ໃນອະນາຄົດອັນໃກ້ນີ້ ເຫດການບໍ່ດີຕ່າງໆທີ່ເກີດຂຶ້ນ ໃນນະຄອນຫລວງວຽງຈັນ ຈະໄດ້ຮັບການບັນທຶກ ແລະ ແກ້ໄຂສະພາບໂດຍໄວ, ພາຍຫລັງລັດຖະບານ ໄດ້ອະນຸມັດໂຄງການ ຍົກລະດັບກ້ອງວົງຈອນປິດ ແລະ ສັນຍານເຕືອນໄພຕົວເມືອງ ນັບຫລາຍຮ້ອຍຈຸດ ເຊິ່ງໂຄງການດັ່ງກ່າວ ໄດ້ມີພິທີລົງນາມຈັດຕັ້ງປະຕິບັດ ໃນທ້າຍອາທິດຜ່ານມາ ລະຫວ່າງ ຮອງລັດຖະມົນຕີ ກະຊວງປ້ອງກັນຄວາມສະຫງົບ ພົນຈັດຕະວາ ສົມຫວັງ ທຳມະສິດ ແລະ ທ່ານ ລີ ຈອງ ຮວຽນ ຜູ້ບໍລິຫານ ບໍລິສັດ ໂກລດຣາກອນລາວ ຈຳກັດ.

ໂຄງການດັ່ງກ່າວ ລວມມີມູນຄ່າທັງໝົດ 28 ລ້ານໂດລາສະຫະລັດ ເຊິ່ງລວມມີການຕິດຕັ້ງ ກ້ອງວົງຈອນປິດ ແລະ ລະບົບສັນຍານເຕືອນໄພ ໃນຕົວເມືອງຕ່າງໆຂອງ ນະຄອນຫລວງວຽງຈັນ ທັງໝົດ 790 ຈຸດ, ປັບປຸງຍົກລະດັບເຄືອຂ່າຍ ໃຫ້ທັນສະໄໝ ແລະ ສາມາດເຊື່ອມຕໍ່ ລະບົບໂທລະພາບເຂົ້າກັບສູນບັນຊາ ແລະ ສະຖານີຕຳຫລວດ, ພ້ອມຍົກລະດັບຂໍ້ມູນບັນທຶກພາບ ຈາກລະບົບອານາລ໋ອກເປັນດີຈີຕອນ ແລະ ຊ່ວຍເຝິກອົບຮົມໃຫ້ພະນັກງານ ເພື່ອຄວບຄຸມບັນຊາລະບົບຕ່າງໆ ມີປະສິດທິຜົນດີຂຶ້ນ ໂດຍແມ່ນ ບໍລິສັດ ໂກລດຣາກອນ ເປັນຜູ້ລົງທຶນກ່ອນ 100% ແລ້ວລັດຖະບານຈຶ່ງຊຳລະຄືນໃຫ້ ໃນໄລຍະເວລາ 8 ປີ.

ຄາດວ່າຈະມີປະໂຫຍດຫລາຍ ໃນການຕິດຕາມ, ບັນທຶກ ແລະ ເປັນຫລັກຖານຢັ້ງຢືນ ໃນການກະທຳຜິດ, ເປັນສູນລວບລວມຂໍ້ມູນ ໃນການກວດສອບການຈະລາຈອນ, ກໍລະນີເກີດເຫດຊີງຊັບ, ລັກຊັບ, ອາຊະຍາກຳຕ່າງໆ ໃນນະຄອນຫລວງວຽງຈັນ ເພື່ອຮັບປະກັນຄວາມປອດໄພຂອງຊີວິດ ແລະ ຊັບສິນຂອງປະຊາຊົນ.

ແຫລ່ງຂ່າວ:

ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!