ໃນຕອນເຊົ້າຂອງວັນທີ 24 ກໍລະ ກົດ 2016 ພິທີເປີດກອງປະຊຸມລັດຖະ ມົນຕີຕ່າງປະເທດອາຊຽນ ຄັ້ງທີ 49 ໄດ້ຈັດຂຶ້ນທີ່ໂຮງແຮມດອນຈັນພາເລດ ໂດຍການເຂົ້າຮ່ວມຂອງລັດຖະມົນຕີຕ່າງປະເທດອາຊຽນ, ເລຂາທິການໃຫຍ່ອາ ຊຽນ, ພັນລະຍາຂອງລັດຖະມົນຕີຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນ. ນອກຈາກນີ້, ລັດຖະມົນຕີຕ່າງປະເທດຂອງຕີມໍ ເລສເຕ, ປາປົວ ນິວກີນີ ແລະ ນອກແວ ກໍໄດ້ເຂົ້າຮ່ວມໃນນາມແຂກຂອງ ສປປ ລາວ ທີ່ເປັນປະທານອາຊຽນ.
ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດແຫ່ງ ສປປ ລາວ ໃນນາມປະທານກອງປະຊຸມລັດຖະມົນຕີຕ່າງປະເທດອາຊຽນ ໄດ້ກ່າວຕ້ອນຮັບບັນດາລັດຖະມົນຕີຕ່າງປະເທດອາຊຽນ, ເລຂາທິການໃຫຍ່ອາຊຽນ ແລະ ບັນດາຄະນະຜູ້ແທນເພື່ອເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມອື່ນໆທີ່ກ່ຽວຂ້ອງ, ໃນນີ້ ທ່ານ ສະເຫຼີມໄຊ ໄດ້ສະແດງຄວາມຂອບໃຈບັນດາປະເທດອາຊຽນ, ຄູ່ເຈລະຈາອາຊຽນ, ປະເທດເພື່ອນມິດ ແລະ ອົງການຈັດຕັ້ງພາກພື້ນ ແລະສາກົນທີ່ໄດ້ໃຫ້ການຮ່ວມມື ແລະຊ່ວຍເຫຼືອ ສປປ ລາວ ໃນການເປັນປະທານອາຊຽນພາຍໃຕ້ຄຳຂວັນ “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ” ແລະ ຜົນສຳເລັດຂອງບັນດາກອງປະຊຸມຄັ້ງນີ້ ຈະເປັນການກະກຽມອັນດີໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 28 ແລະ 29 ທີ່ຈະຈັດ ຂຶ້ນໃນເດືອນກັນຍາ 2016 ທີ່ນະຄອນຫຼວງວຽງຈັນ.
ໃນໂອກາດນີ້ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ໃຫ້ກຽດກ່າວເປີດກອງປະຊຸມ ຊຶ່ງໃນນີ້ ທ່ານໄດ້ຍົກໃຫ້ເຫັນເຖິງຄວາມ ສຳເລັດຂອງອາຊຽນໃນໄລຍະ 49 ປີ ຜ່ານມາ ໂດຍສະເພາະການປະກາດສ້າງຕັ້ງເປັນປະຊາຄົມອາຊຽນໃນວັນທີ 31 ທັນວາ 2015 ແລະ ເນັ້ນເຖິງຄວາມສຳຄັນໃນການສືບຕໍ່ຮັດແໜ້ນການຮ່ວມມືກັນພາຍໃນອາຊຽນ ແລະລະຫວ່າງອາຊຽນກັບຄູ່ຮ່ວມມືພາຍນອກເພື່ອສົ່ງເສີມ ແລະຮັດແໜ້ນປະຊາ ຄົມອາຊຽນໃຫ້ເຂັ້ມແຂງ ແລະຈະເລີນ ກ້າວໜ້າ.
ພາຍຫຼັງ ພິທີເປີດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ທ່ານ ສະເຫຼີມໄຊ ກົມມະສິດ ກໍໄດ້ນຳພາ ລັດຖະມົນຕີຕ່າງປະເທດອາຊຽນ ເຂົ້າຢ້ຽມຂ່ຳນັບພະນະທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໃນໂອກາດນີ້ ພະນະທ່ານນາຍົກລັດຖະມົນຕີໄດ້ຕີລາຄາສູງຕໍ່ບົດບາດສຳຄັນຂອງກອງປະຊຸມລັດຖະມົນຕີຕ່າງປະເທດອາຊຽນ ນັບແຕ່ອາຊຽນໄດ້ຮັບການສ້າງຕັ້ງຂຶ້ນໃນປີ 1967 ປະກອບສ່ວນເຂົ້າໃນການຊຸກຍູ້ ແລະສົ່ງເສີມການຮ່ວມມືຂອງອາຊຽນໃນຂົງເຂດຕ່າງໆ ກໍຄືການຮ່ວມມືກັບຄູ່ເຈລະນາຂອງອາຊຽນ ແລະ ຄູ່ຮ່ວມມືພາຍນອກອື່ນໆ ພາຍໃຕ້ກົນໄກທີ່ອາຊຽນ ເປັນຜູ້ລິເລີ່ມຂຶ້ນ.
ທີມາ: ເສດຖະກິດ-ສັງຄົມ