະສະແດງອາການທ່າທີ ແລະ ມີຄຳເວົ້າທີ່ເຮັດໃຫ້ນິດາຮູ້ສຶກວ່າຕົນເອງເປັນຍິງທີ່ໂຊກດີທີ່ສຸດທີ່ໄດ້ສາຄອນມາເປັນແຟນ ແຕ່ເມື່ອເວລາອອກໄປສູ່ສັງຄົມພາຍນອກບໍ່ວ່າຈະໄປເບິ່ງໜັງ, ຍ່າງເລາະຊື້ເຄື່ອງ ຫຼື ໄປຊຸມແຊວກັບໝູ່ເພື່ອນ ຖ້າເຫັນສາວງາມກວ່ານິດາແລ້ວສາຄອນກໍ່ຈະປ່ຽນເປັນອີກຄົນລະຄົນທັນທີ ເພາະສາຄອນມັກຈະຫັນໄປເບິ່ງແຖມຍັງຫຼິ້ນຫູຫຼິ້ນຕາໃສ່ສາວງາມຄົນອື່ນ ແບບບໍ່ເກງໃຈເຖິງແມ່ນວ່າຈະມີນິດາຢູ່ຄຽງຂ້າງກໍ່ຕາມ ຫຼາຍຄັ້ງທີ່ນິດາຕ້ອງໄດ້ສະກິດເອົາໄວ້ ແລະ ມີຫຼາຍຄັ້ງທີ່ນິດາສະແດງອາການບໍ່ພໍໃຈໃສ່ສາຄອນ ບາງຄັ້ງນິດາກໍ່ຄຽດໃຫ້ສາຄອນຫຼາຍມື້ຈົນສາຄອນໄດ້ມາງໍ້ເອົາ ພ້ອມທັງອະທິບາຍເຫດຜົນຕ່າງໆ ແລະ ຍາມໃດກໍ່ສັນຍາກັບນິດາວ່າຈະປ່ຽນແປງ ແລະ ທຸກຄັ້ງທີ່ນິດາກໍ່ໃຫ້ອະໄພສາຄອນ ພ້ອມທັງຄິດປອບໃຈຕົວເອງສະເໝີວ່າຕົວເອງຕ້ອງຍອມຮັບພຶດຕິກຳ ຫຼື ໂຣກປະຈຳຕົວນີ້ຂອງສາຄອນໃຫ້ໄດ້ ເພື່ອຮັກສາຄວາມຮັກຂອງທັງຄູ່ເອົາໄວ້ໃຫ້ດົນທີ່ສຸດ ພ້ອມມີຄວາມຫວັງວ່າຈັກວັນໜຶ່ງສາຄອນຈະເຫັນຄວາມຮັກທີ່ຕົນມີ ແລະ ເຮັດໃຫ້ສາຄອນເລີກພຶດຕິກຳທີ່ເປັນຢູ່ນີ້ໄດ້ ແຕ່ສາຄອນກໍ່ສະຫງົບພຽງເວລາສັ້ນໆເທົ່ານັ້ນ ສຸດທ້າຍແລ້ວ ສາຄອນກໍ່ກັບມາເປັນນິໃສເກົ່າຄືນອີກຄັ້ງ ເໝືອນກັບນີ້ທີ່ສາຄອນພົບກັບພຸດ ໃນງານວັນເກີດຂອງມີນາ ໃນຂະນະທີ່ສາຄອນນັ່ງຢູ່ກັບນິດາຢູ່ດີໆ ບຶດໜຶ່ງ ສາຄອນກໍ່ລຸກຂຶ້ນໄປທຳຄວາມຮູ້ຈັກກັບພຸດ ແລະ ນັ່ງລົມພ້ອມທັງເຢັ້ນເຄື່ອງດື່ມໃຫ້ພຸດ ພວກເຂົາທັງສອງນັ່ງລົມກັນດ້ວຍຄວາມມ່ວນຊື່ນສີໜ້າຍິ້ມແຍ້ມແຈ່ມໃສ ແຖມຍັງຖາມພຸດວ່າຢາກກິນນັ້ນກິນນີ້ບໍ່ ຫຼື ຢາກຮ້ອງເພງຫຍັງບໍ່ ດຽວສາຄອນຈະຈັດໃຫ້ ໂດຍບໍ່ສົນໃຈຄວາມຮູ້ສຶກຂອງນິດາເລີຍ ນິດາເອງກໍ່ເບິ່ງສາຄອນ ແລະ ພຸດດ້ວຍອາລົມຫຶງຫວງເຕັມໄປດ້ວຍສາຍຕາທີ່ໂມໂຫຫຶງຫວງ ສີໜ້າຂອງນິດາບຶ້ງຕຶງ ນິດາມິດຫງຽບບໍ່ປາກກັບໃຜ ແຕ່ນິດາກໍ່ບໍ່ໂວຍວາຍລາວເຮັດໄດ້ແຕ່ນັ່ງເກັບງຳອາລົມເອົາໄວ້ພ້ອມທັງກັ້ນນຳຕາເອົາໄວ້ ນິດາພະຍາຍາມສົ່ງສັນຍານໃຫ້ສາຄອນເບິ່ງດ້ວຍການສະແດງອາລົມອອກທາງສາຍຕາໃຫ້ສາຄອນໄດ້ຮູ້ ເມື່ອເວລາຫຼຽວໜ້າມາເບິ່ງໜ້ານິດາ ທີ່ຈິງສາຄອນເອງກໍ່ຮູ້ວ່ານິດາຄົງຈະບໍ່ພໍໃຈກັບການກະທຳທີ່ລາວເຮັດແຕ່ສາຄອນກໍ່ບໍ່ສົນໃຈ ລາວຍັງຄົງສືບຕໍ່ລົມກັບນິດາຕໍ່ໄປ ຈົນຜ່ານໄປປະມານໜຶ່ງຊົ່ວໂມງສາຄອນຈິ່ງກັບມານັ່ງກັບນິດາ ແຕ່ດ້ວຍອາລົມຕອນນັ້ນເຮັດໃຫ້ນິດາຮູ້ສຶກວ່າບໍ່ຢາກຢູ່ໃນງານລ້ຽງວັນເກີດຂອງມີນາຕໍ່ໄປອີກແລ້ວເຖິງງານວັນເກີດຈະມ່ວນພຽງໃດກໍ່ຕາມ ພໍແຕ່ສາຄອນມານັ່ງລົງຂ້າງໆນິດາ ແຕ່ນິດາກໍ່ລຸກຍ່າງໄປຫາມີນາເພື່ອຄອບກັບເຮືອນກ່ອນງານເລີກ ເຊິ່ງທຳອິດມີນາກໍ່ບໍ່ຢາກໃຫ້ນິດາເມືອແຕ່ນິດາກໍ່ອ້າງເຫດຜົນຕ່າງໆນານາມາເວົ້າກັບມີນາ ຈົນມີນາຍອມໃຫ້ນິດາເມືອ ນິດາໄດ້ຍ່າງອອກໄປນອກຫ້ອງ ສາຄອນກໍ່ຍ່າງນຳອອກໄປເພື່ອດຶງນິດາກັບເຂົ້າມາໃນຫ້ອງແຕ່ນິດາບໍ່ຍອມກັບເຂົ້າຫ້ອງໄປຫາໝູ່ນຄືນ ສາຄອນພໍເດົາໄດ້ແລ້ວວ່ານິດາກຳລັງອາລົມເສຍຍ້ອນສາເຫດໃດ ທີ່ຈິງແລ້ວສາຄອນເອງກໍ່ບໍ່ທັນຢາກກັບເມື່ອເທື່ອ ແຕ່ເຫັນສະພາບເຫດການເປັນແບບນີ້ສາຄອນກໍ່ຈຳເປັນຕ້ອງກັບເຮືອນພ້ອມນິດາ ຕາມທາງເມືອສາຄອນພະຍາຍາມຖາມ ແລະ ລົມກັບນິດາແຕ່ນິດາກໍ່ບໍ່ຍອມຕອບສາຄອນພຽງແຕ່ຄຳດຽວ ເຊິ່ງມັນໄດ້ເຮັດໃຫ້ສາຄອນເກີດມີອາລົມຫງຸດງິດໃຈຮ້າຍ ພໍມາຮອດໜ້າເຮືອນນິດາກໍ່ຟ້າວລົງຈາກລົດ ແລະ ໄຂປະຕູໜ້າເຮືອນເພື່ອຈະເຂົ້າເຮືອນ ສາຄອນກໍ່ຟ້າວລົງມາຈາກລົດຍ່າງມາຫານິດາ ແລະ ໄດ້ຖາມນິດາແຕ່ນິດາກໍ່ບໍ່ຕອບ ສາຄອນເລີຍອາລົມໂມໂຫ ແລະ ໄດ້ເວົ້າຕໍ່ວ່ານິດາຕ່າງໆນານາທັງເວົ້າວ່ານິດາເປັນຄົນໃຈນ້ອຍ, ໃຈແຄບ, ຂີ້ຫຶງຫວງ ເຊິ່ງນິດາກໍ່ໄດ້ແຕ່ແນມເບິ່ງໜ້າໂດຍບໍ່ຕອບຈັກອອກມາຈັກຄຳທັງທີ່ໃນໃຈຄິດຄຳທີ່ຈະຕອບອອກມາສາລະພັດ (ຖ້າບໍ່ຮັກກໍ່ຄົງຈະບໍ່ຫຶງບໍ່ຫວງ) ແລະ ຄຳທີ່ນິດາຕອບກັບສາຄອນກ່ອນຍ່າງເຂົ້າໄປໃນເຮືອນ ຄຳທີ່ວ່າ: ຂ້ອຍບໍ່ແມ່ນຄົນໃຈນ້ອຍ! ຂ້ອຍບໍ່ແມ່ນຄົນໃຈແຄບ ແຕ່…ຫົວໃຈຂ້ອຍບໍ່ກ້ວາງພໍ! ເຮົາຈົບກັນເທົ່ານີ້ເທາະ ເມື່ອເວົ້າຈົບຄວາມຈົນເຮັດໃຫ້ສາຄອນຢືນຕົວແຂງອຶ້ງກັບຄຳເວົ້າຂອງນິດາ ແລະ ເຮັດໄດ້ພຽງຢືນເບິ່ງນິດາຍ່າງເຂົ້າໄປໃນເຮືອນເທົ່ານັ້ນ.

