ຂປລ. ລັດຖະບານລາວ ວາງແຜນປະຕິຮູບການເກັບພາສີ-ອາກອນ ເຂົ້າງົບປະມານແຫ່ງລັດ ໃຫ້ມີປະສິດທິຜົນສູງຂຶ້ນ ແລະ ຫລຸດຜ່ອນການຮົ່ວໄຫລງົບປະມານຂອງລັດ ໃຫ້ຫລຸດໜ້ອຍຖອຍລົງ ດ້ວຍວິທີບໍ່ໃຫ້ເຈົ້າໜ້າທີ່ຮັບເງິນສົດຈາກຜູ້ປະກອບການ, ນັກທຸລະກິດ ແລະ ຊາວຄ້າ-ຂາຍຍ່ອຍອື່ນໆ ຂະນະທີ່ແຜນປະຕິຮູບດັ່ງກ່າວນີ້, ກະຊວງການເງິນ ໄດ້ບັນຈຸເຂົ້າຮ່າງແຜນງົບປະມານແຫ່ງລັດ 5 ປີ ຄັ້ງທີ 8 (2016-2020).
ເມື່ອບໍ່ດົນມານີ້, ກະຊວງການເງິນ ໄດ້ເປີດເຜີຍຢູ່ກອງປະຊຸມກວດກາ ແລະ ສະຫລຸບຕີລາຄາແຜນງົບປະມານ ແຫ່ງລັດວ່າ: ກະຊວງຕົນເອງ ໄດ້ຮ່າງແຜນງົບປະມານແຫ່ງລັດ 5 ປີຄັ້ງທີ 8 (2016-2020) ໂດຍໄດ້ສຸມໃສ່ວຽກຫັນເປັນທັນສະໄໝ ຂອງຂະແໜງການເງິນຄື: ພາສີ ຕ້ອງຍົກສູງປະສິດທິພາບ ໃນການເກັບລາຍຮັບເຂົ້າງົບປະມານ, ສືບຕໍ່ພັດທະນາ ລະບົບແຈ້ງເສຍພາສີແບບອັດຕະໂນມັດ (ອາຊີກູດາ) ແລະ ສືບຕໍ່ພັດທະນາຊຳລະພາສີ-ອາກອນ ທີ່ທັນສະໄໝ ຜ່ານບັດສະມາດ (Smartcard) ເພື່ອອໍານວຍຄວາມສະດວກ ໃຫ້ແກ່ຜູ້ເສຍ ພາສີ-ອາກອນ ທົດແທນການໃຊ້ເງິນສົດ ຜ່ານບັດຮູດເງິນຂອງ ທະນາຄານການຄ້າຕ່າງປະເທດລາວ ແລະ ໂອນເຂົ້າບັນຊີເງິນຝາກຂອງຄັງເງິນແຫ່ງຊາດ. ພ້ອມກັນນັ້ນ, ຈະໄດ້ຄົ້ນຄ້ວາປຶກສາຫາລືກັບ ທະນາຄານທຸລະກິດລັດ ເພື່ອສຶກສາຄວາມອາດສາມາດ ໃນການບໍລິການຢູ່ບັນດາດ່ານພາສີຊາຍແດນ ແລະ ຜັນຂະຫຍາຍລະບົບທັນສະໄໝດັ່ງກ່າວ ໃນຂອບເຂດທົ່ວປະເທດ ໃນປີ 2020.
ສ່ວນວຽກງານສ່ວຍສາອາກອນ ແມ່ນຈະໄດ້ສືບຕໍ່ພັດທະນາ ລະບົບແຈ້ງເສຍອາກອນ ດ້ວຍລະບົບທີ່ທັນສະໄໝ (ແຈ້ງເສຍອາກອນ ຜ່ານເວັບໄຊ, ມອບອາກອນຜ່ານລະບົບທະນາຄານ) ຢູ່ໃນ 5 ຈຸດ ຄື: ກົມສ່ວຍສາອາກອນ ນະຄອນຫລວງວຽງຈັນ, ແຂວງບໍລິຄຳໄຊ, ຄຳມ່ວນ, ສະຫວັນນະເຂດ ແລະ ແຂວງຫລວງພະບາງ. ຄາດວ່າຮອດປີ 2020 ຈະສືບຕໍ່ຜັນຂະຫຍາຍໄປແຂວງອື່ນໆ ແລະ ເຊື່ອມຕໍ່ລະຫວ່າງ ຂະແໜງສ່ວຍສາອາກອນ, ທະນາຄານ, ຄັງເງິນ ແລະ ຂະແໜງການທີ່ກ່ຽວຂ້ອງ. ການປັບປຸງກົນໄກການບໍລິການ ໃຫ້ແກ່ຜູ້ປະກອບການ ໃຫ້ສະດວກວ່ອງໄວ ເປັນຕົ້ນການບໍລິການ ໃນຂອດຕ່າງໆວ່ອງໄວຂຶ້ນ ໂດຍສະເພາະການຕໍ່ທະບຽນ, ຍື່ນບົດສະຫລຸບປະຈຳປີ ເພື່ອອອກໃບຢັ້ງຢືນການມອບພັນທະ ແລະ ການໃຫ້ການບໍລິການໃຫ້ຜູ້ປະກອບການ ດ້ານລະບຽບກົດໝາຍ ສ່ວຍສາອາກອນ ໃນຈຸດທີ່ພົວພັນເຖິງການບໍລິການປະຕູດຽວ, ພັດທະນາລະບົບການສັງລວມລາຍຮັບ ສ່ວຍສາອາກອນເຂົ້າໃນລະບົບໂປຣແກມ, ສ້າງລະບົບລາຍງານໃຫ້ມີຄວາມຖືກຕ້ອງຊັດເຈນ ແລະ ທັນເວລາ ເຊິ່ງບັນຫາທັງໝົດນັ້ນ ແມ່ນຄວາມພະຍາຍາມຂອງ ພັກ-ລັດຖະບານ ເພື່ອກ້າວລະບົບເຊື່ອມໂຍງກັບສາກົນ, ເນັ້ນໃສ່ຄຸນນະພາບ, ຄວາມໂປ່ງໃສ່, ການບໍລິການ ວ່ອງໄວຖືກຕ້ອງ ແລະ ຫລຸດການຮົ່ວໄຫລງົບປະມານຂອງລັດ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!