ພາຍຫຼັງທີ່ສູນການຄ້າ ໄອເຕັກ ໄດ້ປະກາດເກັບຄ່າຈອດລົດ ໂດຍຈະເລິ່ມຈາກວັນທີ 4 ກໍລະກົດ 2016 ເປັນຕົ້ນໄປນັ້ນ ສື່ສັງຄົມອອນລາຍໄດ້ເຜີຍແພ່ຂ່າວດັ່ງກ່າວຢ່າງກວ້າງຂວາງ ເຊິ່ງໄດ້ສ້າງຄວາມແປກໃຈໃຫ້ກັບລູກຄ້າຫຼາຍພໍສົມຄວນ ເນື່ອງຈາກໃນໄລຍະຫຼາຍປີທີ່ຜ່ານມາ ລູກຄ້າຊາວລາວຮູ້ສຶກດີກັບການເຂົ້າທ່ຽວຊົມ ແລະຊື້-ຂາຍ ສິນຄ້າຢູ່ສູນການຄ້າດັ່ງກ່າວຢ່າງສະບາຍໃຈ ເນື່ອງຈາກສະຖານທີ່ຈອດລົດກວ້າງຂວາງ ແລະທີ່ສຳຄັນແມ່ນບໍ່ມີການເກັບຄ່າຈອດແຕ່ຢ່າງໃດ.
ດັ່ງນັ້ນ, ການປະກາດເກັບຄ່າຈອດລົດດັ່ງກ່າວ ຈຶ່ງເປັນສິ່ງທີ່ແປກໃຈ ແລະຫຼາຍຄົນກໍໃຫ້ຄຳເຫັນວ່າ ຕົນເອງຮູ້ສຶກເສຍຄວາມຮູ້ສຶກດີໆ ທີ່ເຄີຍມີຕໍ່ສູນການຄ້າລາວໄອເຕັກ ເນື່ອງຈາກເປັນຜູ້ທີ່ມັກພາຄອບຄົວເຂົ້າໄປທ່ຽວ ຈັບຈ່າຍຊື້ເຄື່ອງໃນສູນການຄ້າດັ່ງກ່າວເປັນປະຈຳ. ຕໍ່ໄປນີ້ຖ້າມີການເກັບຄ່າຈອດລົດແທ້ ກໍຄົງຕ້ອງໄດ້ພິຈາລະນາກ່ອນ ຖ້າບໍ່ມີຄວາມຈຳເປັນອິຫຼີກໍຈະບໍ່ເຂົ້າໄປ.
ຕໍ່ຫາງສຽງຂ້າງເທິງນັ້ນ, ທາງຄະນະບໍລິຫານສູນການຄ້າດັ່ງກ່າວ ຈຶ່ງໄດ້ພິຈາລະນາແລ້ວເຫັນວ່າ ການເກັບຄ່າຈອດລົດຈະກະທົບກັບລາຍໄດ້ຂອງຊາວຄ້າ-ຂາຍທີ່ມາເຊົ່າສະຖານທີ່ຂາຍເຄື່ອງ ແລະວາງສະແດງສິນຄ້າຕ່າງໆ ເນື່ອງຈາກລູກຄ້າຈະຫຼຸດລົງ. ດັ່ງນັ້ນ, ຈຶ່ງໄດ້ຕັດສິນໃຈຍົກເລີກການເກັບຄ່າຈອດລົດດັ່ງກ່າວ ໃນວັນທີ 5 ກໍລະກົດ 2016 (ໄດ້ເກັບຄ່າຈອດລົດພຽງແຕ່ມື້ດຽວ ຄືວັນທີ 4 ກໍລະກົດ 2016).
ໂດຍແຈ້ງການຍົກເລີກການເກັບເງິນຄ່າຈອດລົດ ມີດັ່ງນີ້: