ທ່ານ ຟຣານຊິສ ແຕມ ລັດຖະມົນຕີເສດຖະກິດ ແລະ ການເງິນຂອງເຂດປົກຄອງພິເສດມາເກົາ ສາທາລະນະລັດປະຊາຊົນຈີນ
ອອກມາໃຫ້ສຳພາດຕໍ່ສື່ມວນຊົນ ໃນວັນອັງຄານທີ 1 ກໍລະກົດ 2014 ນີ້ວ່າ ບານໂລກປີ 2014 ທີ່ປະເທດເບຣຊິນ ສົ່ງຜົນກະທົບ
ຢ່າງຮ້າຍແຮງຕໍ່ລາຍໄດ້ ແລະ ລະບົບເສດຖະກິດໂດຍລວມຂອງມາເກົາ. ທ່ານ ແຕມ ລະບຸວ່າ ລາຍໄດ້ຈາກບ່ອນຫຼິ້ນການພະນັນ
ຖືກກົດໝາຍແລະ ທຸລະກິດກາສິໂນຂອງມາເກົາ ໄດ້ປັບຫຼຸດຢ່າງຕໍ່ເນື່ອງ ຫຼັງຈາກທີ່ລູກຄ້າສ່ວນໃຫຍ່ ຫັນເຫຄວາມສົນໃຈໄປສ່ຽງ
ໂຊກ ດ້ວຍການພະນັນໃນການແຂ່ງຂັນເຕະບານໂລກ ແທນການເຂົ້າໄປໃຊ້ບໍລິການຕູ້ເກມ, ຫຼິ້ນໄພ້ ແລະ ການພະນັນໃນຮູບ
ແບບຕ່າງໆ ຢູ່ໃນກາສິໂນຄືດັ່ງທີ່ເຄີຍເປັນມາ.
ທ່ານລັດຖະມົນຕີເສດຖະກິດ ແລະ ການເງິນຂອງມາເກົາ ຍັງເຜີຍໃຫ້ຮູ້ອີກວ່າ ລາຍໄດ້ລວມຂອງກາສິໂນທັງ 35 ແຫ່ງຂອງມາເກົາ
ຫາຍໄປເຖິງ 3,400 ລ້ານໂດລາສະຫະລັດ ຫຼື ປະມານ 27,308 ຕື້ກີບ ໃນເດືອນມິຖຸນາຜ່ານມາ ຖ້າຫາກທຽບໃສ່ກັບຊ່ວງໄລຍະ
ດຽວກັນຂອງປີກາຍນີ້.
ດ້ານນັກວິເຄາະລະບຸວ່າ ມີຄວາມເປັນໄປໄດ້ທີ່ລາຍໄດ້ລວມຂອງກາສິໂນໃນມາເກົາ ອາດປັບຕົວຫຼຸດລົງເຖິງ 6% ຕ່ຳກ່ວາທີ່ການແຂ່ງ
ຂັນບານໂລກໃນບຣາຊິນ ຈະປິດສາກລົງໃນກາງເດືອນນີ້ ແລະ ຈະສົ່ງຜົນກະທົບຕໍ່ການເຕີບໂຕທາງດ້ານເສດຖະກິດຂອງມາເກົາ
ໃນປີນີ້ ເຊິ່ງອາດຈະເຮັດໃຫ້ບໍ່ເປັນໄປຕາມເປົ້າໝາຍທີ່ກຳນົດ.