ຂປລ. ​ໃນ​ໂອກາດ ວັນ​ອະນຸລັກ​ສັດ​ນ້ຳ ​ແລະ ສັດປ່າ​ແຫ່ງ​ຊາດ​ 13 ກໍລະກົດ ຫລາຍ​ທ້ອງ​ຖິ່ນ​ໃນ​ຂອບ​ເຂດ​ທົ່ວ​ປະ​ເທດ ​ໄດ້​ຈັດ​ພິທີ​ປ່ອຍປາ​ລົງ​ສູ່​ທຳ​ມະ​ຊາດ ທັງ​ນີ້​ກໍເພື່ອ​ເປັນ​ການ​ອະນຸລັກ​, ປົກ​ປັກ​ຮັກສາ​ສັດ​ນ້ຳ ບໍ່​ໃຫ້​ສູນພັນ, ​ເຮັດ​ໃຫ້​ປານາໆຊະນິດ ​ມີ​ການ​ຂະຫຍາຍຕົວ, ​ທັງ​ເປັນ​ການ​ຮັກສາ​ສະພາບ​ແວດ​ລ້ອມ​ຂອງ​ແມ່ນ້ຳ.

ສະ​ເພາະ​ເມືອງ​ສາລະ​ວັນ ໄດ້​ປ່ອຍປາ​ຢູ່​ຈຸດ​ກຸ່ມ 2 ​ແກ້ງ​ຄອງ​ຄຳ, ກຸ່ມ 6 ​ແສນ​ວັງ, ກຸ່ມ 7 ບຶງ​ຂາມ, ກຸ່ມ 8 ບຶງ​​ໄຊ, ກຸ່ມ 10 ບ້ານ​ດ່ານ, ກຸ່ມ 11 ກະຊະ​ໃຫຍ່​​, ກຸ່ມ 13 ໜອງບົວ ​ແລະ ​ບ້ານ​ທ່າ​ເມືອງ​ເຊກຸ່ມ ​ເມືອງ​ສາລະ​ວັນ ມີ​ຈຳນວນ​ປາ​ປ່ອຍ​ທັງໝົດ​ມີ ປາປາກ, ປາ​​ໄນ, ປາ​ນິນ, ປານ​ວນຈັນ ​ແລະ ປາ​ເກັດ​​ເເລບ.

ເມືອງ​ຊຳ​ເໜືອ​ ແຂວງ​ຫົວພັນ ​ໄດ້​ປ່ອຍ​ປາຈຳນວນ 14.000​ໂຕ ຢູ່ວັງ​ສະຫງວນ​ ບ້ານ​ພັນ​ໄຊ ​ແລະ ບ້ານ​ນາ​ທົ່ງ​ຈອງ​ ຕະຫລາດ​ເທສະບານ​ແຂວງ ​ໃນ​ນັ້ນ​ປະກອບ​ມີ ປາ​ໄນ, ປາ​ນິນ ​ແລະ ປາ​ກິນ​ຫຍ້າ.

ສ່ວນ​ເມືອງ​ໄຊ​ຍະ​ບູລີ ​ໄດ້​ຈັດ​ພິທີ​ປ່ອຍ​ປາ​ທັງ​ໝົດ 685.000 ໂຕ ​ໂດຍ​ໄດ້ປ່ອຍລົງໜອງຂອງປະຊາຊົນ ເພື່ອຂາຍ ເປັນສິນຄ້າ 505.000 ໂຕ, ປ່ອຍລົງສູ່ສາຍນ້ຳທຳມະຊາດ, ອ່າງໂຕງຊົນລະປະທານມີ 180.000 ໂຕ, ມີ 5 ຈຸດ ຄື: ຈຸດນ້ຳຮຸ່ງໜ້າສະໜາມຫລວງ, ຈຸດນ້ຳຮຸ່ງເຂດວັງສະຫງວນ ບ້ານສວນ-ວັງຊອຍ, ຈຸດນ້ຳຮຸ່ງວັງສະຫງວນ ບ້ານນາຕໍນ້ອຍ, ອ່າງຊົນລະປະທານນ້ຳຕຽນ ແລະ ຊົນລະປະທານອ່າງຫ້ວຍແຄນ, ​ໃນ​ນັ້ນ​ປະກອບ​ມີ ປາປາກ ແລະ ປາອິນເດຍ.