ຂປລ. ຕອນເຊົ້າວັນທີ 12 ກໍລະກົດນີ້, ພະແນກສຶກສາທິການ ແລະ ກິລາ ແຂວງຫລວງພະບາງ ຈັດຂະບວນຍ່າງເພື່ອສຸຂະພາບ ເພື່ອສະເຫລີມສະຫລອງ ວັນສ້າງຕັ້ງກິລາກາຍຍະກຳລາວ ຄົບຮອບ 50 ປີ(13 ກໍລະກົດ), ວັນຄ້າຍວັນເກີດຂອງປະທານສຸພານຸວົງ ຄົບຮອບ 107 ປີ, ວັນໂອແລມປິກແຫ່ງຊາດລາວ ( 25 ທັນວາ) ຄົບຮອບ 38 ປີ ແລະ ວັນໂອແລມປິກສາກົນ (23 ມິຖຸນາ) ຄົບຮອບ 122 ປີ. ໂດຍເລີ່ມແຕ່ພະແນກ ສຶກສາທິການ ແລະ ກິລາແຂວງ ໄປຕາມເສັ້ນທາງ ເລກທີ 13 ແລ້ວເຂົ້າສູ່ເສັ້ນທາງສຸພານຸວົງ ຈາກນັ້ນ ກໍໄດ້ເຂົ້າວາງກະຕ່າດອກໄມ້ ຢູ່ອານຸສາວະລີ ປະທານສຸພານຸວົງ.
ເຂົ້າຮ່ວມກິດຈະກຳຄັ້ງນີ້ ມີທ່ານ ຄໍາຫລ້າ ລຽນປະດິດ ຫົວໜ້າຄະນະໂຄສະນາອົບຮົມແຂວງ, ມີຄະນະພະແນກ ສຶກສາທິການ ແລະ ກິລາແຂວງ, ຫ້ອງການສຶກສາທິການ ແລະ ກິລາເມືອງ, ຕາງໜ້າຈາກພະແນກການ, ກົມກອງ, ສະຖາບັນການສຶກສາ ແລະ ປະຊາຊົນອ້ອມຂ້າງເທສະບານແຂວງ ເຂົ້າຮ່ວມຫລາຍຮ້ອຍຄົນ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!