ເຈົ້າໜ້າທີ່ອົດສະຕຣາລີກ່າວວ່າ ຊາຍຊາວມາເລເຊຍຢູ່ໃນກຸ່ມຊາຍ 8 ຄົນທີ່ຖືກຕັ້ງຂໍ້ຫາຖານຄອບຄອງຢາໄອສ ມູນຄ່າ 206 ລ້ານໂດລາສະຫະລັດ ໃນອົດສະຕຣາລີ.
ສຳນັກງານກວດຄົນເຂົ້າເມືອງ ແລະ ປ້ອງກັນຊາຍແດນອົດສະຕຣາລີ ຖະແຫລງວ່າ ເຈົ້າໜ້າທີ່ໄດ້ຮັບແຈ້ງເບົາແສແລະພົບຢາໄອສນໍ້າໜັກປະມານ 275 ກິໂລກຣາມເຊື່ອງໄວ້ໃນຕູ້ສິນຄ້າ ໂດຍມີຈຸດໝາຍນຳສົ່ງໄປຍັງທີ່ຢູ່ແຖວການຄ້າໃນນະຄອນຫລວງເມລເບີນ ຈົນນຳໄປສູ່ການຈັບກຸມຊາວອົດສະຕຣາລີ 7 ຄົນ ແລະ ຊາວມາເລເຊຍ 1 ຄົນ ທັງໝົດອາຍຸລະຫວ່າງ 24-34 ປີ ເຈົ້າໜ້າທີ່ອົດສະຕຣາລີກ່າວວ່າ ໃນຈຳນວນນີ້ 3 ຄົນຖືກຕັ້ງຂໍ້ຫາລັກລອບນຳເຂົ້າຢາເສບຕິດມາເພື່ອການຄ້າ ສ່ວນອີກ 5 ຄົນຖືກຕັ້ງຂໍຫາພະຍາຍາມຄອບຄອງ ແລະ ຂົນສົ່ງຢາໄອສຈຳນວນຫລາຍ ຊຶ່ງມີໂທດສູງສຸດຄືຈຳຄຸກຕະຫລອດຊີວິດ ຕຳຫລວດອົດສະຕຣາລີເປີດເຜີຍວ່າໄດ້ປະສານກັບທາງການຈີນໃນຄະດີດັ່ງກ່າວ ຊຶ່ງເປັນຄວາມຮ່ວມມືເພື່ອປາບປາມເຄືອຂ່າຍລັກລອບຄ້າຢາໄອສເຂົ້າມາໃນອົດສະຕຣາລີ ແລະ ຕ່າງປະເທດ.