ວັນທີ 30 ມິຖຸນາ 2016 ໄດ້ມີ ພິທີເປີດສະຖານກົງສຸນໃຫຍ່ແຫ່ງ ສປປ ລາວ ທີ່ແຂວງຊຽງແຕງ, ຣາຊະອານາຈັກກຳປູເຈຍ ໂດຍເປັນປະທານຮ່ວມຂອງ ທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ ແລະທ່ານ ລອງ ວິຊາໂລ ຮອງລັດຖະມົນຕີກະຊວງການຕ່າງປະເທດ ແລະການຮ່ວມມື ແຫ່ງຣາຊະອານາຈັກກຳປູເຈຍ, ຊຶ່ງມີບັນດາເຈົ້າແຂວງຂອງບັນ ດາແຂວງໃກ້ຄຽງຂອງລາວ ແລະກຳປູເຈຍ, ທ່ານທູດລາວ ແລະທູດກຳປູເຈຍ, ພ້ອມດ້ວຍແຂກຖືກເຊີນຈຳນວນໜຶ່ງ ເຂົ້າຮ່ວມ.
ການເປີດສະຖານກົງສຸນໃຫຍ່ຄັ້ງ ນີ້ແມ່ນເປັັນການເພີ່ມທະວີສາຍພົວພັນມິດຕະພາບ ແລະການຮ່ວມມືລະຫວ່າງສອງປະເທດໃຫ້ນັັບມື້ນັບມີຄວາມແໜ້ນແຟ້ນ ແລະເລິກເຊິ່ງ. ພ້ອມກັນນີ້ ກໍເປັນການສ້າງຄວາມສະດວກສະບາຍໃຫ້ປະ ຊາຊົນລາວ ແລະກຳປູເຈຍ ໂດຍສະເພາະປະຊາຊົນທີ່ຢູ່ລຽບຕາມຊາຍແດນ ໄປມາຫາສູ່ກັນ. ມາຮອດປະຈຸບັນ ປະລິມານການຄ້າສອງຝ່າຍ ແລະການໄປມາຫາສູ່ກັນຂອງນັກທ່ອງທ່ຽວ ກໍຄືປະຊາຊົນສອງຊາດທີ່ຢູ່ເຂດຊາຍແດນ ລາວ-ກຳປູເຈຍນັບມື້ນັບເພີ່ມຂຶ້ນຈຳນວນຫຼາຍ.
ປີ 2015 ມູນຄ່າການຄ້າສອງຝ່າຍ ຂອງສອງປະເທດສາມາດບັນລຸໄດ້ 24.5 ລ້ານໂດລາສະຫະລັດ ແລະຈຳນວນຄົນທີ່ຂ້າມໄປທ່ຽວ ແລະຄ້າຂາຍຢູ່ປະເທດຂອງກັນ ແລະກັນກໍເພີ່ມຂຶ້ນເປັນ 4,16 ແສນເທື່ອຄົນ.
ດ້ວຍເຫດນັ້ນ ລັດຖະບານສອງປະເທດ ຈິ່ງເຫັນດີຮ່ວມກັນໃຫ້ເປີດສະຖານກົງສູນໃຫຍ່ຂອງ ສປປ ລາວ ແຫ່ງທຳອິດຂຶ້ນທີ່ແຂວງຊຽງແຕງ, ຣາຊະອານາຈັກກຳປູເຈຍ ເພື່ອເປັນການຊຸກຍູ້ສົ່ງເສີມ ແລະອຳນວຍຄວາມສະດວກໃຫ້ແກ່ການພົວພັນຮ່ວມມືທາງດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ
ຂອງສອງປະເທດໃຫ້ນັບມື້ນັບຂະຫຍາຍຕົວ ແລະທັງເປັນການປະກອບສ່ວນເຂົ້າໃນການສ້າງເປັນປະຊາຄົມອາຊຽນ, ໂດຍສະເພາະແມ່ນປະຊາຄົມເສດຖະກິດອາຊຽນໃຫ້ມີຜົນສຳເລັດຢ່າງດີ.
ສະຖານກົງສຸນໃຫຍ່ແຫ່ງນີ້ ມີຂອບເຂດຮັບຜິດຊອບກວມເອົາ 5 ແຂວງ ຂອງຣາຊະອານາຈັກກຳປູເຈຍເຊັ່ນ: ແຂວງຊຽງແຕງ, ແຂວງກຼໍແຈະ, ແຂວງແປຼະວິເຣຍ, ແຂວງຣັດຕະນະຄີຣີ ແລະແຂວງມົນດົນຄີຣີ.
ການເປີດສະຖານກົງສຸນໃຫຍ່ໃນຄັ້ງນີ້ ນັບເປັນກິດຈະກຳໜຶ່ງທີ່ສຳຄັນ ໃນທ່າມກາງບັນຍາກາດທີ່ສອງປະເທດກຳລັງສະເຫຼີມສະຫຼອງວັນສ້າງຕັ້ງສາຍພົວພັນການທູດລະຫວ່າງລາວ-ກຳປູເຈຍ ຄົບຮອບ 60 ປີ (15 ມິຖຸນາ 1956-15 ມິຖຸນາ 2016).
ທີ່ມາ: ເສດຖະກິດ-ສັງຄົມ