ສຳນັກຂ່າວຣອຍເຕີ້ ລາຍງານໃນວັນທີ 4 ກໍລະກົດນີ້ວ່າ ລັດຖະບານຕວກກີ ໄດ້ຍື່ນຂໍ້ສະເໜີເພື່ອຮ່ວມມືກັບຣັດເຊຍ ໃນການປາບປາມກຸ່ມລັດອິດສະລາມ ຫລື ໄອເອັສ ໃນປະເທດຊີຣີ ໂດຍຈະເປີດຖານທັບອາກາດອິນເຊີລິກ ໃຫ້ກອງທັບຣັດເຊຍໃຊ້ງານ ຕາມການລະບຸຂອງ ທ່ານ ເມບລຸດ ຄາວູໂຊກລູ ລັດຖະມົນຕີກະຊວງການຕ່າງປະເທດຕວກກີ ເມື່ອວັນອາທິດທີ 3 ກໍລະກົດຜ່ານມາ.

ການຍື່ນຂໍ້ສະເໜີດັ່ງກ່າວນີ້ ຖືເປັນຄວາມພະຍາຍາມຂອງຕວກກີ ທີ່ຈະຟື້ນຟູຄວາມສຳພັນກັບຣັດເຊຍ ພາຍຫລັງທີ່ຜູ້ນຳຕວກກີ ໄດ້ສະແດງຄວາມເສຍໃຈຕໍ່ກໍລະນີເຮືອບິນທະຫານຕວກກີ ຍິງເຮືອບິນທະຫານ Su-24 ຂອງຣັດເຊຍຕົກ ຢູ່ບໍລິເວນຊາຍແດນຕິດກັບປະເທດຊີຣີ ເມື່ອເດືອນພະຈິກປີກາຍນີ້.

ທັງນີ້ ຖານທັບອາກາດອິນເຊີລິກ ເປັນຖານທັບອາກາດທີ່ລັດຖະບານຕວກກີ ໄດ້ອະນຸຍາດໃຫ້ເຮືອບິນທະຫານຂອງ ສະຫະລັດອາເມຣິກາ, ເຢຍລະມັນ, ສະຫະຣາຊະອານາຈັກ, ອາຣັບບີ ຊາອຸດິດ ແລະ ກາຕ້າ ຕ່າງກໍໃຊ້ຖານທັບດັ່ງກ່າວ ຮ່ວມກັນໃນການປະຕິບັດການໂຈມຕີທາງອາກາດ ໃສ່ກຸ່ມລັດອິດສະລາມຢູ່ປະເທດຊີຣີ ຊຶ່ງແນ່ນອນ ບັນດາປະເທດເພື່ອນມິດດັ່ງກ່າວ ອາດຮູ້ສຶກບໍ່ຄ່ອຍດີ ຕໍ່ກັບທ່າທີຂອງຕວກກີ ທີ່ສະເໜີໃຫ້ຣັດເຊຍ ມາໃຊ້ຖານທັບອາກາດຮ່ວມກັນ.

ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!