ສິງກະໂປ ແລະ ສີລັງກາເລີ່ມເຈລະຈາ ເພື່ອເຮັດຂໍ້ຕົກລົງການຄ້າເສລີລະຫວ່າງກັນຢູ່ທີ່ສິງກະໂປໃນວັນທີ 18 ກໍລະກົດທີ່ຜ່ານມາ.
ສຳນັກຂ່າວຕ່າງປະເທດລາຍງານວ່າ ລັດຖະບານສິງກະໂປ ແລະ ລັດຖະບານສີລັງກາ ເລີ່ມເຈລະຈາເພື່ອເຮັດຂໍ້ຕົກລົງການຄ້າເສລີຢູ່ທີ່ສິງກະໂປໃນວັນທີ 18 ກໍລະກົດທີ່ຜ່ານມາ ໂດຍການເຈລະຈາລວມເຖິງມາດຕະການຕ່າງໆທີ່ຈະເປີດເສລີການຄ້າໃນຂະແໜງສິນຄ້າ ແລະ ບໍລິການລວມທັງການລົງທຶນ, ທ່ານ ເອສ ອິສະວາຣານ ລັດຖະມົນຕີວ່າການກະຊວງການຄ້າ ແລະ ອຸດສາຫະກຳສິງກະໂປກ່າວວ່າ ການຊຸກຍູ້ຂອງສີລັງກາໃນການສ້າງລະບົບສາທາລະນູປະໂພກ ແລະ ພັດທະນາອຸດສາຫະກຳຂອງປະເທດ ເປີດໂອກາດສຳລັບບໍລິສັດສິງກະໂປ ທີ່ຈະເປັນຮຸ້ນສ່ວນກັບບໍລິສັດຂອງສີລັງກາ ແລະ ມີສ່ວນຮ່ວມໃນການເຕີບໂຕຂອງເສດຖະກິດປະເທດຝັ່ງມະຫາສະໝຸດອິນເດຍ, ທ່າມກາງສະພາບແວດລ້ອມທາງເສດຖະກິດບໍ່ແນ່ນອນ ສີລັງກາສະເໜີຊ່ອງທາງທີ່ດີສຳລັບບໍລິສັດສິງກະໂປ ທີ່ກຳລັງຊອກຫາໂອກາດໃນຕະຫຼາດໃໝ່.
ໃນວັນດຽວກັນນີ້ ທ່ານ ລີ ຊຽນ ລຸ້ງ ນາຍົກລັດຖະມົນຕີຂອງສິງກະໂປ ແລະ ທ່ານ ຣານິວ ວິກຳສິງ ນາຍົກລັດຖະມົນຕີຂອງສີງລັງກາ ຮ່ວມເປັນສັກຂີພະຍານໃນພິທີລົງນາມບັນທຶກຄວາມເຂົ້າໃຈ(ເອັມໂອຢູ)ລະຫວ່າງທ່ານ ເອສ ອິສະວາຣານ ລັດຖະມົນຕີວ່າການກະຊວງການຄ້າ ແລະ ອຸດສາຫະກຳສິງກະໂປກັບທ່ານ ມາລິກ ສົມວິກຳ ລັດຖະມົນຕີວ່າການກະຊວງການຄ້າສີລັງກາຢູ່ທີ່ທຳນຽບອິສຕານາຂອງສິງກະໂປ, ຊຶ່ງສີລັງກາເປັນປະເທດ ຮຸ້ນສ່ວນການຄ້າລາຍໃຫຍ່ສຸດອັນດັບທີ່ 39 ຂອງສິງກະໂປ ມູນຄ່າການຄ້າ 2 ທາງຢູ່ທີ່ 1,52 ຕື້ໂດລາສະຫະລັດ.