ຈາກການປັບຂຶ້ນຄ່າໄຟຟ້າໃນໄລຍະຜ່ານມາເຮັດໃຫ້ປະຊາຊົນຈຳນວນບໍ່ໜ້ອຍໄດ້ຮັບຜົນກະທົບ ຊຶ່ງສະພາບການດັ່ງກ່າວແມ່ນໄດ້ຮັບການແກ້ໄຂແລ້ວໃນເບື້ອງຕົ້ນແຕ່ເພື່ອເຮັດໃຫ້ປະຊາຊົນຜູ້ຊົມໃຊ້ໄຟຟ້າໃນທົ່ວປະເທດໄດ້ນຳໃຊ້ໄຟທີ່ມີລາຄາເໝາະສົມລັດຈິ່ງໄດ້ປັບປຸງຫົວໜ່ວຍລາຄາໄຟຟ້າປະເພດທີ່ຢູ່ອາໄສໃໝ່ໃຫ້ເປັນ 6 ຂັ້ນ ຈາກໄລຍະຜ່ານມາມີພຽງ 3 ຂັ້ນ.
ເມື່ອວັນທີ 7 ກໍລະກົດຜ່ານມາທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະບໍ່ແຮ່ ໄດ້ມີແຈ້ງການສະບັບເລກທີ 1182/ພບ ລົງວັນທີ 7 ກໍລະກົດ 2016 ເຖິງທ່ານຜູ້ອຳນວຍການໃຫຍ່ລັດວິສາຫະກິດໄຟຟ້າລາວເລື່ອງການປັບປຸງຫົວໜ່ວຍລາຄາໄຟຟ້າປະເພດທີ່ຢູ່ອາໄສໃໝ່ ໂດຍກະຊວງພະລັງງານ ແລະບໍ່ແຮ່ເຫັນດີໃຫ້ປັບປຸງລາຄາໄຟຟ້າຊົມໃຊ້ປະເພດຄົວເຮືອນ ຫຼື ທີ່ຢູ່ອາໄສພາຍໃນປະເທດ ໃນລະບົບຕາຂ່າຍຂອງລັດວິສາຫະກິດ ໄຟຟ້າລາວ.
ຊຶ່ງລາຄາໄຟຟ້າປະເພດຄົວເຮືອນ ຫຼື ທີ່ຢູ່ອາໄສໃນເມື່ອກ່ອນແມ່ນຄິດໄລ່ຕາມຂັ້ນໄດ 3 ຂັ້ນຄື: ໜຶ່ງລາຄາແຕ່ 0-25 ກິ ໂລວັດໂມງ(kwh) ແມ່ນ 348 ກີບຕໍ່ກິໂລວັດ ໂມງ, ສອງແຕ່ 26-150 ກິໂລວັດໂມງ 414 ກີບຕໍ່ກິໂລວັດໂມງ ແລະຂັ້ນທີສາມແຕ່ 151 ຂຶ້ນໄປແມ່ນ 999 ກີບຕໍ່ກິໂລວັດໂມງ ໂດຍປັບຈາກ 3 ຂັ້ນໃນການຄິດໄລ່ມາເປັນ 6 ຂັ້ນ ຊຶ່ງຂັ້ນທຳອິດແມ່ນ 0-25 ກິໂລວັດໂມງລາຄາ 348 ກີບຕໍ່ກິໂລວັດໂມງ, ຂັ້ນທີສອງ 26-150 ກິໂລວັດ ໂມງ 414 ກີບຕໍ່ກິໂລວັດໂມງ, ສາມ 151-300 ກິໂລວັດໂມງ 799 ກີບຕໍ່ກິໂລວັດໂມງ, ສີ່ 301-400 ກິໂລວັດໂມງ 880 ກີບຕໍ່ກິໂລວັດໂມງ, ຫ້າ 401-500 ກິໂລວັດໂມງ 965 ກີບຕໍ່ກິໂລວັດໂມງ ແລະຂັ້ນສຸດທ້າຍ 500 ກິໂລວັດໂມງຂຶ້ນໄປ ແມ່ນລາຄາ 999 ກີບຕໍ່ກິໂລວັດໂມງ ໂດຍລາຄາດັ່ງກ່າວແມ່ນເລີ່ມຈັດຕັ້ງປະຕິບັດແຕ່ເດືອນກໍລະກົດ 2016 ຫາເດືອນທັນວາ 2017, ສ່ວນອັດຕາລາຄາໄຟຟ້າປະເພດອື່ນທີ່ບໍ່ແມ່ນທີ່ຢູ່ອາໄສໃຫ້ຈັດຕັ້ງປະຕິບັດຄືເກົ່າຕາມແຈ້ງການສະບັບເລກທີ 0325/ພບ ລົງວັນທີ 9 ມີນາ 2012.
ປະຈຸບັນທົ່ວປະເທດມີເຂື່ອນ ແລະໂຮງຜະລິດໄຟຟ້າທັງໝົດ 46 ແຫ່ງ ລວມມີກຳລັງຕິດຕັ້ງທັງໝົດ 6.306 ເມກາວັດ ຊຶ່ງບໍລິສັດເອກະຊົນສົ່ງອອກໂດຍກົງ IPPO 4.410 ເມກາວັດ ແລະສົ່ງອອກພາຍໃນປະເທດ IPPd 1.267 ເມກາວັດ, ບໍລິສັດຜະລິດໄຟຟ້າມະຫາຊົນ 630 ເມກາວັດ, ເຂື່ອນຂະໜາດນ້ອຍ SPP 46,75 ເມກາວັດ ໂດຍກຳລັງດຳເນີນການກໍ່ສ້າງມີ 35 ແຫ່ງ ມີກຳລັງຕິດຕັ້ງທັງໝົດ 4.471 ເມກາວັດ ໃນນັ້ນ ປະເທດເຮົາມີທ່າແຮງທີ່ສາມາດພັດທະນາໄດ້ທັງໝົດ 26 ພັນເມກາວັດ ແລະໃນປະຈຸບັນທົ່ວປະເທດມີຈຳນວນຜູ້ຊົມໃຊ້ໄຟຟ້າທັງໝົດ 1,24 ລ້ານກວ່າໜ່ວຍກວມຫຼາຍກວ່າ 91% ຂອງຈຳນວນຄົວເຮືອນທີ່ໄດ້ຊົມໃຊ້ໄຟຟ້າເປັນປົກກະຕິໃນທົ່ວປະເທດ.
ທີ່ມາ: ເສດຖະກິດ-ສັງຄົມ