ໜັງສືພິມວຽງຈັນທາມສະບັບວັນທີ 29 ມິຖຸນານີ້ລາຍງານວ່າ: ທ່ານດຣ.ຄຳລຽນ ພົນເສນາ ຮອງລັດຖະມົນຕີກະຊວງແຜນການແລະການລົງທຶນຢືນຢັນໃນວັນທີ 28 ມິຖຸນານີ້ວ່າ: ເຖິງວ່າລາວບໍ່ໄດ້ຜ່ານການກວດສອບຈາກຄະນະກຳມະການນະໂຍບາຍພັດທະນາຂອງສະພາເສດຖະກິດແລະສັງຄົມ ອົງການສະຫະປະຊາຊາດໃນປີ 2015, ແຕ່ກໍ ມີຄວາມກ້າວໜ້າຢ່າງໃຫຍ່ຕາມ3ມາດຕະຖານ.ໂດຍຫຼ້າສຸດ ຕາມການຄາດຄະເນຂອງຄະນະກຳມະການເສດຖະກິດສັງຄົມອາຊີແລະປາຊີຟິກອົງການສະຫະປະຊາຊາດຊີ້ໃຫ້ເຫັນວ່າ: ໃນຫຼາຍປີຕໍ່ໜ້າ, ຖ້າວ່າລາວສາມາດຮັກສາຈັງຫວະການເຕີບໂຕ, ລາຍໄດ້ສະເລ່ຍຕໍ່ຫົວຄົນຈະບັນລຸມາດຕະຖານຫຼຸດພົ້ນອອກຈາກປະເທດທີ່ດ້ອຍພັດທະນາແລ້ວ, ຄາດວ່າຈະສາມາດບັນລຸມາດຕະຖານຊັບສິນກຳລັງຄົນໃນປີ2018.
ທ່ານດຣ. ຄຳລຽນ ພົນເສນາກ່າວວ່າ: ລາວຈະສຸມໃສ່ແກ້ໄຂຈຸດອ່ອນທາງເສດຖະກິດ, ສັງຄົມແລະສິ່ງແວດລ້ອມ ເພື່ອຫຼຸດພົ້ນອອກຈາກປະເທດທີ່ດ້ອຍພັດທະນາເຊິ່ງຈຸດນີ້ຮຽກຮ້ອງໃຫ້ປະຊາຄົມໂລກລວມທັງອົງການທີ່ກ່ຽວຂ້ອງຂອງສະຫະປະຊາຊາດຈົ່ງເພີ່ມການສະໜັບສະໜູນແລະການຮ່ວມມືກັບລາວ, ພ້ອມທັງໃຊ້ບາດກ້າວຕົວຈິງເພື່ອຕອບສະໜອງກັບຄວາມຮຽກຮ້ອງຕ້ອງການລະອຽດຂອງປະເທດທີ່ດ້ອຍພັດທະນາ.