ເພື່ອຄວາມເປັນ ລະບຽບຮຽບຮ້ອຍ, ຮັບປະກັນໄດ້ການເຄື່ອນ ໄຫວ ຂອງແຮງງານຕ່າງ ປະເທດໃຫ້ເຂົ້າສູ່ລະບົບ ໃນຕໍ່ໜ້າ ແລະທັງເປັນ ການປົກປ້ອງສິດ, ຜົນປະໂຫຍດຂອງແຮງງານທີ່ເຄື່ອນຍ້າຍມາເຄື່ອນໄຫວໃນນະຄອນຫຼວງວຽງຈັນ ກໍຄື ສປປ ລາວ ນັບແຕ່ວັນທີ 14 ກໍລະກົດ ນີ້ຈົນເຖິງ 14 ສິງຫາ 2016 ນະຄອນຫຼວງວຽງຈັນ ຈະຂຶ້ນທະບຽນ ແລະອອກບັດອະນຸຍາດຊົ່ວຄາວໃຫ້ແຮງງານຕ່າງປະເທດ.
ທ່ານ ນາງ ລຳພອຍ ສີອັກຄະຈັນ ຫົວໜ້າພະແນກແຮງງານ ແລະສະຫວັດ ດີການສັງຄົມ ນະຄອນຫຼວງວຽງຈັນ ໄດ້ຖະແຫຼງໃຫ້ຮູ້ບໍ່ດົນມານີ້ວ່າ: ການຂຶ້ນທະບຽນຄັ້ງນີ້ ເພື່ອຜັນຂະຫຍາຍຄຳສັ່ງ ຂອງນາຍົກລັດຖະມົນຕີ ເລກທີ 62/ນຍ, 13/11/2015 ລົງວັນທີ 13/11/2015 ເພື່ອເກັບກຳຈຳນວນຄົນຕ່າງປະເທດທີ່ມາເຄື່ອນໄຫວບໍ່ຖືກຕ້ອງຕາມຂອບ ເຂດບ້ານ, ເມືອງ ແລະນະຄອນຫຼວງວຽງຈັນ ເຮັດໃຫ້ການຕິດຕາມຄຸ້ມຄອງການເຄື່ອນໄຫວຂອງຄົນຕ່າງປະເທດ ເຂົ້າສູ່ລະບຽບກົດໝາຍ, ຊຶ່ງຜູ້ທີ່ຈະມາຂຶ້ນທະບຽນມີສອງເງື່ອນໄຂຄື: ຜູ້ປັບສະຖານະພາບ ແລະຜູ້ຊຳລະສະສາງທີ່ ເຄື່ອນໄຫວຢູ່ຕາມບັນດາຫົວໜ່ວຍການ ຜະລິດ, ທຸລະກິດ ແລະການບໍລິການ ຕ່າງໆ ຫຼື ຜູ້ອອກແຮງງານທີ່ມີຜູ້ໃຊ້ແຮງງານມາຮັບປະກັນ ເພື່ອຈະຮັບເຂົ້າເຮັດວຽກນຳຕົນເອງ ແລະຜູ້ທີ່ລົງທຶນດຳ ເນີນທຸລະກິດຄ້າຂາຍທີ່ບໍ່ຂັດກັບລະບຽບການຂອງຂະແໜງການຄ້າ ໂດຍສະເພາະແມ່ນລະບຽບກ່ຽວກັບການປະກອບອາຊີບທີ່ສະຫງວນໄວ້ໃຫ້ແກ່ພົນລະເມືອງລາວ.
ສະເພາະ ຢູ່ນະຄອນຫຼວງວຽງຈັນ (ນວ) ແມ່ນຈະເລີ່ມຈັດຕັ້ງປະຕິບັດໃນວັນທີ 14 ກໍລະກົດ ຫາວັນທີ 14 ສິງຫາ 2016 ນີ້, ໂດຍຄ່າທຳນຽມໃນການຂຶ້ນທະບຽນແມ່ນ 3 ແສນກີບຕໍ່ຄົນຕໍ່ເດືອນ, ຖ້າສິ້ນສຸດເວລາທີ່ກຳນົດໄວ້ນີ້ ແຕ່ຍັງມີຜູ້ເຄື່ອນໄຫວບໍ່ຖືກຕ້ອງ, ທາງເຈົ້າໜ້າທີ່ກ່ຽວຂ້ອງຈະໄດ້ດຳເນີນມາດຕະການທາງກົດໝາຍ, ສ່ວນສະຖານທີ່
ຂຶ້ນທະບຽນ ແລະອອກບັດອະນຸຍາດເຄື່ອນໄຫວຊົ່ວຄາວ ແມ່ນຢູ່ຫ້ອງການແຮງງານ ແລະສະຫວັດດີການສັງຄົມ
ໃນ 9 ຕົວເມືອງໃນນະຄອນຫຼວງວຽງຈັນ.
ພ້ອມດຽວກັນນັ້ນ ທ່ານ ຫົວໜ້າພະ ແນກ ຮສສ ນະຄອນຫຼວງ ຍັງຮຽກຮ້ອງ ເຖິງທຸກພາກສ່ວນໃນສັງຄົມເປັນຕົ້ນ ແມ່ນອຳນາດການປົກຄອງບ້ານໃຫ້ຈັດຕັ້ງເຜີຍແຜ່ ແລະຊຸກຍູ້ໃຫ້ຄົນຕ່າງປະ ເທດມາຂຶ້ນທະບຽນ ແລະອອກບັດອະນຸຍາດຊົ່ວຄາວຢ່າງທົ່ວເຖິງ ລວມທັງປະຊາຊົນລາວຜູ້ໃຫ້ເຊົ່າສະຖານທີ່ເຮັດທຸລະກິດ, ຄ້າຂາຍ, ໃຫ້ເຊົ່າສະຖານທີ່ພັກເຊົາ ແລະອື່ນໆ ຈົ່ງພ້ອມກັນເຂົ້າຮ່ວມໃນການຈັດຕັ້ງປະຕິບັດໃນຄັ້ງນີ້ນຳ.
ທີ່ມາ: ເສດຖະກິດ-ສັງຄົມ