ໂຄງການກໍ່ສ້າງເຂື່ອນໄຟຟ້າເຊປ່ຽນ-ເຊນ້ຳນ້ອຍ ພາຍຫຼັງທີ່ໄດ້ເລີ່ມລົງມືຈັດຕັ້ງປະຕິບັດ ເຫັນວ່າບັນດາໜ້າວຽກພາຍໃນໂຄງການມີຄວາມຄືບໜ້າຫຼາຍດ້ານເປັນຕົ້ນ ການຈັດສັນ ແລະຊົດເຊີຍເງິນໃຫ້ຄອບຄົວທີ່ຖືກຜົນກະທົບຈາກໂຄງການ ຊຶ່ງໜ້າວຽກໂດຍລວມມາຮອດປະຈຸບັນປະຕິບັດໄດ້ 44,86% ຂອງບັນດາໜ້າວຽກທັງໝົດ.
ເມື່ອບໍ່ດົນມານີ້ ແຂວງອັດຕະປືໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານຄະນະກຳມະການຍົກຍ້າຍ-ຈັດສັນຂັ້ນແຂວງ ແລະວາງທິດທາງແຜນການ 2016-2017 ໃນເຂດໂຄງການກໍ່ສ້າງເຂື່ອນໄຟຟ້າເຊປ່ຽນ-ເຊນ້ຳນ້ອຍ ໂດຍການເປັນປະທານຂອງ ທ່ານ ສຸກສະໄໝ ຈັນທະມາດ ຮອງເຈົ້າແຂວງໆອັດຕະປື, ຮອງປະທານກຳມະການຍົກຍ້າຍ-ຈັດສັນຂັ້ນແຂວງ, ມີບັນດາທ່ານຄະນະກຳມະການຍົກຍ້າຍ-ຈັດສັນຂັ້ນແຂວງ, ຂັ້ນເມືອງ, ຫົວໜ້າໂຄງການ, ຜູ້ປະສານງານໂຄງການ ແລະຕົວແທນຈາກ 6 ບ້ານທີ່ຖືກ ຜົນກະທົບໃນເມືອງສາມັກຄີໄຊເຂົ້າຮ່ວມ.
ໂດຍໃນໄລຍະ 1 ປີຜ່ານມາ ຄະນະກຳມະການໄດ້ ເຄື່ອນ ໄຫວຈັດຕັ້ງປະຕິບັດຕາມພາລະບົດບາດໃນການຊອກທາງອອກ ແລະແກ້ໄຂບັນຫາຕ່າງໆທີ່ໄດ້ຮັບຜົນກະທົບໃນເຂດ ການກໍ່ສ້າງເຂື່ອນ ຊຶ່ງມີ 6 ບ້ານຂອງເມືອງສາມັກຄີໄຊທີ່ຖືກຜົນກະທົບ ປະກອບມີບ້ານລະຍາວເໜືອ, ລະຍາວໃຕ້, ລະຍາວກາງ, ຈຳປາວ, ແຄມຂັງ ແລະບ້ານສະເພົາທອງ ກວມເອົາ 125 ຄອບຄົວ ໂດຍໄດ້ຊົດເຊີຍເງິນຈຳນວນ 2,87 ຕື້ກວ່າກີບ ພ້ອມດຽວກັນນັ້ນ ຍັງສຳເລັດການຄິດໄລ່ມູນຄ່າຊົດເຊີຍ ແລະກະກຽມໃຫ້ແກ່ການຊົດເຊີຍໃນງວດທຳອິດ.
ນອກນີ້ ໄດ້ສຳເລັດການເກັບກຳຂໍ້ມູນຄືນເຂດແລວສາຍສົ່ງໄຟຟ້າແຮງສູງ 115 ກິໂລໂວນ ແຕ່ເຂດເຮືອນຈັກບ້ານລະຍາວໃຕ້ຫາສະຖານີໄຟຟ້າບ້ານສະເພົາທອງຢູ່ໃນຂັ້ນຕອນການຄິດໄລ່ມູນຄ່າຊົດເຊີຍ ທັງນີ້ ໂຄງການຍັງໄດ້ຖືເອົາວຽກງານການພັດທະນາສັງຄົມ ແລະ ປັບປຸງຊີວິດການເປັນຢູ່ຂອງປະຊາຊົນ ໃນເຂດທີ່ຖືກຜົນກະທົບເປັນບັນຫາສຳ ຄັນ ໂດຍປູກຈິດສຳນຶກໃຫ້ແກ່ປະຊາຊົນກ່ຽວກັບການຮັກສາສຸຂະພາບຕິດຕາມສຸຂະພາບຂອງແມ່ ແລະການຈະເລີນ ເຕີບໂຕຂອງເດັກຢ່າງເປັນປະຈຳ, ສົ່ງເສີມໃຫ້ປະຊາຊົນເຂດດັ່ງກ່າວຮັບຮູ້ການປູກ-ການລ້ຽງໃຫ້ຖືກຕາມຫຼັກວິ ຊາການ ແລະຍັງໄດ້ສ້າງຫໍວັດທະນະທຳເຮືອນເຜົ່າໂອຍ ຢູ່ບ້ານລະຍາວໃຕ້ ເພື່ອເປັນການຮັກສາມູນເຊື້ອທາງດ້ານວັດທະນະທຳ.
ແນວໃດກໍດີ ໂຄງການກໍ່ສ້າງເຂື່ອນໄຟຟ້າເຊປ່ຽນ-ເຊນ້ຳນ້ອຍຍົງໄດ້ສືກສາຄວາມເປັນໄປໄດ້ຂອງໂຄງການຊົນລະປະທານໃນເຂດໃຕ້ເຮືອນຈັກ ເພື່ອປັບປຸງຊີວິດການເປັນຢູ່ຂອງປະຊາຊົນ ໃຫ້ດີຂຶ້ນ ຊຶ່ງມາຮອດປະຈຸບັນໂຄງການກໍ່ສ້າງເຂື່ອນໄຟຟ້າເຊປ່ຽນ-ເຊນ້ຳນ້ອຍໜ້າວຽກໂດຍລວມປະຕິບັດໄດ້ 44,86% ແລະໃນຕໍ່ໜ້ານີ້ຈະໄດ້ພ້ອມກັນສືບຕໍ່ແກ້ໄຂຈຸດທີ່ຍັງຄົງຄ້າງ ແລະຂໍ້ສະເໜີຂອງປະຊາຊົນໃນເຂດທີ່ຖືກຜົນກະທົບ, ສືບຕໍ່ທົດແທນຄ່າເສຍຫາຍ ແລະປິ່ນປົວຈິດໃຈໃຫ້ແກ່ຜູ້ທີ່ຖືກຜົນກະທົບຕາມແລວກໍ່ສ້າງສາຍສົ່ງໄຟຟ້າແຮງສູງ ເພື່ອເຮັດໃຫ້ໂຄງການກໍ່ສ້າງໄດ້ດຳເນີນການກໍ່ສ້າງ ແລະສຳເລັດຕາມຄາດໝາຍທີ່ໄດ້ວາງໄວ້ ພ້ອມທັງເຮັດໃຫ້ຊີວິດການເປັນຢູ່ຂອງປະຊາຊົນທີ່ຖືກຜົນກະທົບນັ້ນມີຊີວິດການເປັນຢູ່ທີ່ດີຂຶ້ນ.
ທີ່ມາ: ນສພ ເສດຖະກິດ-ສັງຄົມ