ເລື່ອງນີ້ຍັງມີພາກຕໍ່ ສະຫຼຸບວ່າສາຄອນ ແລະ ນິດາ ຈະຈົບຄວາມສຳພັນລົງພຽງເທົ່ານີ້ ຫຼື ບໍ່ ເຮົາຕ້ອງມາລຸ້ນກັນໃນພາກຕໍ່ຂອງເລື່ອງນີ້

 

ແຕ່ງໂດຍແອັດມິນ: ປັອກເລັກ ລາວໂພສຕ໌

 

ບົດຄວາມຫຼ້າສຸດ

ສປປ ລາວ ເຂົ້າຮ່ວມເປັນສະມາຊິກເຄືອຂ່າຍພັນທະມິດດ້ານທຸລະກິດປະຊາສຳພັນໃນອາຊີ (OAC)

ໃນວັນທີ 5 ພະຈິກ 2026 ທີ່ຜ່ານມາ, ສປປ ລາວ ໄດ້ເຂົ້າຮ່ວມການເປັນສະມາຊິກເຄືອຂ່າຍພັນທະມິດດ້ານທຸລະກິດປະຊາສຳພັນໃນອາຊີ ຫຼື One Asia Communications (OAC) ໃນເວທີປຶກສາຫາລືດ້ານການສື່ສານ...

ແກ້ໄຂຫຼາຍບັນຫາ ນະຄອນຫຼວງວຽງຈັນ ແກ້ໄຂບັນຫາຄວາມທຸກຍາກ ການຂາດແຄນຄູສອນ ການບໍລິຫານຈັດການຂີ້ເຫຍື້ອ

ກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ V ໄດ້ດໍາເນີນມາຮອດວັນທີ 13 ພະຈິກ 2026 ໄດ້ປິດລົງດ້ວຍຜົນສໍາເລັດອັນຈົບງາມ ພາຍໃຕ້ການເປັນປະທານຂອງ ທານ...

ກົດລະບຽບພາຍໃນ, ບໍ່ຈອດຊ້ອນຄັນ ຫຼື ກີດຂວາງທາງເຂົ້າ-ອອກ, ບໍ່ຈອງບ່ອນຈອດລົດສາທາລະນະດ້ວຍວັດຖຸ ແລະ ບໍ່ຫຼົບຫຼີກການຊຳລະຄ່າບໍລິການ.

ການຊອກຫາບ່ອນຈອດລົດໃນຕົວເມືອງຍັງກາຍເປັນບັນຫາທີ່ສ້າງຄວາມຫຍຸ້ງຍາກໃຫ້ແກ່ຜູ້ຂັບຂີ່ ໂດຍສະເພາະ ການຈອດລົດບໍ່ເປັນລະບຽບ, ທັງກີດຂວາງການສັນຈອນ ແລະ ສ່ຽງຕໍ່ການເກີດອຸບັດຕິເຫດ ເພື່ອແກ້ໄຂບັນຫາດັ່ງກ່າວ. ດັ່ງນັ້ນນະຄອນຫຼວງວຽງຈັນ (ນວ) ຈຶ່ງໄດ້ຮ່າງຂໍ້ຕົກລົງວ່າດ້ວຍ ການຄຸ້ມຄອງ ແລະ ພັດທະນາສະຖານທີ່ຈອດລົດ ເພື່ອວາງລະບຽບການຈອດລົດໃຫ້ເປັນລະບົບ...

ແຂວງໃດກໍພົບເຫັນໄຊສົມບູນ ກວດພົບພະນັກງານສໍ້ລາດບັງຫຼວງ 12 ຄົນມູນຄ່າເສຍຫາຍ 10 ກວ່າຕື້ກີບ

ໃນຕອນເຊົ້າວັນທີ 11 ພະຈິກ 2026 ແຂວງໄຊສົມບູນ ໄດ້ເປິດກອງປະຊຸມສະຫຼຸບຕີລາວຽກງານກວດກາ ທົ່ວແຂວງ 5 ປີ (2021-2025) ແລະ ທິດທາງແຜນການ 5 ປີ...