ທ່ານ ສີສຸພັນ ເທບວົງສາ ຫົວໜ້າພະແນກອຸດສາຫະກຳ-ການຄ້າແຂວງສາລະວັນ ເປີດເຜີຍໃຫ້ຮູ້ວ່າ: ການປູກມັນຕົ້ນຂອງປະຊາຊົນໃນປີນີ້ເຫັນວ່າເປັນຂະບວນກວ້າງຂວາງຟົດຟື້ນຖ້າທຽບໃສ່ປີຜ່ານມາ ໂດຍສະເພາະຢູ່ເມືອງເລົ່າງາມມີເນື້ອທີ່ເພີ່ມຂຶ້ນ 3 ເທົ່າ.
ແນວໃດກໍດີ ເພື່ອຮອງຮັບໃຫ້ແກ່ການເພີ່ມຂຶ້ນຂອງຜົນຜະລິດ ແລະຜະລິດຕະພັນມັນຕົ້ນຂອງຊາວກະສິກອນ. ໃນຜ່ານມາຂະແໜງການທີ່ກ່ຽວຂ້ອງໄດ້ເອົາໃຈໃສ່ລົງຊຸກຍູ້ ແລະເອື້ອອຳນວຍຄວາມສະດວກໃຫ້ບັນດາຫົວໜ່ວຍທຸລະກິດທີ່ເຮັດການເກັບຊື້ມັນດິບ, ມັນແຫ້ງພ້ອມເປີດກວ້າງ ແລະກວ້າງຂວາງອອກຕື່ມໂດຍສະເພາະເຂດກຸ່ມການຜະລິດໃນບັນດາເມືອງຕ່າງໆທີ່ມີທ່າແຮງມີເງື່ອນໄຂໃນການປູກມັນຕົ້ນ ຊຶ່ງເຮັດໃຫ້ການເກັບຊື້ຂອງຕົນໃຫ້ຫຼາຍກວ່າເກົ່າ, ຮັບປະກັນລາຄາທີ່ສົມເຫດສົມຜົນຕ່າງຝ່າຍຕ່າງມີປະໂຫຍດ.
ພ້ອມນີ້ຍັງໄດ້ຍົກລະດັບການຜະລິດຂອງໂຮງງານໃຫ້ສູງຂຶ້ນ. ເປີດໂອກາດໃຫ້ທຸລະກິດພາຍໃນ ແລະຕ່າງປະເທດທີ່ມີຄວາມສົນໃຈມາລົງທຶນສ້າງໂຮງງານປຸງແຕ່ງມັນຕົ້ນໃຫ້ຫຼາຍໂດຍມາຮອດຈຸບັນທົ່ວແຂວງມີ 9 ຫົວໜ່ວຍດຳ ເນີນທຸລະກິດເກັບຊື້ ແລະສົ່ງອອກມັນຕົ້ນ ໃນນັ້ນ ມີໂຮງງານຜະລິດແປ້ງມັນຕົ້ນໜຶ່ງແຫ່ງທີ່ເຮັດການເກັບຊື້ ແລະຜະລິດແປ້ງມັນຕົ້ນ.
ການຊື້-ຂາຍມັນຕົ້ນແຫ້ງສຳລັບປີ ນີ້ລາຄາບໍ່ຕ່ຳກ່ວາ 900-1.050 ກີບຕໍ່ກິໂລ. ໂດຍໃນໄລຍະ 9 ເດືອນສົກປີ 2015-2016 ສາມາດເກັບຊື້ມັນຕົ້ນແຫ້ງ ແລະສົ່ງອອກໄປຕ່າງປະເທດ 138.520 ໂຕນ, ຕະຫຼາດທີ່ສົ່ງອອກຫຼາຍກ່ວາໝູ່ແມ່ນລາຊະອານາຈັກໄທມີ 134.924 ໂຕນທຽບໃສ່ປີຜ່ານມາເພີ່ມຂຶ້ນ 3 ເທົ່າ ແລະ ສສ ຫວຽດນາມ 3.595 ໂຕນທຽບເພີ່ມຂຶ້ນ 2 ເທົ່າ.
ທີ່ມາ: ເສດຖະກິດ-ສັງຄົມ