ກອງປະຊຸມເສດຖະກິດ ຈີ 20 ຮຽກຮ້ອງໃຫ້ອັງກິດສະແດງທ່າທີຈະແຈ້ງກວ່ານີ້ໃນເລື່ອງການເຈລະຈາລາອອກຈາກອີຢູ ເພາະຍິ່ງປ່ອຍໄວ້ດົນທໍ່ໃດ ເສດຖະກິດໂລກຈະຍິ່ງໄດ້ຮັບຜົນກະທົບຫຼາຍເທົ່ານັ້ນ.
ສຳນັກຂ່າວຕ່າງປະເທດລາຍງານວ່າ ທ່ານ ຮາຣຸຮິໂກະ ຜູ້ວ່າການທະນາຄານກາງຍີ່ປຸ່ນກ່າວຕໍ່ກອງປະຊຸມລັດຖະມົນຕີການເງິນ ແລະ ຜູ້ວ່າການທະນາຄານກາງຂອງກຸ່ມປະເທດເສດຖະກິດຂະໜາດໃຫຍ່ ຈີ 20 ຊຶ່ງໃນປີນີ້ຈັດຂຶ້ນຢູ່ເມືອງເສິງຕູ ທາງພາກໃຕ້ຂອງສປ ຈີນໃນທ້າຍອາທິດທີ່ຜ່ານມາວ່າ ສະຖານະການລະຫວ່າງສະຫະພາບເອີຣົບ(ອີຢູ)ກັບອັງກິດຖືເປັນປະເດັນສຳຄັນຂອງກອງປະຊຸມຈີ 20 ໃນປີນີ້ ການເຈລະຈາຍິ່ງແກ່ຍາວເວລາອອກໄປດົນທໍ່ໃດ ຈະຍິ່ງເພີ່ມຄວາມສ່ຽງແກ່ລະບົບເສດຖະກິດໂລກຫຼາຍຂຶ້ນເທົ່ານັ້ນ.
ລັດຖະມົນຕີການເງິນກຸ່ມຈີ 20 ພ້ອມປະຄອງເສດຖະກິດໂລກ ແລະ ຈະໃຊ້ເຄື່ອງມືດ້ານນະໂຍບາຍທຸກຊະນິດ ບໍ່ວ່າຈະເປັນການເງິນ, ການຄັງ ແລະ ໂຄງສ້າງ ທັງໃນແບບລາຍປະເທດ ແລະ ລົງມືຮ່ວມກັນ ເພື່ອຊຸກຍູ້ເສດຖະກິດໃຫ້ຂະຫຍາຍຕົວຢ່າງເຂັ້ມແຂງ, ຍືນຍົງ ແລະ ສົມດຸນ.