ກອງທຶນການເງິນສາກົນ(ໄອເອັມເອຟ)ເຕືອນເສດຖະກິດຂອງອິຕາລີອາດຕົກຢູ່ໃນພາວະງຽບເຫງົາດົນເຖິງ 20 ປີ.
ຕາມຂ່າວຕ່າງປະເທດລາຍງານວ່າ ໄອເອັມເອຟອອກລາຍງານໃນວັນທີ 12 ກໍລະກົດທີ່ຜ່ານມາ ປັບຫຼຸດປະເມີນການທາງເສດຖະກິດຂອງອິຕາລີ ຊຶ່ງມີຂະໜາດໃຫຍ່ເປັນອັນດັບ 3 ໃນເອີໂຣໂຊນ ຮອງຈາກເຢຍລະມັນ ແລະ ຝຣັ່ງວ່າ ຈະເຕີບໂຕຕໍ່າກວ່າ 1% ໃນປີນີ້ ແລະ ຢູ່ລະດັບ 1% ໃນປີ 2017 ຫຼຸດລົງຈາກການຄາດຄະເນໃນເດືອນພຶດສະພາທີ່ຜ່ານມາວ່າ ຈະຢູ່ທີ່ 1,1% ໃນປີນີ້ ແລະ 1,25% ໃນປີຕໍ່ໄປ. ທັງນີ້ ໄອເອັມເອຟໃຫ້ເຫດຜົນປະກອບການປັບຫຼຸດທ່າອຽງການຂະຫຍາຍຕົວທາງເສດຖະກິດຂອງອິຕາລີວ່າ ເປັນຜົນກະທົບຕໍ່ເນື່ອງມາຈາກການລົງປະຊາມະຕິຂອງອັງກິດໃນວັນທີ 23 ມິຖຸນາທີ່ຜ່ານມາ ຊຶ່ງຍັງສ້າງຄວາມຜັນຜວນໃຫ້ກັບລະບົບເສດຖະກິດໂລກຈົນເຖິງປະຈຸບັນ ເສດຖະກິດຂອງອິຕາລີປະສົບພະວະລໍຕົວແກ່ຍາວຫຼາຍທີ່ສຸດແຫ່ງໜຶ່ງໃນພາກພື້ນ ສະຖານະການດັ່ງກ່າວຍິ່ງເພີ່ມອຸປະສັກໃຫ້ແກ່ລັດຖະບານອິຕາລີໃນການຫຼຸດຊ່ອງວ່າງຂອງພາລະໜີ້ໃນສະຖາບັນການເງິນ ທີ່ລວມກັນສູງເຖິງ 360 ຕື້ເອີໂຣໃນປະຈຸບັນ.
ນອກຈາກນີ້ ໄອເອັມເອຟປະເມີນວ່າ ຜົນຜະລິດອຸດສາຫະກຳຂອງອິຕາລີອາດຕ້ອງລໍຕົວເຖິງປີ 2025 ຈຶ່ງຈະມີປະລິມານທຽບເທົ່າກັບລະດັບໃນປີ 2008 ຊຶ່ງເປັນໄລຍະທີ່ເສດຖະກິດຂອງອິຕາລີເຕີບໂຕເຖິງຈຸດສູງສຸດກ່ອນຖົດຖອຍເພາະໄດ້ຮັບຜົນກະທົບຈາກວິກິດການເງິນໂລກ ຂະນະທີ່ຜົນຜະລິດຂອງປະເທດຮ່ວມກຸ່ມເອີໂຣໂຊນກັບອິຕາລີມີທ່າອຽງເພີ່ມຂຶ້ນ 20-25% ໃນໄລຍະເວລາດຽວກັນ ຖືເປັນຄວາມທ້າທາຍອັນຍິ່ງໃຫຍ່ສຳລັບລັດຖະບານຊຸດປະຈຸບັນ ແລະ ອະນາຄົດໃນການປະຕິຮູບເສດຖະກິດຢ່າງມີປະສິດທິພາບ ເພື່ອຫຼຸດອັດຕາການວ່າງງານ ແລະ ໜີ້ໃນສະຖາບັນການເງິນ.