ສຳນັກຂ່າວບີບີຊີຂອງອັງກິດ ລາຍງານໃນວັນທີ 3 ກໍລະກົດຜ່ານມານນີ້ວ່າ ໃນວັນເສົາທີ 2 ກໍລະກົດ 2016 ໄດ້ມີປະຊາຊົນຜູ້ຄັດຄ້ານ ຈຳນວນຫລາຍໝື່ນຄົນ ອອກມາເດີນຂະບວນປະທ້ວງໃຫຍ່ ເປັນຄັ້ງທີ 2 ພາຍໃນເວລາບໍ່ເຖິງອາທິດ ເພື່ອຄັດຄ້ານລັດຖະບານ ພາຍໃຕ້ການນຳຂອງ ທ່ານ ເດວິດ ຄາເມຣອນ ນາຍົກລັດຖະມົນຕີ ແຫ່ງ ສະຫະຣາຊະອານາຈັກ ພາຍຫລັງທີ່ລັດຖະບານຊຸດນີ້ ໄດ້ຈັດໃຫ້ລົງປະຊາມະຕິ ແລະ ສຽງສ່ວນຫລາຍຂອງປະຊາຊົນເຫັນດີ ໃຫ້ປະເທດອອກຈາກການເປັນສະມາຊິກສະຫະພາບເອີຣົບ.

ທັງນີ້ ເນື່ອງຈາກການລົງປະຊາມະຕິ ຊຶ່ງຈັດຂຶ້ນເມື່ອວັນທີ 23 ມິຖຸນາຜ່ານມາ 51.9% ເຫັນດີໃຫ້ອອກຈາກ ການເປັນສະມາຊິກສະຫະພາບເອີຣົບ ໂດຍຜູ້ລົງຄະແນນດັ່ງກ່າວ ສ່ວນໃຫຍ່ແມ່ນໃຫ້ເຫດຜົນວ່າ ການທີ່ມີຈຳນວນຜູ້ອົບພະຍົບເຂົ້າມາຫລວງຫລາຍ ເປັນເຫດຜົນສຳຄັນທີ່ຕ້ອງການ ໃຫ້ປະເທດອອກຈາກສະຫະພາບເອີຣົບ ແລະ ອ້າງວ່າ ຈະເຮັດໃຫ້ລັດຖະບານ ປະຢັດງົບປະມານມະຫາສານ ຊຶ່ງສາມາດນຳໄປຈັດສັນສະຫວັດດີການ ໃຫ້ແກ່ພົນລະເມືອງພາຍໃນປະເທດໄດ້ຫລາຍຂຶ້ນ.

ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!