ປລ. ກົມປູກຝັງ ກະຊວງກະສິກຳ ແລະ ປ່າໄມ້ ຮ່ວມກັບບັນດາສະມາຊິກອາຊຽນ ຈັດກອງປະຊຸມປະຈຳປີ ກ່ຽວກັບວຽກງານການພັດທະນາ ແຜນການປະຕິບັດຍຸດທະສາດ ສຳລັບການຮ່ວມມືອາຊຽນດ້ານພືດ ຂຶ້ນໃນວັນທີ 18 ກໍລະກົດ ນີ້ ທີ່ນະຄອນຫລວງວຽງຈັນ, ໂດຍການເປັນປະທານຂອງ ທ່ານ ວິໄລສຸກ ເຄນນະວົງ ຫົວໜ້າກົມປູກຝັງ ກະຊວງກະສິກຳ ແລະ ປ່າໄມ້ ແລະ ຕາງໜ້າອົງການຈັດຕັ້ງສາກົນ ເຂົ້າຮ່ວມ.
ກອງປະຊຸມຄັ້ງນີ້, ບັນດາປະເທດສະມາຊິກອາຊຽນ ໄດ້ລາຍງານຄວາມຄືບໜ້າ ໃນການຈັດຕັ້ງປະຕິບັດ ວຽກງານຂອງແຕ່ລະປະເທດໃຫ້ກັນຊາບ, ປຶກສາຫາລືແລກປ່ຽນບົດຮຽນຮ່ວມກັນ, ຊອກຫາວິທີການແກ້ໄຂບັນຫາ ແລະ ສິ່ງກີດຂວາງຕ່າງໆ ທັງຂໍ້ສະດວກ ແລະ ຂໍ້ຫຍຸ້ງຍາກ ໃນການປະສານງານ. ສິ່ງສຳຄັນໄດ້ເນັ້ນໃສ່ປຶກສາຫາລື ກ່ຽວກັບມາດຕະຖານ ວ່າດ້ວຍຄຸນນະພາບຂອງສິນຄ້າກະສິກຳ, ຄວາມປອດໄພຂອງສິນຄ້າ, ບັນຫາສານຕົກຄ້າງຕ່າງໆ, ສັດຕູພືດ, ລະບຽບການນຳເຂົ້າ-ສົ່ງອອກ ແລະ ຈະເຮັດແນວໃດ ໃຫ້ສິນຄ້າມີການກະຈາຍຕົວ ອອກເປັນວົງກວ້າງ, ສິ່ງເອື້ອອຳນວຍໃນການກະຈາຍສິນຄ້າ, ມີຄວາມຄ່ອງຕົວໄວຂຶ້ນ ແລະ ຊອກຫາຊ່ອງທາງ ໃນການເພີ່ມມູນຄ່າຂອງສິນຄ້າ ໂດຍສະເພາະບຸລິມະສິດໃນ 10 ປະເທດອາຊຽນ ຕ້ອງເປັນອັນໜຶ່ງອັນດຽວກັນ.
ນອກຈາກນີ້, ຍັງເປັນທ່າແຮງໃຫ້ແກ່ການເຈລະຈາ ຄູ່ຮ່ວມກັບອາຊຽນເຊັ່ນ: ອາຊຽນ+3, ອາຊຽນ +6 ເຮັດໃຫ້ມີກຳລັງແຮງໃນການເຈລະຈາ ເປີດຕະຫລາດກັບ ສປ ຈີນ, ຣັດເຊຍ, ອິນເດຍ ແລະ ອີຢູ ໂດຍສະເພາະ ລາວ ໄດ້ຖືເອົາໂອກາດນີ້ ຍາດເອົາການຊ່ວຍເຫລືອທາງວິຊາການ ແລະ ເຕັກນິກຕ່າງໆ ເພື່ອພັດທະນາສິນຄ້າກະສິກຳຂອງລາວ ໃຫ້ມີຄຸນນະພາບ ທຽບກັນສາກົນ.
ແຫລ່ງຂ່າວ:
ສຳຫຼັບທ່ານທີ່ຮັກສຸຂະພາບ ຕິດຕາມເລື່ອງດີດີ ກົດໄລຄ໌ເລີຍ!