ການປູກພືດເປັນສິນຄ້າແຂວງ ໄຊຍະບູລີຍັງຄົງສືບຕໍ່ຂະຫຍາຍຕົວດີພໍສົມຄວນໂດຍສະເພາະແມ່ນການປູກສາ ລີ, ໝາກເດືອຍ ແລະມັນຕົ້ນອັນໄດ້ກາຍເປັນທີ່ຕ້ອງການຢ່າງຍິ່ງຂອງຕະຫຼາດພາຍໃນ ແລະຕ່າງປະເທດ ໂດຍໃນ 9 ເດືອນປີນີ້ມູນຄ່າສົ່ງອອກສິນຄ້າກະສິກຳຂອງແຂວງບັນລຸ ແລ້ວ 135,34 ຕື້ກີບ.
ຕາມຂໍ້ມູນການລາຍງານຈາກພະແນກກະສິກຳ ແລະປ່າໄມ້ ແຂວງໄຊຍະບູລີໃຫ້ຮູ້ວ່າ: ການປູກພືດເປັນສິນຄ້າທົ່ວ ແຂວງໄຊຍະບູລີ ໃນຜ່ານມາເຫັນວ່າມີການຂະຫຍາຍຕົວດີພໍສົມຄວນສ່ວນຫຼາຍພືດທີ່ເປັນຫຼັກໃນການສົ່ງອອກແມ່ນສາລີແຂງ, ໝາກເດືອຍ, ມັນຕົ້ນ ນອກຈາກນັ້ນ ຍັງມີພືດ ຕ່າງໆເຊັ່ນ: ຖົ່ວດິນ, ໝາກໂມ, ໝາກແຕງຍີ່ປຸ່ນ, ສາລີອາ ຫານສັດ, ໝາກເຜັດ ແລະຖົ່ວອື່ນໆ ອັນເນື່ອງຈາກພືດດັ່ງ ກ່າວແມ່ນມີທ່າແຮງດ້ານການຕະຫຼາດຮອງຮັບໃນລາຄາທີ່ ຊາວກະສິກອນຍອມຮັບໄດ້ ຊຶ່ງສະເເດງອອກຜົນຜະລິດລະ ດູແລ້ງຜ່ານມາ ຖົ່ວດິນຜະລິດໄດ້ 4,9 ພັນໂຕນ, ສາລີ ແຂງ ໄດ້ 3,9 ພັນໂຕນ, ໝາກໂມ 7,8 ພັນກວ່າໂຕນ ແລະຢາ ສູບ 862 ໂຕນ.
ຈາກການຂະຫຍາຍຕົວຂອງການຜະລິດດັ່ງກ່າວນັ້ນໄດ້ເຮັດໃຫ້ໃນໄລຍະ 9 ເດືອນຜ່ານມາແຂວງໄຊຍະບູລີ ສາມາດສົ່ງອອກສິນຄ້າກະສິກຳໄປຕ່າງປະເທດມີມູນຄ່າທັງໝົດ 16,91 ລ້ານໂດລາ ຫຼື ປະມານ 135,34 ຕື້ກີບ ໃນນີ້ ເດັ່ນກວ່າໝູ່ແມ່ນພືດສິນຄ້າທີ່ໄດ້ມີການເຊັນສັນຍາ SPS ເຊັ່ນ: ສາລີແຂງ 77,1 ພັນໂຕນ, ມັນຕົ້ນ 53,3 ພັນໂຕນ, ໝາກເດືອຍ 6,5 ພັນໂຕນ ແລະພືດອື່ນໆ ເຊັ່ນ: ຖົ່ວດິນ, ດອກແຂມ, ໝາກງາ, ໝາກຕາວ, ປໍສາ, ຂີ່ງພັນ, ໃບຢາສູບ ບັນດາສິນຄ້າເຫຼົ່ານີ້ແມ່ນໄດ້ສົ່ງອອກດ່ານສາ ກົນພາຍໃນແຂວງ.
ນອກຈາກນີ້ການສົ່ງອອກພືດກະສິກຳໄປຕ່າງປະເທດແລ້ວສຳລັບການລ້ຽງສັດເປັນສິນຄ້າກໍຂະຫຍາຍຕົວເຊັ່ນກັນ ພ້ອມມີປັດໃຈໃໝ່ເກີດຂຶ້ນກ້າວໄປສູ່ການລ້ຽງແບບ ເປັນຟາມ ໂດຍຂະນະນີ້ ທົ່ວແຂວງມີຟາມລ້ຽງໝູ 52 ຟາມ ມີໝູ 9,9 ພັນ ໂຕ, ຟາມລ້ຽງໄກ່ພັນໄຂ່ 32 ຟາມ ມີໄກ່ 72,3 ພັນໂຕ, ໄກ່ພັນຊີ້ນ 10 ຟາມ, ເປັດພັນໄຂ່ 4 ຟາມ, ເປັດພັນຊີ້ນ 4 ຟາມ, ມີກະຊັງປາ 103 ກະຊັງ ສາມາດສົ່ງ ອອກສັດຂາຍທັງພາຍໃນ ແລະຕ່າງ ແຂວງມີທັງໝົດ 55,9 ພັນໂຕ, ໃນນີ້ ຄວາຍ 6,7 ພັນໂຕ, ງົວ 7,1 ພັນໂຕ, ໝູ 42 ພັນກວ່າໂຕ.
ສ່ວນສິນຄ້ານຳເຂົ້າໄລຍະດຽວກັນ ແມ່ນມີໝາກໄມ້, ພືດຜັກຕ່າງໆລວມທັງ ເບ້ຍໃມ້ໃຫ້ໝາກມີມູນຄ່າທັງໝົດ 3,04 ແສນໂດລາ.
ທີ່ມາ: ເສດຖະກິດ-ສັງຄົມ