ໃນໂອກາດຢ້ຽມຢາມຣາຊະອານາຈັກກຳປູເຈຍຢ່າງເປັນທາງການ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມພັນລະຍາ ແລະຄະນະຜູ້ແທນໄດ້ເຂົ້າຢ້ຽມຂ່ຳນັບພະມະຫາກະສັດ ໂນໂຣດົມ ສີຫາໂມນີ ເຈົ້າຊີວິດແຫ່ງຣາຊະອານາຈັກກຳປູເຈຍ ໃນຕອນເຊົ້າວັນທີ 28 ມິຖຸນາ 2016 ທີ່ພຣະລາດຊະວັງ ນະຄອນຫຼວງພະນົມເປັນຣາຊະອານາຈັກກຳປູເຈຍ.
ໃນໂອກາດນີ້ ພະມະຫາກະສັດໂນໂຣດົມ ສີຫາໂມນີ ເຈົ້າຊີວິດແຫ່ງຣາຊະອານາຈັກກຳປູເຈຍ ກໍໄດ້ສະແດງຄວາມຍິນດີຕ້ອນຮັບ ແລະຊົມເຊີຍ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ພ້ອມພັນລະຍາ ແລະຄະນະຢ້ຽມຢາມ ຣາຊະອານາຈັກກຳປູເຈຍ ຊຶ່ງເປັນການຢ້ຽມຢາມທີ່ມີຄວາມໝາຍຄວາມສຳຄັນໃນການເພີ່ມທະວີຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບທີ່ມີມາແຕ່ດົນນານລະຫວ່າງສອງປະເທດໃຫ້ແໜ້ນແຟ້ນຍິ່ງໆຂຶ້ນ.
ທ່ານ ທອງລຸນ ສີສຸລິດ ກໍໄດ້ສະແດງຄວາມຂອບໃຈຢ່າງສູງຕໍ່ການຕ້ອນຮັບອົບອຸ່ນຂອງພະມະຫາກະສັດ ໂນໂຣດົມ ສີຫາໂມນີ ເຈົ້າຊີວິດແຫ່ງຣາຊະອານາຈັກກຳປູເຈຍ ໃນໂອກາດເຂົ້າຢ້ຽມຂ່ຳນັບຄັ້ງນີ້ ພ້ອມທັງໄດ້ແຈ້ງຜົນການພົບ ປະກັບ ສົມເດັດ ຮຸນແຊນ ນາຍົກລັດຖະມົນຕີ ແຫ່ງຣາຊະອານາຈັກກຳປູເຈຍ ຊາບໄດ້ຕີລາຄາການພົວພັນ ແລະການຮ່ວມມືສອງຝ່າຍມີການຂະຫຍາຍຕົວເພີ່ມຂຶ້ນຢ່າງຕໍ່ເນື່ອງ ແລະໄດ້ນຳເອົາຄວາມຢື້ຢາມຖາມຂ່າວຂອງທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ເຖິງພະມະຫາກະສັດ ໂນໂຣດົມ ສີຫາໂມນີ ເຈົ້າຊີວິດແຫ່ງ ຣາຊະອານາຈັກກຳປູເຈຍ ໃນໂອກາດນີ້ດ້ວຍ.
ທີ່ມາ: 