ກະຊວງພະລັງງານ ແລະ ບໍ່ແຮ່ປະກາດແຕ່ງຕັ້ງ ທ່ານ ບຸນອູ້ມ ສີວັນເພັງ ເປັນອໍານວຍການລັດວິສາຫະກິດໄຟຟ້າລາວຄົນໃໝ່ແທນ ທ່ານ ສີສະຫວາດ ທິຣະວົງ
ສຳນັກຂ່າວສານປະເທດລາວລາຍງານວ່າ ໃນວັນທີ 11 ກໍລະກົດ 2016 ທີ່ຜ່ານມາ, ຢູ່ທີ່ຫ້ອງປະຊຸມໃຫຍ່ ລັດວິສາຫະກິດໄຟຟ້າລາວ ບ້ານ ທົ່ງກາງ ເມືອງສີສັດຕະນາກ ນະຄອນຫລວງວຽງຈັນໄດ້ມີພິທີມອບ-ຮັບ ໜ້າທີ່ຕໍາແໜ່ງລະຫວ່າງ ທ່ານ ສີສະຫວາດ ທິຣະວົງ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວຜູ້ເກົ່າ ແລະ ທ່ານ ບຸນອູ້ມ ສີວັນເພັງ ຜູ້ອຳນວຍການໃຫຍ່ ບໍລິສັດຜະລິດ-ໄຟຟ້າລາວ ມະຫາຊົນ ເປັນຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ຜູ້ໃໝ່ໂດຍອີງຕາມມະຕິຂອງນາຍຍົກລັດຖະມົນຕີແຫ່ງ ສປປລາວ, ເປັນກຽດເຂົ້າຮ່ວມໂດຍ ທ່ານ ຄໍາມະນີ ອິນທິລາດ ລັດຖະມົນຕີກະຊວງພະລັງງານ-ບໍ່ແຮ່ ມີຫົວໜ້າກົມ, ຮອງກົມ,ຄະນະອໍານວຍການ ລັດວິສາຫະກິດໄຟຟ້າລາວ, ບໍລິສັດຜະລິດ-ໄຟຟ້າລາວມະຫາຊົນ ພ້ອມພະ
ນັກງານການນຳ ແລະ ແຂກທີ່ຖືກເຊີນເຂົ້າຮ່ວມ.
ໃນໂອກາດດັ່ງກ່າວນີ້, ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ-ບໍ່ແຮ່ກໍໄດ້ໂອ້ລົມ ແລະ ຍົກໃຫ້ເຫັນເນື້ອໃນຈິດໃຈບາງຕອນວ່າ: ລັດວິສາຫະກິດໄຟຟ້າລາວ ແມ່ນເປັນຫົວໜ່ວຍທຸລະກິດທີ່ສຳຄັນຂອງລັດ ເພື່ອປະກອບສ່ວນໃນການຊຸກຍູ້ໃຫ້ກັບຂະແໜງການອື່ນໆ ດັ່ງນັ້ນ, ລັດວິສາຫະກິດໄຟຟ້າລາວ ຕ້ອງໄດ້ເອົາໃຈໃສ່ຕື່ມທຸກໜ້າທີ່ວຽກງານເຊັ່ນ: ວຽກງານການເມືອງແນວຄິດ ຕ້ອງຕິດແໜ້ນກັບວຽກງານວິຊາສະເພາະ ເພື່ອໃຫ້ບັນລຸຕາມມະຕິກອງປະຊຸມໃຫຍ່ຄັ້ງທີ່ X ຂອງພັກປະຊາຊົນປະຕິວັດລາວໄດ້ວາງໄວ້ ເພື່ອເຮັດໃຫ້ປະຊາຊົນມີລາຍໄດ້ເພີ່ມຂຶ້ນ ປະເທດຊາດຫລຸດພົ້ນອອກຈາກປະເທດທຸກຍາກເທື່ອລະກ້າວ.
ຂ່າວແລະຮູບ: ຂປລ