ວັນທີ 30 ມິຖຸນາ 2016 ສະມາຄົມນັກທຸລະກິດຍິງລາວ ຮ່ວມກັບສະມາຄົມນັກທຸລະກິດຍິງແຂວງອັດຕະປືໄດ້ຈັດສຳມະນາ ໃນຫົວຂໍ້ການຄຸ້ມຄອງການຕະຫຼາດ ແລະການເຂົ້າເຖິງແຫຼ່ງທຶນ ໂດຍເປັນກຽດເຂົ້າຮ່ວມ ຂອງທ່ານ ນາງ ແສງມະນີ ວິຍະເກດ ທີ່ປືກສາສະມາຄົມນັກທຸລະກິດຍິງແຂວງອັດຕະປື, ມີທ່ານ ນາງ ສົມບົວວັນ ໝັ້ນອານົງ ປະທານສະມາຄົມນັກທຸລະກິດແມ່ຍິງແຂວງ, ມີ ທ່ານ ນາງ ຣັບຂວັນ ຊົນຣົງ ກຸນຜູ້ອຳນວຍການໂຄງການ MBI ປະຈຳລາວ, ມີຜູ້ຕາງໜ້າຈາກສະມາຄົມນັກທຸລະກິດແມ່ຍິງລາວຈາກ ສູນກາງ ແລະນັກທຸລະກິດຂະໜາດກາງ, ຂະໜາດນ້ອຍຢູ່ພາຍໃນແຂວງເຂົ້າຮ່ວມ.
ການຈັດສຳມະນາໃຫ້ແກ່ນັກທຸລະກິດຍິງໃນເທື່ອນີ້ ແມ່ນເພື່ອສຶກສາຄວາມ ແລະຖອດຖອນບົດຮຽນຈາກຜູ້ທີ່ມີປະສົບປະການດ້ານທຸລະກິດໃນຜ່ານມາ ເພື່ອຂະຫຍາຍກິດຈະການ ຫຼື ແກ້ໄຂກິດຈະການຂອງຜູ້ດຳເນີນທຸລະກິດຢູ່ແຂວງອັດຕະປືໃຫ້ເຂົ້າສູ່ເຕັກນິກທີ່ມີຄຸນນະພາບ ແລະໄດ້ຮັບຜົນຕອບແທນຈາກການລົງທຶນຢ່າງກຸ້ມຄ່າ, ຫົວຂໍ້ການຄຸ້ມ ຄອງການຕະຫຼາດ ແລະການເຂົ້າເຖິງ ແຫຼ່ງເງິນທຶນແມ່ນມີຄວາມສຳຄັນຕໍ່ນັກດຳເນີນທຸລະກິດອັນລ້ຳຄ່າ, ເປັນປັດໄຈໃນການດຳເນີນທຸລະກິດ, ໃຫ້ການຜະລິດ, ການຊື້ຂາຍໄດ້ປ່ຽນແປງໄປຢ່າງມີປະສິດທິພາບ ແລະມີການຂະຫຍາຍຕົວ, ເວົ້າລວມແລ້ວ ນັກທຸລະກິດແມ່ນມີຄວາມສຳຄັນຫຼາຍທີ່ສຸດຕໍ່ກັບການພັດທະນາປະເທດຊາດ ພ້ອມທັງມີອິດທິພົນສູງຢ່າງກວ້າງຂວາງໃນການດຳເນີນຊີວິດການເປັນຢູ່ຂອງທຸກຄົນໃນສັງຄົມດ້ານການບໍລິການໄດ້ມີຄວາມສະດວກສະບາຍໃນການຊົມໃຊ້ ແລະເຂົ້າເຖິງສິ່ງຕ່າງໆ, ປະຈຸບັນເອື້ອຍນ້ອງແມ່ຍິງໄດ້ມີບົດບາດເຂົ້າຮ່ວມໃນການພັດທະນາເສດຖະກິດ-ສັງຄົມຢູ່ໃນລະດັບປະເທດ ແລະອັນທີ່ພົ້ນເດັ່ນແມ່ຍິງໄດ້ເຂົ້າຮ່ວມໃນຂະບວນການດຳເນີນທຸລະກິດສ້າງເສດຖະກິດຄອບຄົວ, ເສດຖະກິດຂະໜາດນ້ອຍ ແລະຂະໜາດກາງນັບມື້ນັບຫຼາຍຂຶ້ນ ຊຶ່ງມີນັກທຸລະກິດແມ່ຍິງບາງຈຳນວນກໍສາມາດປະສົບຜົນສຳເລັດ ຍາດໄດ້ປະສົບປະການ ແລະສ້າງຄວາມສາມາດໃນເບື້ອງຕົ້ນຢ່າງມີປະສິດທິພາບ.
ດັ່ງນັ້ນ ການສຳມະນານັກທຸລະກິດແມ່ຍິງໃນຄັ້ງນີ້ ກໍແມ່ນເປັນການເຕົ້າໂຮມຄວາມສາມັກຄີ, ເປັນການເຕົ້າໂຮມ ແລກປ່ຽນແນວຄວາມຄິດ, ສະຕິປັນຍາ ແລະຫົວຄິດປະດິດສ້າງຂອງນັກທຸລະກິດແມ່ຍິງບັນດາເຜົ່າ ໃຫ້ເປັນກຳລັງແຮງປະກອບສ່ວນເຂົ້າໃນການປະຕິບັດແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມຂອງລັດໃຫ້ໄດ້ຮັບຜົນດີ ໂດຍສະເພາະແມ່ນແຜນ ການ 5 ປີ (2016-2020) ຂອງອົງຄະນະພັກແຂວງຄັ້ງທີ X ແລະສະມາຄົມນັກທຸລະກິດແມ່ຍິງກໍແມ່ນເປັນອົງປະກອບອັນສຳຄັນໜຶ່ງເຂົ້າໃນແຜນພັດທະນານຳເອົາແຂວງອັດຕະປືຫຼຸດພົ້ນອອກຈາກສະພາບດ້ອຍພັດທະນາເທື່ອລະກ້າວ ຊຶ່ງທັງໝົດດັ່ງກ່າວສຳລັບໃນອະນາຄົດນັກທຸລະກິດ ຍິ່ງມີຄວາມຈຳເປັນຈະຕ້ອງໄດ້ພ້ອມກັນສຶກສາຮຽນຮູ້ຂໍ້ມູນຂ່າວສານເຕັກໂນໂລຊີ, ບົດຮຽນການ ດຳເນີນທຸລະກິດທີ່ກ້າວໜ້າແນໃສ່ເຮັດໃຫ້ການຜະລິດ, ການບໍລິການ ແລະການດຳເນີນທຸລະກິດຕ່າງໆຂອງຕົນໄດ້ເຄື່ອນໄຫວຢ່າງມີປະສິດທິຜົນສູງຂຶ້ນ.
ທີ່ມາ: ເສດຖະກິດ-ສັງຄົມ