ປະຈຸບັນປະເທດລາວເຮົາຖືວ່າໄດ້ເຂົ້າເປັນປະຊາຄົມເສດຖະກິດອາຊຽນ (AEC) ແລ້ວເຮັດໃຫ້ການເຂົ້າອອກປະເທດຂອງບຸກຄົນໃດໜຶ່ງມີຄວາມສະດວກສະບາຍຂຶ້ນກວ່າເກົ່າ, ຫຼ້າສຸດຫຼາຍເຂດໃນພື້ນທີ່ທົ່ວປະເທດປາກົດວ່າມີຊາວຕ່າງຊາດເຂົ້າມາເຄື່ອນເຮັດວຽກງານຫຼາຍພໍສົມຄວນ, ສະເພາະແຂວງອັດຕະປືມີທັງໝົດ 1,31 ພັນຄົນ, ໃນນີ້ແຮງງານບໍ່ຖືກຕ້ອງເປັນສ່ວນໃຫຍ່.
ວັນທີ 4 ກໍລະກົດ 2016 ທີ່ຫໍປະຊຸມໃຫຍ່ແຂວງອັດຕະປື, ພະແນກແຮງງານ ແລະສະຫວັດດີການສັງຄົມແຂວງອັດຕະປືຮ່ວມກັບກອງບັນຊາການແຂວງຈັດກອງປະຊຸມສະຫຼຸບຖອດຖອນບົດຮຽນການຈັດຕັ້ງປະຕິບັດວຽກງານແຮງງານ ແລະຄຸ້ມຄອງແຮງງານໃນການຂຶ້ນທະບຽນ ແລະອອກບັດອະນຸຍາດຊົ່ວຄາວໃຫ້ຄົນຕ່າງປະເທດທີ່ເຂົ້າມາເຄື່ອນໄຫວບໍ່ຖືກຕ້ອງຢູ່ແຂວງອັດຕະປື ໂດຍການເປັນປະທານຂອງ ທ່ານ ບຸນຄົງ ຫຼ້າສຸກກັນ ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມ, ມີຫົວໜ້າພະແນກແຮງງານ ແລະສະຫວັດດີການສັງຄົມແຂວງ, ບັນດາຮອງເຈົ້າເມືອງ, ເຈົ້າໜ້າທີ່ຈາກກຳລັງ ປກສ ແຂວງ ແລະປກສ ເມືອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ໃນວາລະດຳເນີນກອງປະຊຸມດັ່ງກ່າວຜູ້ເຂົ້າຮ່ວມໄດ້ພ້ອມກັນຕີລາຄາຄືນການຈັດຕັ້ງປະຕິບັດວຽກງານການກວດກາແຮງງານ ແລະຄຸ້ມຄອງແຮງງານໃນການຂຶ້ນທະບຽນ ແລະອອກໃບອະນຸຍາດຊົ່ວຄາວໃຫ້ຄົນຕ່າງປະເທດທີ່ມາເຄື່ອນໄຫວບໍ່ຖືກຕ້ອງຢູ່ແຂວງອັດຕະປື ຊຶ່ງຜ່ານການລົງເຄື່ອນໄຫວກວດກາຈາກພາກສ່ວນທີ່ກ່ຽວຂ້ອງໄດ້ກວດພົບແຮງງານທີ່ເຂົ້າມາເຄື່ອນໄຫວຢູ່ພາຍໃນແຂວງມີຈຳນວນ 1.317 ຄົນ, ຍິງ 516 ຄົນ, ໃນນັ້ນ ແຮງງານທີ່ຖືກຕ້ອງມີ 469 ຄົນ, ຍິງ 150 ຄົນ, ແຮງງານບໍ່ຖືກຕ້ອງມີ 848 ຄົນ, ຍິງ 366 ຄົນ ແລະໄດ້ຂຶ້ນທະບຽນໃຫ້ສຳເລັດໝົດ.
ຈາກຜົນງານທີ່ຍາດມາໄດ້ກໍຍັງມີບັນຫາຂໍ້ຫຍຸ້ງຍາກເປັນຕົ້ນຄວາມເຂົ້າໃຈຕໍ່ບັນດານິຕິກຳຕ່າງໆຂອງພະນັກງານຜູ້ປະຕິບັດແຕ່ລະຂັ້ນຍັງບໍ່ທັນໝັກແໜ້ນ, ແຮງງານຕ່າງປະເທດບາງສ່ວນຍັງບໍ່ທັນໃຫ້ການຮ່ວມມືເທົ່າທີ່ຄວນ, ພ້ອມດຽວກັນນັ້ນຍັງມີການຫຼົບຫຼີກບໍ່ໃຫ້ການຮ່ວມມື, ບໍ່ອຳນວຍຄວາມສະດວກໃນການຂຶ້ນທະບຽນ, ສະນັ້ນ ເພື່ອແກ້ໄຂບັນ ຫາດັ່ງກ່າວຜູ້ເຂົ້າຮ່ວມກອງປະຊຸມໄດ້ ພ້ອມກັນຄົ້ນຄວ້າປຶກສາຫາລືປະກອບຄຳຄິດຄຳເຫັນຢ່າງກົງໄປກົງມາ ເພື່ອເຮັດໃຫ້ວຽກງານການກວດກາແຮງງານ ແລະຄຸ້ມຄອງແຮງງານ ໂດຍສະເພາະແມ່ນວຽກງານການອະນຸຍາດຂຶ້ນ ທະບຽນຊົ່ວຄາວໃຫ້ຄົນຕ່າງປະເທດທີ່ມາເຄື່ອນໄຫວພາຍໃນແຂວງອັດຕະປື ໃຫ້ເຂົ້າສູ່ຫຼັກການ ແລະຖືກຕ້ອງຕາມລະບຽບກົດໝາຍ.
ທີ່ມາ: ເສດຖະກິດ-ສັງຄົມ