Zhao George ປະທານຝ່າຍທຸລະກິດຂອງ Honor ອອກມາເຜີຍຕົວຢ່າງກ່ຽວກັບງານເປີດໂຕສະມາດໂຟນເຮືອທຸງລຸ້ນໃໝ່ຂອງບໍລິສັດຄື Honor 8 ໂດຍຈະຈັດຂຶ້ນທີ່ ຊຽງໄຮ້ ປະເທດຈີນ ເວລາ 18:30. ເຊິ່ງຕົວຢ່າງທີ່ປ່ອຍອອກມານີ້ສະແດງໃຫ້ເຫັນວ່າ Honor 8 ຈະມາພ້ອມກັບກ້ອງຫຼັງເລນຄູ່ ໂດຍເບິ່ງຈາກວົງມົນສອງວົງທີ່ຮູບ ແລະຄາດວ່າຈະບໍ່ໄດ້ໃຊ້ເລນຂອງບໍລິສັດ Leica ຢ່າງແນ່ນອນ.
ສ່ວນທາງດ້ານສະເປັກເຮົາກໍມີຂໍ້ມູນຈາກເວັບໄຊ TENAA ທີ່ Honor 8 ໄດ້ຜ່ານການຮັບຮອງມາແລ້ວ, ເຊິ່ງຈະມີໜ້າຈໍຂະໜາດ 5.2 ນິ້ວ, ຄວາມລະອຽດ FullHD (1920 x 1080 ພິກເຊວ), ໃຊ້ງານຊິບປະມວນຜົນອ໋ອກຕ້າຄໍ Kirin 950. ທາງດ້ານຊ໋ອບແວຣ໌ແມ່ນໃຊ້ງານລະບົບ Android 6.0, ແບັດເຕີຣີໃຫ້ມາ 2900mAh ອາດຈະຮອງຮັບການສາກໄວ, ຮອງຮັບລະບົບ NFC ແລະມີເຊັນເຊີ້ສະແກນນິ້ວມືທີ່ດ້ານຫຼັງໂຕເຄື່ອງ ໂດຍປ່ຽນການອອກແບບຈາກສີ່ຫຼ່ຽມມາເປັນວົງມົນຄືກັນກັບ Huawei Mate 8.
ສຳລັບ Hornor 8 ຈະມີເລກລະຫັດເຄື່ອງຢູ່ 4 ລະຫັດຄື: FRD-TL100, FRD-DL00, FRD-AL100, FRD-AL10 ເຊິ່ງຈະຕ່າງກັນບ່ອນທີ່ຮອງຮັບເຄື່ອຂ່າຍ ແລະພື້ນທີ່ຈັດເກັບຂໍ້ມູນ. ສ່ວນທາງດ້ານພື້ນທີ່ຄວາມຈຳແມ່ນມີ 3 ລຸ້ນຄື: RAM 3GB + ROM 32GB, RAM 4GB + ROM 32GB ແລະ RAM 4GB + ROM 64GB.
ດ້ານຂອງກ້ອງແມ່ນຕິດຕັ້ງກ້ອງຫຼັງເລນຄູ່ທັງສອງມີຄວາມລະອຽດຢູ່ທີ່ 12 ລ້ານພິກເຊວ ແລະກ້ອງໜ້າຄວາມລະອຽດ 8 ລ້ານພິກເຊວ. ນອກນີ້ກໍຮອງຮັບ 2 ຊິມເປັນແບບສະແຕນບາຍໄດ້ທັງສອງຊິມ. ສ່ວນຂະໜາດຂອງໂຕເຄື່ອງຢູ່ທີ່ 145.5 × 71.0 × 7.45 ມມ ແລະໜັກປະມານ 153 ກຣາມ.
ທີ່ມາ:gizmochina,ເດັກລາວ