ຂປລ. ອໍານາດ​ການ​ປົກຄອງເມືອງ​ຈອມ​ເພັດ ​ແຂວງຫລວງ​ພະ​ບາງ ​ໄດ້​ຮັບ​​ເອົາພະພຸດທະ​ຮູບຈຳນວນ​ 98 ອົງຄືນ ຈາກພະ​ແນ​ກຖະ​ແຫລ​ງຂ່າວ, ວັດທະນະ​ທໍາ ​ແລະ ທ່ອງ​ທ່ຽວ​ແຂວງ​ດັ່ງກ່າວ ​ເພື່ອ​ນໍາ​ມາປະດິດສະຖານ​ໄວ້​ ທີ່ວັດ​ຊຽງ​ແມນ ​ໄຊ​ຍະ​ເສດ​ຖາຣາມ ​ເມືອງ​ຈອມ​ເພັດ ພາຍຫລັງ​ເມືອງ​ດັ່ງກ່າວ ​ໄດ້​ມອບ​ໃຫ້​ພະ​ແນ​ກ ຖວທ ​ແຂວງ​ຫລວງ​ພະ​ບາງ​​ ໃນ​ປີ 2008 ​ເພື່ອ​ນໍາ​ໄປ​ເກັບ​ຮັກສາ​ໄວ້​ຊົ່ວຄາວ.

ພິທີມອບ​-ຮັບ​ພະພຸດທະ​ຮູບ​ຄືນດັ່ງກ່າວ, ​ໄດ້​ຈັດ​ຂຶ້ນ​ ໃນ​ວັນ​ທີ 30 ມິຖຸນາ 2016 ທີ່​ວັດ​ຊຽງ​ແມນ​ ໄຊ​ຍະ​ເສດ​ຖາຣາມ ​ເມືອງ​ຈອມ​ເພັດ ​ແຂວງ​ຫລວງ​ພະ​ບາງ​ ລະຫວ່າງ​ ອໍານາດ​ການ​ປົກຄອງເມືອງ​ຈອມ​ເ​ພັດ ​ແລະ ພະ​ແນ​ກຖະ​ແຫລ​ງຂ່າວ, ວັດທະນະ​ທໍາ ​ແລະ ທ່ອງ​ທ່ຽວ ​ເຊິ່ງຈໍານວນ​ພະພຸດທະ​ຮູບ​ທັງ​ໝົດ 98 ອົງ​ນີ້​ ປະກອບ​ມີ​: ພະ​ບຸ​ຄໍາ 1 ອົງ, ພະ​ບຸ​ເງິນ 32 ອົງ, ພະ​ໄມ້ 1 ອົງ, ພະ​ດິນ 8 ອົງ, ​ແຜ່ນ​ພະ​ບົດ 1 ​ແຜ່ນ ​ແລະ ພະ​ຊືນ 55 ອົງ.  ຕາມ​ການ​ສັນນິຖານຂອງ​ຈໍານວນພະພຸດທະຮູບ​ທັງ​ໝົດ​ ທີ່​ຄົ້ນ​ພົບ​ໃນ​ປີ 2008 ​ໄດ້​ລະບຸ​ວ່າ ອາດ​ສ້າງ​ຂຶ້ນ​ໃນ​ລະ​ຫວ່າງ​ສັດຕະວັດ​ທີ 14-16.

ທ່ານ ບົວ​ພັນ ອຸດົມ​ສິນ ຮອງ​ເຈົ້າ​ເມືອງໆ​ຈອມ​ເພັດ​ ໄດ້​ກ່າວ​ວ່າ: ການ​ມອບພະພຸດທະ​ຮູບຈໍານວນ​ດັ່ງກ່າວ ໃຫ້​ເມືອງ​ຂອງ​ຕົນ​​ ນໍາ​ມາເກັບຮັກສາໄວ້ ​ເນື່ອງ​ຈາກ​ວ່າ​ທາງ​ເມືອງມີ​ສະຖານ​ທີ່ປອດ​ໄພ, ມີ​ຄວາມ​ພ້ອມໃນ​ການ​ຄຸ້ມ​ຄອງ​ແລ້ວ. ​ ​ ພາຍຫລັງ​ທີ່​ພວກ​ເຮົາ​ພົບ​ເຫັນ​ພະພຸດທະ​ຮູບ ​​ໃນ​ປີ 2008 ຜ່ານ​ມາ, ​ແຕ່ທາງ​ເມືອງຂອງ​ພວກ​ເຮົາ​ ບໍ່​ມີ​ສະຖານ​ທີ່​ປະດິດສະຖານ​ ເພື່ອ​ເກັບ​ຮັກສາ​ໄວ້​ ​ແລະ ມີ​ຄວາມ​ສ່ຽງ​ທີ່​​ເຮັດ​ໃຫ້​ກຸ່ມ​ຄົນ​ບໍ່​ດີລັກ​​ເອົາ​ໄປ. ສະ​ນັ້ນ​, ຈຶ່ງ​ມອບ​ໃຫ້​ພະ​ແນ​ກຖະ​ແຫລ​ງຂ່າວ, ວັດທະນະ​ທໍາ ​ແລະ ທ່ອງ​ທ່ຽວ ​ແຂວງ​ຫລວງ​ພະ​ບາງ​ ນໍາ​ເອົາ​ເກັບ​ຮັກ​ໄວ້​ເປັນ​ການ​ຊົ່ວ​ຄາວ ​​ແຕ່​ປັດຈຸບັນ​ພວກ​ເຮົາ​ຕ້ອງ​ນໍາ​ກັບ​ຄືນ​ມາ​ບ່ອນ​ເກົ່າ ​ເນື່ອງ​ຈາກ​ວ່າ​ພວກ​ເຮົາ​ມີ​ຄວາມ​ພ້ອມ​ແລ້ວ.

ແຫລ່ງຂ່າວ:

ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!