ໃນທີ່ນີ້ ຂໍໃຊ້ຄຳສັບ “ທຳ”ວ່າ “ທັມ” ຕາມວັດວາສາສະໜາເພິ່ນມັກໃຊ້

ໃນທາງພຸດທະສາສະໜານັ້ນ ການເຮັດບຸນທຳທານແມ່ນມີຫລາຍຢ່າງດ້ວຍກັນ ຫລາຍໆຄົນຄົງໄດ້ຍິນຄຳວ່າ “ບຸນກິລິຍາວັດຖຸ 10” ກັນມາແລ້ວ ຫລືອາດຈະບໍ່ເຄຍໄດ້ຍິນ ບາງຄົນໄດ້ຍິນໄດ້ຟັງມາ ແຕ່ວ່າບໍ່ເຂົ້າໃຈໃນຄວາມໝາຍນີ້ກໍມີ ມື້ນີ້ ພວກເຮົາມາຮຽນຮູ້ຄວາມກະຈ່າງແຈ້ງນຳກັນ.

“ບຸນກິລິຍາວັດຖຸ” ຕາມຄຳສັບພົດຈະນານຸກົມ ສະບັບປະມວນທັມຂອງພະພົມຄຸນາພອນ (ປ.ອ ປະຍຸດໂຕ) ໃຫ້ຄວາມໝາຍໄວ້ວ່າ : ແມ່ນບ່ອນຕັ້ງແຫ່ງການເຮັດບຸນ, ທາງເຮັດຄວາມດີ) ບຸນກິລິຍາວັດຖຸນັ້ນ ປະກອບໄປດ້ວຍ 10 ຢ່າງດັ່ງຕໍ່ໄປນີ້ :

1. ທານະໄມ : ເຮັດບຸນດ້ວຍການບໍລິຈາກຊັບວັດຖຸສິ່ງຂອງ ມີປັດໄຈສີ່ເປັນຕົ້ນ ແລະໃຫ້ຄວາມຮູ້ໃນຫລັກສິນທັມ, ວິຊາການ, ຄວາມຮູ້, ຄວາມສາມາດຕ່າງໆເປັນທານ.
2. ສິລະໄມ : ເຮັດບຸນດ້ວຍການຮັກສາກາຍ, ວາຈາ ແລະຈິດໃຈ ໃຫ້ຕັງຢູ່ໃນສິນກິນໃນທັມ.
3. ພາວະນາໄມ : ເຮັດບຸນດ້ວຍການພິຈາລະນາໃຫ້ເກີດຄວາມຮູ້ສະຕິປັນຍາໃນທັມ.
4. ອະປະຈາຍະນາຍະໄມ : ເຮັດບຸນດ້ວຍການສະແດງຄວາມອ່ອນນ້ອມຖ່ອມຕົນ.
5. ໄວຍາວັດຈະໄມ : ເຮັດບຸນດ້ວຍການຂົນຂວາຍແບ່ງເບົາ ສຸກ-ທຸກ.
6. ປັດຕິທານະໄມ : ເຮັບຸນດ້ວຍການແນະນຳຄົນອື່ນໃຫ້ເຮັດແຕ່ຄວາມດີ.
7. ປັດຕານຸໂມທະນາໄມ : ເຮັດບຸນດ້ວຍການໄປຮ່ວມສະແດງຄວາມຍິນດີໃນຍາມສຸກ-ທຸກ.
8. ທັມມັດສະວະນະໄມ : ເຮັດບຸນດ້ວຍການຟັງໃນສິ່ງທີ່ເປັນມົງຄຸນ.
9. ທັມມະເທສະນາໄມ : ເຮັດບຸນດ້ວຍການອົບຮົມສັ່ງສອນສິນທັມໃຫ້ແກ່ຄົນອື່ນ.
10. ທິດຖຸສຸກັມມະ : ເຮັດບຸນດ້ວຍການສະແດງຄວາມຄິດຄວາມເຫັນໃນທາງທີ່ທ່ຽງກົງ.

ເອກະສານອ້າງອີງ :

ປຶ້ມສະຖາບັນວິທະຍາສາດສັງຄົມແຫ່ງຊາດ ບັນດາສາສະໜາທີ່ຄົງຕົວຢູ່ ສ.ປ.ປ ລາວ