ເພື່ອເປັນການສະກັດກັ້ນ ແລະ ປາບປາມບຸກຄົນທີ່ປອມແປງໃບຢັ້ງຢືນການສຶກສາຢ່າງສິ້ນເຊີງ, ດັ່ງນັ້ນ ກະຊວງສຶກສາທິການ ແລະ ກີລາ (ສສກ) ເນັ້ນໜັກໃຫ້ອົງການຈັດຕັ້ງຂອງພັກ, ຂອງລັດ ອົງການຈັດຕັ້ງມະຫາຊົນນັບທັງພາກລັດ ແລະ ເອກະຊົນ ກວດກາຄືນຢ້ອນຫຼັງ ພະນັກງານທີ່ສັງກັດອົງກອນຂອງຕົນ ທີ່ສົງໄສວ່າມີການປອມແປງໃບຢັ້ງຢືນການສຶກສາ ມາສະໝັກວຽກນັບແຕ່ປີ 2006 ເປັນຕົ້ນມາ ເພື່ອຈະມີການລຶບລ້າງ ແລະ ລົງໂທດຕາມລະບຽບການໃນກໍລະນີກວດພົບເຫັນ.
ອີງຕາມຄຳສັ່ງແນະນຳ ກ່ຽວກັບການກວດກາເອກະສານຢັ້ງຢືນການສຶກສາ, ໃບປະກາສະນີຍະບັດ ແລະ ວຸດທິການສຶກສາ ໃນຂອບເຂດທົ່ວປະເທດ ຂອງລັດຖະມົນຕີວ່າການ ກະຊວງສຶກສາທິການ ແລະ ກິລາ ລະບຸວ່າ: ໂດຍຮຽກຮ້ອງໃຫ້ພະນັກງານໃໝ່ເຂົ້າສັງກັດອົງການຂອງຕົນ ໃຫ້ເອົາໃຈໃສ່ກວດກາຢ່າງເຂັ້ມງວດ ຕໍ່ຄວາມຖືກຕ້ອງຂອງເອກະສານຢັ້ງຢືນ ບໍ່ໃຫ້ມີຄົນບໍ່ດີ ນຳໃຊ້ການປອມແປງເອກະສານຂ້າງເທິງ ສັງກັດອົງການຂອງຕົນ. ຄຽງຄູ່ກັນນັ້ນ, ສະຖາບັນການສຶກສາທຸກຊັ້ນ, ທຸກສາຍ ນັບທັງພາກລັດ ແລະ ເອກະຊົນ ທີ່ຈະຮັບນັກສຶກສາເຂົ້າຮຽນ ໃນສະຖາບັນການສຶກສາຂອງຕົນ ກໍ່ຕ້ອງໄດ້ມີການກວດກາຢ່າງເຂັ້ມງວດ ຄວາມຖືກຕ້ອງຂອງເອກະສານຢັ້ງຢືນການສຶກສາ ເພື່ອຮັບປະກັນບໍ່ໃຫ້ມີນັກຮຽນ-ນັກສຶກສາ ນຳໃຊ້ເອກະສານປອມເຂົ້າມາຮຽນ ຢູ່ໃນສະຖາບັນການສຶກສາຂອງຕົນ. ທັງນີ້, ນັບແຕ່ໄລຍະເລີ່ມດຳເນີນການປະຕິຮູບລະບົບການສຶກສາແຫ່ງຊາດມານີ້ ໄດ້ເກີດມີປາກົດການປອມແປງໃບຢັ້ງຢືນການສຶກສາ ແລະ ປະກາສະນີຍະບັດຊັ້ນຕ່າງໆຫຼາຍສົມຄວນ. ສະນັ້ນ, ຈຶ່ງສະເໜີໃຫ້ບັນດາອົງການຈັດຕັ້ງຂອງພັກ, ຂອງລັດ, ອົງການຈັດຕັ້ງມະຫາຊົນ, ສັງຄົມນັບທັງພາກລັດ ແລະ ເອກະຊົນ ກວດກາຄືນຢ້ອນຫຼັງ ພະນັກງານທີ່ເຂົ້າສັງກັດອົງການຂອງຕົນ ນັບແຕ່ປີ 2006 ເປັນຕົ້ນມາ, ແຕ່ຖ້າຫາກມີກໍລະນີລະແວງສົງໄສ ແມ່ນໃຫ້ພົວພັນກັບກົມກວດກາ, ກົມວິຊາການກ່ຽວຂ້ອງຂອງກະຊວງສຶກສາທິການ ແລະ ກີລາ, ໂຮງຮຽນ ຫຼື ສະຖາບັນການສຶກສາຕົ້ນສັງກັດຂອງຜູ້ກ່ຽວ ຕາມຄວາມເໝາະສົມ.
ໃນກໍລະນີກວດພົບບຸກຄົນທີ່ໄດ້ປອມແປງເອກະສານຢັ້ງຢືນການສຶກສາ, ປະກາສະນີຍະບັດ ແລະ ວຸດທິການສຶກສາ ແມ່ນໃຫ້ແຈ້ງເປັນທາງການ (ເປັນລາຍລັກອັກສອນ) ມາຍັງກະຊວງສຶກສາທິການ ແລະ ກີລາ ເພື່ອຈະປະກາດລຶບລ້າງເອກະສານດັ່ງກ່າວ, ພ້ອມກັນນັ້ນ ກໍ່ໃຫ້ດຳເນີນການປະຕິບັດວິໄນຕາມລະບຽບການ ແລະ ລົງໂທດຕາມລະບຽບກົດໝາຍຢ່າງເຂັ້ມງວດ. ສະນັ້ນ, ຈຶ່ງມອບໃຫ້ກົມວິຊາກາຂອງກະຊວງສຶກສາທິການ ແລະ ກີລາ ແລະ ສະຖາບັນການສຶກສາທີ່ກ່ຽວຂ້ອງ ອອກຄຳສັ່ງແນະນຳລະອຽດຕື່ມອີກ ແລ້ວແຈ້ງໃຫ້ສັງຄົມຮັບຊາບຢ່າງກວ້າງຂວາງ ແລະ ມີສ່ວນຮ່ວມໃນການຈັດຕັ້ງປະຕິບັດໃຫ້ໄດ້ຮັບຜົນດີ.
ເຖິງແມ່ນວ່າກະຊວງສຶກສາທິການ ແລະ ກີລາ ໄດ້ເອົາໃຈໃສ່ປາບປາມການປອມແປງໃບຢັ້ງຢືນການສຶກສາ ແຕ່ກໍ່ບໍ່ສາມາດສະກັດກັ້ນໄດ້ໝົດ, ດັ່ງນັ້ນ ທຸກພາກສ່ວນທັງພາກລັດ ແລະ ເອກະຊົນ ຄວນຮ່ວມມືກັນ ແລະ ເອົາຈິງຕໍ່ການສະກັດກັ້ນປາກົດການດັ່ງກ່າວ ເພື່ອເຮັດໃຫ້ຄຸນນະພາບຂອງຊັບພະຍາກອນມະນຸດ ນັບມື້ມີການພັດທະນາຄວາມສາມາດ ໃຫ້ທຽບເທົ່າກັບລະດັບພາກພື້ນ ແລະ ສາກົນ ໂດຍສະເພາະ ຮອງຮັບການເຂົ້າເປັນປະຊາຄົມເສດຖະກິດອາຊຽນ ໃນປີ 2015 ນີ້.
ຂອບໃຈຂ່າວຈາກ: ໜັງສືພິມວຽງຈັນໃໝ່