ຄວາມປອດໄພຄືສິ່ງທີ່ສຳຄັນທີ່ສຸດໃນການໃຊ້ລົດໃຊ້ຖະໜົນ ເຮົາທຸກຄົນຄວນຈະຕ້ອງມີສະຕິບໍ່ປະໝາດ ທຸກຄັ້ງໃນການໃຊ້ລົດເທິງທ້ອງຖະໜົນ ແຕ່ບາງເທື່ອຄວາມຮູ້ຄວາມເຂົ້າໃຈຕ່າງໆ ກໍໄດ້ຮັບບໍ່ເທົ່າກັນ ດັ່ງນັ້ນ, ມື້ນີ້ທີມຂ່າວລາວໂພສ ຈຶ່ງໄດ້ຄົ້ນຫາຄວາມຮູ້ກ່ຽວກັບການເຮັດວຽກຂອງຖົງລົມນິລະໄພໃນລົດ ວ່າມັນຈະເຮັດວຽກຫຼືບໍ່ ຖ້າເຮົາບໍ່ໃສ່ສາຍຮັດນິລະໄພ?

ຖົງລົມນິລະໄພ ເປັນລະບົບປ້ອງກັນໃຫ້ຜູ້ຂັບຂີ່ຫຼຸດຜ່ອນຄວາມຮຸນແຮງຈາກການຖືກກະທົບໃນຂະນະທີ່ລົດເກີດອຸບັດເຫດ ແຕ່ມີຫຼາຍເທື່ອທີ່ເຮົາມັກຈະໄດ້ຍິນຂ່າວການເສຍຊີວິດຈາກຖົງລົມນິລະໄພ ເຊິ່ງມີຫຼາຍສາເຫດ ແຕ່ຫຼັກໆ ຄືຜູ້ໂດຍສານແລະຄົນຂັບບໍ່ໃສ່ສາຍຮັດນິລະໄພ ສົ່ງຜົນໃຫ້ເມື່ອເກີດອຸບັດເຫດ ຈະເກີດແຮງທີ່ເອີ້ນວ່າ ແຮງກະທົບບວກ ທີ່ມາຈາກໂຕຄົນຂັບຫຼືຜູ້ໂດຍສານທີ່ບໍ່ໃສ່ສາຍຮັດນິລະໄພ ສະເດັນຫຼຸດຈາກເບາະຢ່າງບໍ່ມີທິດທາງແລ້ວມາຖືກແຮງກະທົບຈາກຖົງລົມນິລະໄພທີ່ລະເບີດອອກມາ ສົ່ງຜົນໃຫ້ເກີດອັນຕະລາຍເຖິງຊີວິດ.

ດ້ວຍການເກີດມີຜູ້ເສຍຊີວິດໃນລັກສະນະ ກະທົບບວກ ກັບຖົງລົມນິລະໄພ ເຮັດໃຫ້ທາງຜູ້ຜະລິດອອກແບບລະບົບຖົງລົມນິລະໄພແບບໃໝ່ຂຶ້ນ ນັ້ນຄື ຖົງລົມນິລະໄພຈະບໍ່ເຮັດວຽກຖ້າບໍ່ໃສ່ສາຍຮັດນິລະໄພ ໃນລົດຫຼາຍໆ ລຸ້ນໃນປັດຈຸບັນ ແຕ່ລົດລຸ້ນເກົ່າແລະໃໝ່ບາງລຸ້ນຖົງລົມນິລະໄພກໍຍັງເຮັດວຽກ ເຖິງແມ່ນວ່າຈະບໍ່ຮັດສາຍຮັດນິລະໄພ ເຊິ່ງການທີ່ຖົງລົມນິລະໄພຈະເຮັດວຽກຫຼືບໍ່ນັ້ນຈະເກີດຂຶ້ນເມື່ອ ເຊັນເຊີ (Sensor) ທີ່ຖືກຕິດຕັ້ງໄວ້ບໍລິເວນຕ່າງໆ ຂອງລົດຖືກແຮງກະທົບທີ່ມີຄວາມຮຸນແແຮງຫຼາຍຈົນສົ່ງຜົນໃຫ້ເຊັນເຊີ ສັ່ງການໃນຖົງລົມນິລະໄພ ເຮັດວຽກທັນທີ ໃນທາງກົງກັນຂ້າມ ຖ້າການກະທົບມີຄວາມຮຸນແຮງທີ່ໜ້ອຍເຊັ່ນຂັບລົດຕຳກັນຄ່ອຍໆ ເຊັນເຊີ ກໍຈະບໍ່ສັ່ງການໃຫ້ຖົງລົມນິລະໄພເຮັດວຽກ.

ຮູ້ຈັ່ງຊີ້ແລ້ວເຮົາຈຶ່ງຄວນຮັດສາຍຮັດນິລະໄພທຸກຄັ້ງໃນການຂັບລົດເພື່ອປ້ອງກັນເຫດທີ່ບໍ່ຄາດຝັນ ເຖິງແມ່ນການຕຳຈະບໍ່ໄດ້ຮຸນແຮງຈົນສົ່ງຜົນໃຫ້ຖົງລົມນິລະໄພເຮັດວຽກ ແຕ່ເຮົາກໍຈະປອດໄພຈາການທີ່ເຮົາຮັດສາຍຮັດນິລະໄພ ແລະຖ້າຖົງລົມນິລະໄພເຮັດວຽກ ເຮົາກໍຈະບໍ່ກະທົບກັບຖົງລົມນິລະໄພແຮງ ຍ້ອນວ່າເຮົາຮັດສາຍຮັດນິລະໄພນັ້ນເອງ. ແລະຫວັງວ່າບົດຄວາມນີ້ຈະສ້າງປະໂຫຍດແກ່ທ່ານຜູ້ອ່ານ ຢ່າລືມໃສ່ສາຍຮັດນິລະໄພທຸກຄັ້ງໃນການຂັບລົດ ແລະເຕືອນຄົນທີ່ທ່ານຮູ້ຈັກໃຫ້ຮັດສາຍຮັດນິລະໄພແດ່ເດີ.

ຂໍຂອບໃຈຂໍ້ມູນດີໆຈາກ: BoxzaRacing