ທ່ານ ມີຈວນ ພົມເມືອງງາ ຫົວໜ້າພະແນກສ່ວຍສາອາກອນ ແຂວງຫົວພັນໃຫ້ຮູ້ວ່າ: ພະແນກສ່ວຍສາອາກອນແມ່ນພະແນກໜຶ່ງທີ່ມີສາຍຕັ້ງຂຶ້ນກັບ ກົມສ່ວຍສາອາກອນໂດຍກົງ, ມີພາລະບົດບາດເປັນເສນາທິການໃຫ້ກົມສ່ວຍສາອາກອນໃນການປະສານສົມທົບກັບພະແນກການຕ່າງໆຕາມສາຍຕັ້ງ ແລະສາຍຂວາງ ກໍຄືອົງການຈັດຕັ້ງຂັ້ນຕ່າງໆທີ່ຂຶ້ນກັບອົງການປົກຄອງທ້ອງຖິ່ນ, ພົວພັນຮ່ວມມືກັບສາກົນພາຍໃນ ແລະພາຍນອກກ່ຽວກັບການຈັດຕັ້ງເຄື່ອນໄຫວວຽກງານສ່ວຍສາອາ ກອນໃນຂອບເຂດຕົນຮັບຜິດຊອບ ຊຶ່ງໃນ 9 ເດືອນສົກປີ 2015–2016 ພະແນກສ່ວຍສາອາກອນແຂວງຫົວພັນສາມາດຈັດເກັບລາຍຮັບໄດ້ທັງໝົດ 68 ຕື້ກວ່າກີບ ຫຼື ເທົ່າກັບ 131,37%, ທຽບໃສ່ແຜນການທີ່ວາງໄວ້ 50 ຕື້ກວ່າກີບ ເຫັນວ່າສາມາດປະຕິບັດໄດ້ລື່ນແຜນແລ້ວ 16 ຕື້ກວ່າກີບ ໂດຍລາຍຮັບສ່ວນໃຫຍ່ແມ່ນໄດ້ມາຈາກການລົງທຶນກໍ່ສ້າງພື້ນຖານໂຄງລ່າງຂອງລັດເຊັ່ນ: ການຄ້າ, ການບໍລິການ ແລະການຜະລິດ ລວມ 66,74 ຕື້ກີບ ທຽບໃສ່ແຜນການ ປະຕິບັດໄດ້ 133,83% ແລະ ລາຍຮັບຈາກທີ່ດິນ 1,39 ຕື້ກີບ ທຽບໃສ່ແຜນການປະຕິບັດໄດ້ 69,91%.
ທ່ານກ່າວວ່າການຈັດເກັບລາຍຮັບ ໃນປີນີ້ເຫັນວ່າໄດ້ລື່ນແຜນທີ່ວາງໄວ້ສາເຫດຍ້ອນງົບປະມານແຫ່ງລັດໄດ້ຈ່າຍເງິນຊຳລະໂຄງການກໍ່ສ້າງພື້ນຖານໂຄງລ່າງຈຳນວນໜຶ່ງໃຫ້ບັນດາບໍລິສັດ ແລະ ຜູ້ປະກອບການທຸລະກິດໄດ້ມອບພັນທະຕາມລະບຽບກົດໝາຍ, ຍ້ອນໄດ້ຮັບການ ຮ່ວມມືຈາກຫຼາຍພາກສ່ວນທັງພາກລັດ, ພະນັກງານສ່ວຍສາອາກອນລົງຮອດທ້ອງຖິ່ນເອົາໃຈໃສ່ປະຕິບັດໜ້າທີ່ຂອງຕົນ, ໄດ້ຮັບຄວາມເອົາໃຈໃສ່ໃກ້ຊິດຕິດແທດຈາກຂັ້ນເທິງຕາມສາຍຕັ້ງ ແລະ ສາຍຂວາງໃນການຊີ້ນຳຢ່າງເປັນປົກກະຕິຕໍ່ກັບການຈັດເກັບລາຍຮັບສ່ວຍສາອາກອນ.
ສຳລັບງົບປະມານ 2015–2016 ນີ້ ພະແນກສ່ວຍສາອາກອນແຂວງຫົວພັນຈະສູ້ຊົນເກັບລາຍຮັບໃຫ້ໄດ້ທັງໝົດ 77 ຕື້ກວ່າກີບ ເມື່ອທຽບໃສ່ແຜນການປີທີ່ວາງໄວ້ 50 ຕື້ກວ່າກີບ ເຫັນວ່າຈະສາມາດເກັບໄດ້ລື່ນແຜນເຖິງ 25 ຕື້ກວ່າກີບ ຫຼື ເທົ່າກັບ 150% ຂອງແຜນການທີ່ວາງໄວ້.
ທີ່ມາ: ເສດຖະກິດ-ສັງຄົມ