ກອງປະຊຸມ ຜູ້ບໍລິຫານການສຶກສາ ແລະ ກິລາ ທົ່ວປະເທດ ປະຈຳປີ 2016 ຈັດຂຶ້ນໃນ ວັນທີ 30 ມິຖຸນາ 2016 ທີ່ນະຄອນຫລວງວຽງຈັນ,ວຽກງານການສຶກສາ ແລະ ກິລາ ເປັນບູລິມະສິດ ຂະແໜງການໜຶ່ງ ທີ່ລັດຖະບານ ໃຫ້ຄວາມສຳຄັນ ແລະ ຖືເອົາການສຶກສາ ເປັນໃຈກາງ ໃນການພັດທະນາ ຊັບພະຍາກອນມະນຸດ ທີ່ມີຄຸນນະພາບ ເຊິ່ງເປັນປັດໄຈ ຕັດສິນການຂະຫຍາຍຕົວ ທາງດ້ານ ເສດຖະກິດ-ສັງຄົມ ຂອງປະເທດ. ໃຫ້ກຽດເປັນ ປະທານ ໂດຍທ່ານນາງ ແສງເດືອນ ຫລ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ, ມີບັນດາຮອງລັດຖະມົນຕີ, ຄູ-ອາຈານ ເຂົ້າຮ່ວມ.
ກອງປະຊຸມ ໄດ້ຮັບຟັງ ການລາຍງານ ການຈັດຕັ້ງປະຕິບັດ ແຜນພັດທະນາ ການສຶກສາ ແລະ ກິລາ ປະຈຳປີ 2015-2016 ກະຊວງສຶກສາທິການ ແລະ ກິລາ ໄດ້ເອົາໃຈໃສ່ ລົງທຶນເຂົ້າໃນ ການພັດທະນາ ການສຶກສາ ແຕ່ອະ ນຸບານ ຮອດມະຫາໄລ ໂດຍເນັ້ນໃສ່ ການຂະຫຍາຍຫ້ອງຮຽນ, ໂຮງຮຽນ, ສະໜອງອຸປະກອນຮັບໃຊ້ ການຮຽນ-ການສອນ, ອົບຮົມ ແລະ ຍົກລະດັບຄູ ລວມທັງການ ສ້າງຄວາມເຂັ້ມແຂງ ວຽກງານດ້ານບໍລິຫານ ຄຸ້ມຄອງການສຶກສາແຕ່ລະຂັ້ນ, ປັບປຸງ ແລະ ສ້າງນິຕິກຳຫລາຍຢ່າງ ເພື່ອຮັບໃຊ້ໃຫ້ແກ່ ການພັດທະນາ ລະບົບການສຶກສາ ເປັນຕົ້ນແມ່ນ ປັບປຸງກົດໝາຍ ການສຶກສາ, ສ້າງຍຸດທະສາດ ການພັດທະນາກິລາລາວ ເຊິ່ງໄດ້ສົ່ງຜົນ ໃຫ້ອັດຕາເຂົ້າຮຽນ ຂອງເດັກ 3-5 ປີ ເພີ່ມຈາກ 43% ໃນປີ 2015 ເປັນ 49%, ອັດຕາເຂົ້າຮຽນຂອງເດັກ 5 ປີ ເພີ່ມຈາກ 66% ໃນປີ 2015 ເປັນ 70,8%, ອັດຕາເຂົ້າຮຽນໃໝ່ ສຸດທິຊັ້ນປະຖົມສຶກສາ ເພີ່ມຈາກ 97,2% ເປັນ 97,9%, ອັດຕາຄ້າງຫ້ອງ ແລະ ປະລະ ຊັ້ນປະຖົມສຶກສາ ຫລຸດຈາກ 5,8% ເປັນ 4,8% ແລະ ຈາກ 5,2% ເປັນ 4,9% ຕາມລຳດັບ, ໃນຄະນະທີ່ ອັດຕາການເຂົ້າຮຽນ ລວມຊັ້ນມັດທະຍົມຕົ້ນ ແລະ ປາຍ ເພີ່ມຂຶ້ນ 78% ເປັນ 82,2% ແລະ ຈາກ 45,8% ເປັນ 47,8% ຢ່າງໃດກໍດີ ຄຽງຄູກັບການສຶກສາ ໃນໂຮງຮຽນ, ການສຶກສາ ນອກໂຮງຮຽນ ກໍເປັນວຽກງານໜຶ່ງ ທີ່ສຳຄັນ ເພື່ອໃຫ້ປະເທດຊາດ ຫລຸດພົ້ນອອກຈາກ ສະຖານະພາບ ປະເທດດ້ອຍພັດທະນາ ໃນປີ 2020 ສຳລັບການສຶກສາ ຫລັງມັດທະຍົມຄື: ການສຶກສາສ້າງຄູ, ອາຊີວະສຶກສາ ແລະ ການສຶກສາຊັ້ນສູງ ກໍໄດ້ຮັບການປັບປຸງ ຂຶ້ນເທື່ອລະກ້າວ ທາງດ້ານປະລິມານ ແລະ ຄຸນນະພາບ ເຊັ່ນ: ປັບປຸງຫລັກສູດ, ຍົກລະດັບໃຫ້ຄູສອນ ແລະ ອື່ນໆອີກ. ນອກນັ້ນ, ຍັງໄດ້ຮັບຟັງ ແຜນພັດທະນາ ການສຶກສາ ແລະ ກິລາ 2016-2017, ລາຍງານຜົນສຳເລັດສຳລັບ ຂະແໜງການຍ່ອຍ ກິລາກາຍະກຳ ປະຈຳສົກປີ 2015-2016 ແລະ ແຜນຈຸດສຸມ ປະຈຳສົກ ປີ 2016-2017, ລາຍງານສະພາບການເງິນ, ແຜນຄາດຄະເນ ງົບປະມານ 2016-2017 ຂອງຂະແໜງການ ສຶກສາ ແລະ ກິລາ ແລະ ຜົນການວິໄຈ ໃສ່ການລົງທຶນ ໃນຂະແໜງການສຶກສາ, ສະເໝີແຜນການຕິດຕາມ ປະເມີນຜົນການ ຈັດຕັ້ງປະຕິບັດ ແຜນຈຸດສຸມສຳລັບ ສົກປີ 2016-2017 ແລະ ສະເໝີແຜນສ້າງ ແລະ ປັບປຸງນິຕິກຳ ແລະ ການຄຸ້ມຄອງ ຄູຕາມທິດປ່ຽນແປງໃໝ່ ລວມທັງການຄຸ້ມຄອງ ຄູອາສາສະໝັກ ແລະ ຄູສັນຍາຈ້າງ ແລະ ຫລາຍໆບັນຫາ ທີ່ຕິດພັນກັບ ວຽກງານການສຶກສານຳອີກ.
ທີ່ມາ: ໜັງສືພິມປະເທດລາວ