ຫຼາຍກວ່າສິບປີມາແລ້ວ ທີ່ສື່ມວນຊົນໃນເອີຣົບໄດ້ສະເໜີຂ່າວຢ່າງໃຫຍ່ວ່າ ພະພຸດທະສາດສະໜາເປັນສາດສະໜາທີ່ຈະເຕີບໂຕໄວທີ່ສຸດໃນສະໄໝສະຕະວັດທີ 21 ເພາະເຫັນວ່າກະແສຜູ້ນັບຖືເຕີບໂຕໄວຫຼາຍທັງທະວີບເອີຣົບ, ອົສຕຣາລີ ແລະອາເມລິກາເໜືອ ບໍ່ວ່າຈະເປັນຝຣັ່ງ, ເຢຍລະມັນ, ອິຕາລີ, ອັງກິດ, ສະເປັນ, ອົສຕຣາລີ ແລະອື່ນໆ ວັດວາອາຮາມກໍເກີດຂຶ້ນມາຢ່າງຕໍ່ເນື່ອງ ຄົນເປັນໂຕຕັ້ງໂຕຕີໃນການນຳເອົາພຸດທະສາດສະໜາເຂົ້າສູ່ປະເທດຝຣັ່ງເຫຼົ່ານີ້ແຕ່ໃດໆມາ ສ່ວນຫຼາຍແລ້ວນັບຖືສາດສະໜາຄຣິສມາກ່ອນ ແລະກະແສຊາວຄຣິສຫັນມານັບຖືພະພຸດທະສາດສະໜານີ້ກໍກໍ່ໂຕຂຶ້ນຢ່າງຕໍ່ເນື່ອງມາຕັ້ງແຕ່ສະຕະວັດທີ 19 ປະເທດເອີຣົບບາງແຫ່ງ ເຊັ່ນ ອິຕາລີ ໄດ້ມີການປ່ຽນແປງລັດຖະທຳມະນູນ ຍົກພະພຸດທະສາດສະໜາໃຫ້ເປັນໜຶ່ງໃນສາດສະໜາສຳຄັນຂອງຊາດ ບໍ່ຕ່າງຫຍັງກັບສາດສະໜາຄຣິສ.
(ປັດຈຸບັນອິຕາລີໄດ້ຮັບຮອງສະຖານະພຸດທະສາດສະໜາຢ່າງເປັນທາງການ ໂດຍເມື່ອວັນທີ 20 ມີນາ 2000 ນາຍົກລັດຖະມົນຕີອິຕາລີ ໄດ້ລົງນາມຄວາມຕົກລົງກັບປະທານສະຫະພາບສະມາຄົມພຸດໃນອິຕາລີ ເພື່ອໃຫ້ພຸດທະສາດສະໜາມີສະຖານະເປັນທາງການໃນອິຕາລີ ເຮັດໃຫ້ຜູ້ເສຍພາສີສາມາດສະແດງຄວາມຈຳນົງໃຫ້ແບ່ງພາສີໃນອັດຕາ 0.8% ຂອງພາສີລາຍໄດ້ສ່ວນບຸກຄົນທີ່ຕ້ອງຊຳລະໃຫ້ແກ່ລັດຖະບານ ເພື່ອບໍລິຈາກໃຫ້ອົງກອນທາງພຸດທະສາດສະໜາໄດ້.
